అథ శ్రీవ్యాసరాజస్తోత్రం
వందే ముకుందమరవిందభవాదివంద్యం
ఇందిందిరావ్రతతిమేచకమాకటాక్షైః |
బందీకృతాననమమందమతిం విదధ్యాత్
ఆనందతీర్థహృదయాంబుజమత్తభృంగః ||1||

శ్రీవ్యాసయోగీ హరిపాదరాగీ
భక్తాతిపూగీ హితదక్షసద్గీః |
త్యాగీ విరాగీ విషయేషు భోగీ
ముక్తౌ సదా గీతసురేంద్రసంగీ ||2||

లక్ష్మీశపాదాంబుజమత్తభృంగ:
సదా దశప్రజ్ఞనయప్రసంగ: |
అద్వైతవాదే కృతమూలభంగో
మహావ్రతీశో విషయేష్వసంగ: ||3||

సదా సదాయత్తమహానుభావో
భక్తాఘతూలోచ్చయతీవ్రదావ: |
దౌర్జన్యవిధ్వంసనదక్షరావ:
శిష్యేషు యో యచ్ఛతి దివ్యగావ: ||4||

అద్వైతదావానలకాలమేఘో
రమారమస్నేహవిదారితాఘ: |
వాగ్వైఖరీనిర్జితసంశయౌఘో
మాయామతవ్రాతహిమే నిదాఘ: ||5||

మధ్వసిద్ధాంతదుగ్ధాబ్ధివృద్ధిపూర్ణకలాధర: |
వ్యాసరాజయతీంద్రో మే భూయాదీప్సితసిద్ధయే ||6||

యన్నామగ్రహణాదేవ పాపరాశి: పలాయతే |
సోఽయం శ్రీవ్యాసయోగీంద్రో నిహంతు దురితాని న: ||7||

యన్మృత్తికాదర్శనమాత్రభీత:
క్వచిత్ పిశాచస్తదనువ్రతేభ్య: |
దత్వా ధనం వాంఛితమాప తస్య
తైర్మార్జితాయామచిరేణ ముక్తిం ||8||

యత్కాశినాసికాముక్తజలాక్తశ్చకితాంతర: |
వ్యాఘ్రో మహానపి స్ప్రష్టుం నాశకత్ తమిహాశ్రయే ||9||

ద్వాత్రింశత్సప్తశతకమూర్తీర్హనూమత: ప్రభో: |
ప్రతిష్ఠాతా స్మృతిఖ్యాతస్తం భజే వ్యాసయోగినం ||10||

సీమానం తత్ర తత్రైత్య క్షేత్రేషు చ మహామతి: |
వ్యవస్థాప్యాత్ర మర్యాదాం లబ్ధవాంస్తమిహాశ్రయే ||11||

మధ్వదేశికసిద్ధాంతప్రవర్తకశిరోమణి: |
సోఽయం శ్రీవ్యాసయోగీంద్రో భూయాదీప్సితసిద్ధయే ||12||

భూతప్రేతపిశాచాద్యా యస్య స్మరణమాత్రత: |
పలాయంతే శ్రీనృసింహస్థానం తమహమాశ్రయే ||13||

వాతజ్వరాదిరోగాశ్చ భక్త్యా యముపసేవత: |
దృఢవ్రతస్య నశ్యంతి పిశాచాశ్చ తమాశ్రయే ||14||

తారపూర్వం బిందుయుక్తం ప్రథమాక్షరపూర్వకం |
చతుర్థ్యంతం చ తన్నామ నమ:శబ్దవిభూషితం ||15||

పాఠయంతం మాధ్వనయం మేఘగంభీరయా గిరా |
ధ్యాయన్నావర్తయేద్యస్తు భక్త్యా మేధాం స విందతి ||16||

రత్నసింహాసనారూఢం చామరైరభివీజతం |
ధ్యాయన్నావర్తయేద్యస్తు మహతీం శ్రియమాప్నుయాత్ ||17||

ప్రహ్లాదస్యావతారోఽసావహీంద్రానుప్రవేశవాన్ |
తేన తత్సేవినాం నౄణాం సర్వమేతద్ భవేద్ ధ్రువం ||18||

నమో వ్యాసమునీంద్రాయ భక్తాభీష్టప్రదాయినే |
నమతాం కల్పతరవే భజతాం కామధేనవే ||19||

వ్యాసరాజగురో మహ్యం త్వత్పదాంబుజసేవనాత్ |
దురితాని వినశ్యంతు యచ్ఛ శీఘ్రం మనోరథాన్ ||20||

యో వ్యాసత్రయసంజ్ఞకాన్ దృఢతరాన్ మధ్వార్యశాస్త్రార్థకాన్ |
రక్షద్వజ్రశిలాకృతీన్ బహుమతాన్ కృత్వా పరైర్దుస్తరాన్ ||21||

ప్రాయచ్ఛన్నిజపాదయుగ్మసరసీజాసక్తనౄణాం ముదా |
సోఽయం వ్యాసమునీశ్వరో మమ భవేత్ తాపత్రయక్షాంతయే ||22||

మధ్వభక్తో వ్యాసశిష్యపూర్ణప్రజ్ఞమతానుగ: |
వ్యాసరాజమునిశ్రేష్ఠ: పాతు న: కృపయా గురు: ||23||

వ్యాసరాజ వ్యాసరాజ ఇతి భక్త్యా సదా జపన్ |
ముచ్యతే సర్వదు:ఖేభ్యస్తదంతర్యామిణో బలాత్ ||24||

స్తువన్ననేన మంత్రేణ వ్యాసరాజాయ ధీమతే |
అభిషేకార్చనాదీన్ య: కురుతే స హి ముక్తిభాక్ ||25||

గురుభక్త్యా భవేద్విష్ణుభక్తిరవ్యభిచారిణీ |
తయా సర్వం లభేద్ధీమాంస్తస్మాదేతత్ సదా పఠేత్ ||26||

||ఇతి శ్రీవిజయీంద్రతీర్థవిరచితం శ్రీవ్యాసరాజస్తోత్రం ||