atha shrIvyAsarAjastotraM
vaMde mukuMdamaraviMdabhavAdivaMdyaM
iMdiMdirAvratatimechakamAkaTAkShaiH |
baMdIkR^itAnanamamaMdamatiM vidadhyAt
AnaMdatIrthahR^idayAMbujamattabhR^iMgaH || 1||

shrIvyAsayogI haripAdarAgI
bhaktAtipUgI hitadakShasadgIH |
tyAgI virAgI viShayeShu bhogI
muktau sadA gItasureMdrasaMgI || 2||

lakShmIshapAdAMbujamattabhR^iMga:
sadA dashapraj~nanayaprasaMga: |
advaitavAde kR^itamUlabhaMgo
mahAvratIsho viShayeShvasaMga: || 3||

sadA sadAyattamahAnubhAvo
bhaktAghatUlochchayatIvradAva: |
daurjanyavidhvaMsanadakSharAva:
shiShyeShu yo yachChati divyagAva: || 4||

advaitadAvAnalakAlamegho
ramAramasnehavidAritAgha: |
vAgvaikharInirjitasaMshayaugho
mAyAmatavrAtahime nidAgha: || 5||

madhvasiddhAMtadugdhAbdhivR^iddhipUrNakalAdhara: |
vyAsarAjayatIMdro me bhUyAdIpsitasiddhaye || 6||

yannAmagrahaNAdeva pAparAshi: palAyate |
so.ayaM shrIvyAsayogIMdro nihaMtu duritAni na: || 7||

yanmR^ittikAdarshanamAtrabhIta:
kvachit pishAchastadanuvratebhya: |
datvA dhanaM vAMChitamApa tasya
tairmArjitAyAmachireNa muktiM || 8||

yatkAshinAsikAmuktajalAktashchakitAMtara: |
vyAghro mahAnapi spraShTuM nAshakat tamihAshraye || 9||

dvAtriMshatsaptashatakamUrtIrhanUmata: prabho: |
pratiShThAtA smR^itikhyAtastaM bhaje vyAsayoginaM || 10||

sImAnaM tatra tatraitya kShetreShu cha mahAmati: |
vyavasthApyAtra maryAdAM labdhavAMstamihAshraye || 11||

madhvadeshikasiddhAMtapravartakashiromaNi: |
so.ayaM shrIvyAsayogIMdro bhUyAdIpsitasiddhaye || 12||

bhUtapretapishAchAdyA yasya smaraNamAtrata: |
palAyaMte shrInR^isiMhasthAnaM tamahamAshraye || 13||

vAtajvarAdirogAshcha bhaktyA yamupasevata: |
dR^iDhavratasya nashyaMti pishAchAshcha tamAshraye || 14||

tArapUrvaM biMduyuktaM prathamAkSharapUrvakaM |
chaturthyaMtaM cha tannAma nama:shabdavibhUShitaM || 15||

pAThayaMtaM mAdhvanayaM meghagaMbhIrayA girA |
dhyAyannAvartayedyastu bhaktyA medhAM sa viMdati || 16||

ratnasiMhAsanArUDhaM chAmarairabhivIjataM |
dhyAyannAvartayedyastu mahatIM shriyamApnuyAt || 17||

prahlAdasyAvatAro.asAvahIMdrAnupraveshavAn |
tena tatsevinAM nR^INAM sarvametad bhaved dhruvaM || 18||

namo vyAsamunIMdrAya bhaktAbhIShTapradAyine |
namatAM kalpatarave bhajatAM kAmadhenave || 19||

vyAsarAjaguro mahyaM tvatpadAMbujasevanAt |
duritAni vinashyaMtu yachCha shIghraM manorathAn || 20||

yo vyAsatrayasaMj~nakAn dR^iDhatarAn madhvAryashAstrArthakAn |
rakShadvajrashilAkR^itIn bahumatAn kR^itvA parairdustarAn || 21||

prAyachChannijapAdayugmasarasIjAsaktanR^INAM mudA |
so.ayaM vyAsamunIshvaro mama bhavet tApatrayakShAMtaye || 22||

madhvabhakto vyAsashiShyapUrNapraj~namatAnuga: |
vyAsarAjamunishreShTha: pAtu na: kR^ipayA guru: || 23||

vyAsarAja vyAsarAja iti bhaktyA sadA japan |
muchyate sarvadu:khebhyastadaMtaryAmiNo balAt || 24||

stuvannanena maMtreNa vyAsarAjAya dhImate |
abhiShekArchanAdIn ya: kurute sa hi muktibhAk || 25||

gurubhaktyA bhavedviShNubhaktiravyabhichAriNI |
tayA sarvaM labheddhImAMstasmAdetat sadA paThet || 26||

|| iti shrIvijayIMdratIrthavirachitaM shrIvyAsarAjastotraM ||