શ્રીહરિવાયુસ્તુતિ: ॥ અથ નરસિંહનખસ્તુતિ: ॥ પાંત્વસ્માન્ પુરુહૂતવૈરિબલવન્માતંગમાદ્યદ્ઘટા- કુંભોચ્ચાદ્રિવિપાટનાધિકપટુપ્રત્યેકવજ્રાયિતા: । શ્રીમત્કંઠીરવાસ્ય પ્રતતસુનખરા દારિતારાતિદૂર- પ્રધ્વસ્તધ્વાંતશાંતપ્રવિતતમનસા ભાવિતા નાકિવૃંદૈ: ॥૧॥ લક્ષ્મીકાંત સમંતતો વિકલયન્નૈવેશિતુસ્તે સમં પશ્યામ્યુત્તમવસ્તુ દૂરતરતોઽપાસ્તં રસો યોઽષ્ટમ: । યદ્રોષોત્કરદક્ષનેત્રકુટિલપ્રાંતોત્થિતાગ્નિસ્ફુરત્- ખદ્યોતોપમવિસ્ફુલિંગભસિતા બ્રહ્મેશશક્રોત્કરા: ॥૨॥ ॥ ઇતિ શ્રીમદાનંદતીર્થભગવત્પાદાચાર્યવિરચિતા શ્રીનરસિંહનખસ્તુતિ:॥ ॥ અથ શ્રીહરિવાયુસ્તુતિ: ॥ શ્રીમદ્વિષ્ણ્વંઘ્રિનિષ્ઠાતિગુણગુરુતમશ્રીમદાનંદતીર્થ- ત્રૈલોક્યાચાર્યપાદોજ્જ્વલજલજલસત્પાંસવોઽસ્માન્ પુનંતુ । વાચાં યત્ર પ્રણેત્રી ત્રિભુવનમહિતા શારદા શારદેંદુ- જ્યોત્સ્નાભદ્રસ્મિતશ્રીધલિતકકુભા પ્રેમભારં બભાર ॥૧॥ ઉત્કંઠાકુંઠકોલાહલજવવિદિતાજસ્રસેવાનુવૃદ્ધ- પ્રાજ્ઞાત્મજ્ઞાનધૂતાંધતમસસુમનોમૌલિરત્નાવલીનામ્ । ભક્ત્યુદ્રેકાવગાઢપ્રઘટનસઘટાત્કારસંઘૃષ્યમાણ- પ્રાંતપ્રાગ્ર્યાંઘ્રિપીઠોત્થિતકનકરજ:પિંજરારંજિતાશા: ॥૨॥ જન્માધિવ્યાધ્યુપાધિપ્રતિહતિવિરહપ્રાપકાણાં ગુણાનાં અગ્ર્યાણામર્પકાણાં ચિરમુદિતચિદાનંદસંદોહદાનામ્ । એતેષામેષ દોષપ્રમુષિતમનસાં દ્વેષિણાં દૂષકાણાં દૈત્યાનામાર્તિમંધે તમસિ વિદધતાં સંસ્તવે નાસ્મિ શક્ત: ॥૩॥ અસ્યાવિષ્કર્તુકામં કલિમલકલુષેઽસ્મિન્ જને જ્ઞાનમાર્ગં વંદ્યં ચંદ્રેંદ્રરુદ્રદ્યુમણિફણિવયોનાયકાદ્યૈરિહાદ્ય । મધ્વાખ્યં મંત્રસિદ્ધં કિમુત કૃતવતો મારુતસ્યાવતારં પાતારં પારમેષ્ઠ્યં પદમપવિપદ: પ્રાપ્તુરાપન્નપુંસામ્ ॥૪॥ ઉદ્યદ્વિદ્યુત્પ્રચંડાં નિજરુચિનિકરવ્યાપ્તલોકાવકાશો બિભ્રદ્ભીમો ભુજે યોઽભ્યુદિતદિનકરાભાંગદાઢ્યપ્રકાંડે । વીર્યોદ્ધાર્યાં ગદાગ્ર્યામયમિહ સુમતિં વાયુદેવો વિદધ્યાત્ અધ્યાત્મજ્ઞાનનેતા યતિવરમહિતો ભૂમિભૂષામણિર્મે ॥૫॥ સંસારોત્તાપનિત્યોપશમદસદયસ્નેહહાસાંબુપૂર- પ્રોદ્યદ્વિદ્યાનવદ્યદ્યુતિમણિકિરણશ્રેણિસંપૂરિતાશ: । શ્રીવત્સાંકાધિવાસોચિતતરસરલ: શ્રીમદાનંદતીર્થ- ક્ષીરાંભોધિર્વિભિંદ્યાદ્ભવદનભિમતં ભૂરિ મે ભૂતિહેતુ: ॥