ಶ್ರೀವೇಂಕಟೇಶಾಷ್ಟಕಮ್
ಅಥ ಶ್ರೀವೇಂಕಟೇಶಾಷ್ಟಕಮ್
ಮುಖೇ ಚಾರು ಹಾಸಂ ಕರೇ ಶಂಖಚಕ್ರಂ
ಗಲೇ ರತ್ನಮಾಲಾ ಸ್ವಯಂ ಮೇಘವರ್ಣಮ್ |
ಕಟೌ ದಿವ್ಯವಸ್ತ್ರಂ ಪ್ರಿಯಂ ರಕ್ತವರ್ಣಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||1||
ಸದಾಭೀಷ್ಟಹಸ್ತಂ ಮುದಾ ಜಾನುಪಾಣಿಂ
ಲಸನ್ಮೇಖಲಾರತ್ನಶೋಭಾಪ್ರಕಾಶಮ್ | 
ಜಗತ್ಪಾವನಂ ಪಾದಪದ್ಮಾರಸಾಲಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||2||
ಅಜಂ ನಿರ್ಮಲಂ ನಿತ್ಯಮಾನಂದರೂಪಂ
ಜಗತ್ಕಾರಣಂ ಸರ್ವವೇದಾಂತವೇದ್ಯಮ್  |
ವಿಭುಂ ವಾಮನಂ ಸತ್ಯಮಾನಂದರೂಪಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||3||
ಶ್ರೀಯಾಧಿವೇಷ್ಟಿತಂ ವಾಮವಕ್ಷಃಸ್ಥಲಾಂಗಂ
ಸುರೈರ್ವಂದಿತಂ ಬ್ರಹ್ಮರುದ್ರಾದಿಭಿಸ್ತಮ್ |
ಸುರಸ್ವಾಮಿನಂ ಲೋಕಲೀಲಾವತಾರಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||4||
ಮಹಾಯೋಗಗಮ್ಯಂ ಪರಿಭ್ರಾಜಮಾಂ
ವಿದಂ ವಿಶ್ವರೂಪಂ ಮಹೇಶಂ ಸುರೇಶಮ್ |
ಅಹೋ ಬುದ್ಧರೂಪಂ ಮಹಾಬೋಧಗಮ್ಯಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||5||
ಅಹೋ ಮತ್ಸ್ಯರೂಪಂ ತಥಾ ಕೂರ್ಮರೂಪಂ
ತಥಾ ಕ್ರೋಡರೂಪಂ ಮಹಾನಾರಸಿಂಹಮ್ | 
ಅಹೋ ಕುಬ್ಜರೂಪಂ ಪ್ರಿಯಂ ಜಾಮದಗ್ನ್ಯಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||6||
ಅಹೋ ಬೌದ್ಧರೂಪಂ ತಥಾ ಕಲ್ಕಿರೂಪಂ
ಪ್ರಿಯಂ ಶಾಶ್ವತಂ ಲೋಕರಕ್ಷಾಕರಂ ತಮ್ |
ಶುಭಂ ಶಂಕರಂ ವಾಸ್ತಿನಿರ್ವಾಣರೂಪಂ
ಧರಂತಂ ಮುರಾರಿಂ ಭಜೇ ವೇಂಕಟೇಶಮ್ ||7||
ಜಯತಿ ಜಯತಿ ರಾಮೋ ಜಾನಕೀಜೀವಹೃದ್ಯೋ 
ಜಯತಿ ಜಯತಿ ಕೃಷ್ಣಃ ಕಾಮಿನೀಕೇಲಿಲೋಲಃ |
ಜಯತಿ ಜಯತಿ ವಿಷ್ಣುರ್ವಾಸುದೇವೋ ಮುಕುಂದೋ
ಜಯತಿ ಜಯತಿ ದೇವೋ ವೇಂಕಟೇಶಃ ಸುರೇಶಃ ||8||
|| ಇತಿ ಶ್ರೀಬ್ರಹ್ಮಾಂಡಪುರಾಣೇ ಶ್ರೀವೇಂಕಟೇಶಾಷ್ಟಕಮ್ ||