૬॥ મૂર્ધન્યેષોંઽજલિર્મે દૃઢતરમિહ તે બધ્યતે બંધપાશ- ચ્છેત્રે દાત્રે સુખાનાં ભજતિ ભુવિ ભવિષ્યદ્વિધાત્રે દ્યુભર્ત્રે । અત્યંતં સંતતં ત્વં પ્રદિશ પદયુગે હંત સંતાપભાજાં અસ્માકં ભક્તિમેકાં ભગવત ઉત તે માધવસ્યાથ વાયો: ॥૭॥ સાભ્રોષ્ણાભીશુશુભ્રપ્રભમભય નભો ભૂરિભૂભૃદ્વિભૂતિ- ભ્રાજિષ્ણુર્ભૂર્ઋભૂણાં ભવનમપિ વિભોઽભેદિ બભ્રે બભૂવે । યેન ભ્રૂવિભ્રમસ્તે ભ્રમયતુ સુભૃશં બભ્રુવદ્દુર્ભૃતાશાન્ ભ્રાંતિર્ભેદાવભાસસ્ત્વિતિ ભયમભિભૂર્ભોક્ષ્યતો માયિભિક્ષૂન્ ॥૮॥ યેઽમું ભાવં ભજંતે સુરમુખસુજનારાધિતં તે તૃતીયં ભાસંતે ભાસુરૈસ્તે સહચરચલિતૈશ્ચામરૈશ્ચારુવેષા: । વૈકુંઠે કંઠલગ્નાસ્થિરશુચિવિલસત્કાંતિતારુણ્યલીલા- લાવણ્યાપૂર્ણકાંતાકુચભરસુલભાશ્લેષસંમોદસાંદ્રા: ॥૯॥ આનંદાન્ મંદમંદા દદતિ હિ મરુત: કુંદમંદારનંદ્યા- વર્તામોદાન્ દધાના મૃદુપદમુદિતોદ્ગીતકૈ: સુંદરીણામ્ । વૃંદૈરાવંદ્યમુક્તેંદ્વહિમગુમદનાહીંદ્રદેવેંદ્રસેવ્યે મૌકુંદે મંદિરેઽસ્મિન્નવિરતમુદયન્ મોદિનાં દેવદેવ ॥૧૦॥ ઉત્તપ્તાત્યુત્કટત્વિટ્પ્રકટકટકટધ્વાનસંઘટ્ટનોદ્યત્- વિદ્યુદ્વ્યૂઢસ્ફુલિંગપ્રકરવિકિરણોત્ક્વાથિતે બાધિતાંગાન્ । ઉદ્ગાઢં પાત્યમાના તમસિ તત ઇત: કિંકરૈ: પંકિલે તે પંક્તિર્ગ્રાવ્ણાં ગરિમ્ણા ગ્લપયતિ હિ ભવદ્દ્વેષિણો વિદ્વદાદ્ય ॥૧૧॥ અસ્મિન્નસ્મદ્ગુરૂણાં હરિચરણચિરધ્યાનસન્મંગલાનાં યુષ્માકં પાર્શ્વભૂમિં ધૃતરણરણિક: સ્વર્ગિસેવ્યાં પ્રપન્ન: । યસ્તૂદાસ્તે સ આસ્તેઽધિભવમસુલભક્લેશનિર્મોકમસ્ત- પ્રાયાનંદં કથંચિન્ન વસતિ સતતં પંચકષ્ટેઽતિકષ્ટે ॥૧૨॥ ક્ષુત્ક્ષામાન્ રૂક્ષરક્ષોરદખરનખરક્ષુણ્ણવિક્ષોભિતાક્ષાન્ આમગ્નાનંધકૂપે ક્ષુરમુખમુખરૈ: પક્ષિભિર્વિક્ષતાંગાન્ । પૂયાસૃઙ્મૂત્રવિષ્ઠાકૃમિકુલકલિલે તત્ક્ષણાક્ષિપ્તશક્ત્યા- દ્યસ્ત્રવ્રાતાર્દિતાંસ્ત્વદ્દ્વિષ ઉપજિહતે વજ્રકલ્પા જલૂકા: ॥૧૩॥ માતર્મે માતરિશ્વન્ પિતરતુલગુરો ભ્રાતરિષ્ટાપ્તબંધો સ્વામિન્ સર્વાંતરાત્મન્નજર જરયિતર્જન્મમૃત્યામયાનામ્ । ગોવિંદે દેહિ ભક્તિં ભવતિ ચ ભગવન્નૂર્જિતાં નિર્નિમિત્તાં નિર્વ્યાજાં નિશ્ચલાં સદ્ગુણગણબૃહતીં શાશ્વતીમાશુ દેવ ॥૧૪॥ વિષ્ણોરત્યુત્તમત્વાદખિલગુણગણૈસ્તત્ર ભક્તિં ગરિષ્ઠાં સંશ્લિષ્ટે શ્રીધરાભ્યામમુમથ પરિવારાત્મના સેવકેષુ । ય: સંધત્તે વિરિંચિશ્વસનવિહગપાનંતરુદ્રેંદ્રપૂર્વે- ષ્વાધ્યાયંસ્તારતમ્યં સ્ફુટમવતિ સદા વાયુરસ્મદ્ગુરુસ્તમ્ ॥૧૫॥ તત્ત્વજ્ઞાન્ મુક્તિભાજ: સુખયસિ હિ ગુરો યોગ્યતાતારતમ્યા- દાધત્સે મિશ્રબુદ્ધીંસ્ત્રિદિવનિરયભૂગોચરાન્ નિત્યબદ્ધાન્ । તામિસ્રાંધાદિકાખ્યે તમસિ સુબહુલં દુ:ખયસ્યન્યથાજ્ઞાન્ વિષ્ણોરાજ્ઞાભિરિત્થં શ્રુતિશતમિતિહાસાદિ ચાઽકર્ણયામ: ॥૧૬॥ વંદેઽહં તં હનૂમાનિતિ મહિતમહાપૌરુષો બાહુશાલી ખ્યાતસ્તેઽગ્ર્યોઽવતાર: સહિત ઇહ બહુબ્રહ્મચર્યાદિધર્મૈ: । સસ્નેહાનાં સહસ્વાનહરહરહિતં નિર્દહન્ દેહભાજાં અંહોમોહાપહો ય: સ્પૃહયતિ મહતીં ભક્તિમદ્યાપિ રામે ॥૧૭॥ પ્રાક્પંચાશત્સહસ્રૈર્વ્યવહિતમમિતં યોજનૈ: પર્વતં ત્વં યાવત્સંજીવનાદ્યૌષધનિધિમધિક પ્રાણ લંકામનૈષી: । અદ્રાક્ષીદુત્પતંતં તત ઉત ગિરિમુત્પાટયંતં ગૃહીત્વાઽઽ- યાંતં ખે રાઘવાંઘ્રૌ પ્રણતમપિ તદૈકક્ષણે ત્વાં હિ લોક: ॥૧૮॥ ક્ષિપ્ત: પશ્ચાત્ સલીલં શતમતુલમતે યોજનાનાં સ ઉચ્ચઃ તાવદ્વિસ્તારવાંશ્ચાપ્યુપલલવ ઇવ વ્યગ્રબુધ્દ્યા ત્વયાઽત: । સ્વસ્વસ્થાનસ્થિતાતિસ્થિરશકલશિલાજાલસંશ્લેષનષ્ટ- ચ્છેદાંક: પ્રાગિવાભૂત્ કપિવરવપુષસ્તે નમ: કૌશલાય ॥૧૯॥ દૃષ્ટ્વા દુષ્ટાધિપોર: સ્ફુટિતકનકસદ્વર્મઘૃષ્ટાસ્થિકૂટં નિષ્પિષ્ટં હાટકાદ્રિપ્રકટતટતટાકાતિશંકો જનોઽભૂત્ । યેનાઽજૌ રાવણારિપ્રિયનટનપટુર્મુષ્ટિરિષ્ટં પ્રદેષ્ટું કિં નેષ્ટે મે સ તેઽષ્ટાપદકટકતટિત્કોટિભામૃષ્ટકાષ્ઠ: ॥૨૦॥ દેવ્યાદેશપ્રણીતિદ્રુહિણહરવરાવધ્યરક્ષોવિઘાતા- દ્યાસેવ્યોદ્યદ્દયાર્દ્ર: સહભુજમકરોદ્રામનામા મુકુંદ: । દુષ્પ્રાપે પારમેષ્ઠ્યે કરતલમતુલં મૂર્ધ્નિ વિન્યસ્ય ધન્યં તન્વન્ ભૂય: પ્રભૂતપ્રણયવિકસિતાબ્જેક્ષણસ્ત્વેક્ષમાણ: ॥૨૧॥ જઘ્ને નિઘ્નેન વિઘ્નો બહુલબલબકધ્વંસનાદ્યેન શોચત્ વિપ્રાનુક્રોશપાશૈરસુવિધૃતિસુખસ્યૈકચક્રાજનાનામ્ । તસ્મૈ તે દેવ કુર્મ: કુરુકુલપતયે કર્મણા ચ પ્રણામાન્ કિર્મીરં દુર્મતીનાં પ્રથમમથ ચ યો નર્મણા નિર્મમાથ ॥૨૨॥ નિર્મૃદ્નન્નત્યયત્નં વિજરવર જરાસંધકાયાસ્થિસંધીન્ યુદ્ધે ત્વં સ્વધ્વરે વા પશુમિવ દમયન્ વિષ્ણુપક્ષદ્વિડીશમ્ । યાવત્ પ્રત્યક્ષભૂતં નિખિલમખભુજં તર્પયામાસિથાસૌ તાવત્યાઽયોજિ તૃપ્ત્યા કિમુ વદ ભગવન્ રાજસૂયાશ્વમેધે ॥૨૩॥ ક્ષ્વેલાક્ષીણાટ્ટહાસં તવ રણમરિહન્નુદ્ગદોદ્દામબાહો બહ્વક્ષૌહિણ્યનીકક્ષપણસુનિપુણં યસ્ય સર્વોત્તમસ્ય । શુશ્રૂષાર્થં ચકર્થ સ્વયમયમથ સંવક્તુમાનંદતીર્થ- શ્રીમન્નામન્ સમર્થસ્ત્વમપિ હિ યુવયો: પાદપદ્મં પ્રપદ્યે ॥૨૪॥ દ્રુહ્યંતીં હૃદ્રુહં માં દ્રુતમનિલબલાદ્દ્રાવયંતીમવિદ્યા- નિદ્રાં વિદ્રાવ્ય સદ્યોરચનપટુમથાઽપાદ્ય વિદ્યાસમુદ્ર । વાગ્દેવી સા સુવિદ્યાદ્રવિણદવિદિતા દ્રૌપદી રુદ્રપત્ન્યાત્ દ્યુદ્રિક્તા દ્રાગભદ્રાદ્રહયતુ દયિતા પૂર્વભીમાજ્ઞયા તે ॥૨૫॥ યાભ્યાં શુશ્રૂષુરાસી: કુરુકુલજનને ક્ષત્રવિપ્રોદિતાભ્યાં બ્રહ્મભ્યાં બૃંહિતાભ્યાં ચિતિસુખવપુષા કૃષ્ણનામાસ્પદાભ્યામ્ । નિર્ભેદાભ્યાં વિશેષાદ્દ્વિવચનવિષયાભ્યામુભાભ્યામમૂભ્યાં તુભ્યં ચ ક્ષેમદેભ્ય: સરસિજવિલસલ્લોચનેભ્યો નમોઽસ્તુ ॥૨૬॥ ગચ્છન્ સૌગંધિકાર્થં પથિ સ હનુમત: પુચ્છમચ્છસ્ય ભીમ: પ્રોદ્ધર્તું નાશકત્ સ ત્વમુમુરુવપુષા ભીષયામાસ ચેતિ । પૂર્ણજ્ઞાનૌજસોસ્તે ગુરુતમવપુષો: શ્રીમદાનંદતીર્થ ક્રીડામાત્રં તદેતત્પ્રમદદ સુધિયાં મોહક દ્વેષભાજામ્ ॥૨૭॥ બહ્વી: કોટીરટીક: કુટિલકટુમતીનુત્કટાટોપકોપાન્ દ્રાક્ ચ ત્વં સત્વરત્વાચ્છરણદ ગદયા પોથયામાસિથારીન્ । ઉન્મથ્યાતથ્યમિથ્યાત્વવચનવચનાનુત્પથસ્થાંસ્તથાઽન્યાન્ પ્રાયચ્છ: સ્વપ્રિયાયૈ પ્રિયતમ કુસુમં પ્રાણ તસ્મૈ નમસ્તે ॥૨૮॥ દેહાદુત્ક્રામિતાનામધિપતિરસતામક્રમાદ્વક્રબુદ્ધિ: ક્રુદ્ધ: ક્રોધૈકવશ્ય: કૃમિરિવ મણિમાન્ દુષ્કૃતી નિષ્ક્રિયાર્થમ્ । ચક્રે ભૂચક્રમેત્ય ક્રકચમિવ સતાં ચેતસ: કષ્ટશાસ્ત્રં દુસ્તર્કં ચક્રપાણેર્ગુણગણવિરહં જીવતાં ચાધિકૃત્ય ॥૨૯॥ તદ્દુષ્પ્રેક્ષાનુસારાત્ કતિપયકુનરૈરાદૃતોઽન્યૈર્વિસૃષ્ટો બ્રહ્માઽહં નિર્ગુણોઽહં વિતથમિદમિતિ હ્યેષ પાષંડવાદ: । તદ્યુક્ત્યાભાસજાલપ્રસરવિષતરૂદ્દાહદક્ષપ્રમાણ- જ્વાલામાલાધરોઽગ્નિ: પવન વિજયતે તેઽવતારસ્તૃતીય: ॥૩૦॥ આક્રોશંતો નિરાશા ભયભરવિવશસ્વાશયાશ્છિન્નદર્પા વાશંતો દેશનાશસ્ત્વિતિ બત કુધિયાં નાશમાશાદશાશુ । ધાવંતોઽશ્લીલશીલા વિતથશપથશાપાશિવા: શાંતશૌર્યાઃ ત્વદ્વ્યાખ્યાસિંહનાદે સપદિ દદૃશિરે માયિગોમાયવસ્તે ॥૩૧॥ ત્રિષ્વપ્યેવાવતારેષ્વરિભિરપઘૃણં હિંસિતો નિર્વિકાર: સર્વજ્ઞ: સર્વશક્તિ: સકલગુણગણાપૂર્ણરૂપપ્રગલ્ભ: । સ્વચ્છ: સ્વચ્છંદમૃત્યુ: સુખયસિ સુજનં દેવ કિં ચિત્રમત્ર ત્રાતા યસ્ય ત્રિધામા જગદુત વશગં કિંકરા: શંકરાદ્યા: ॥૩૨॥ ઉદ્યન્મંદસ્મિતશ્રીમૃદુમધુમધુરાલાપપીયૂષધારા- પૂરાસેકોપશાંતાસુખસુજનમનોલોચનાપીયમાનમ્ । સંદ્રક્ષ્યે સુંદરં સંદુહદિહ મહદાનંદમાનંદતીર્થ શ્રીમદ્વક્ત્રેંદુબિંબં દુરિતનુદુદિતં નિત્યદાઽહં કદા નુ ॥૩૩॥ પ્રાચીનાચીર્ણપુણ્યોચ્ચયચતુરતરાચારતશ્ચારુચિત્તાન્ અત્યુચ્ચાં રોચયંતીં શ્રુતિચિતવચનાંછ્રાવકાંશ્ચોદ્યચંચૂન્ । વ્યાખ્યામુત્ખાતદુ:ખાં ચિરમુચિતમહાચાર્ય ચિંતારતાંસ્તે ચિત્રાં સચ્છાસ્ત્રકર્તશ્ચરણપરિચરાન્ શ્રાવયાસ્માંશ્ચ કિંચિત્ ॥૩૪॥ પીઠે રત્નોપક્લૃપ્તે રુચિરરુચિમણિજ્યોતિષા સન્નિષણ્ણં બ્રહ્માણં ભાવિનં ત્વાં જ્વલતિ નિજપદે વૈદિકાદ્યા હિ વિદ્યા: । સેવંતે મૂર્તિમત્ય: સુચરિત ચરિતં ભાતિ ગંધર્વગીતં પ્રત્યેકં દેવસંસત્સ્વપિ તવ ભગવન્ નર્તિતદ્યોવધૂષુ ॥૩૫॥ સાનુક્રોશૈરજસ્રં જનિમૃતિનિરયાદ્યૂર્મિમાલાવિલેઽસ્મિન્ સંસારાબ્ધૌ નિમગ્નાન્ શરણમશરણાનિચ્છતો વીક્ષ્ય જંતૂન્ । યુષ્માભિ: પ્રાર્થિત: સન્ જલનિધિશયન: સત્યવત્યાં મહર્ષેઃ વ્યક્તશ્ચિન્માત્રમૂર્તિર્ન ખલુ ભગવત: પ્રાકૃતો જાતુ દેહ: ॥૩૬॥ અસ્તવ્યસ્તં સમસ્તશ્રુતિગતમધમૈ રત્નપૂગં યથાંઽધૈઃ અર્થં લોકોપકૃત્યૈ ગુણગણણનિલય: સૂત્રયામાસ કૃત્સ્નમ્ । યોઽસૌ વ્યાસાભિધાનસ્તમહમહરહર્ભક્તિતસ્ત્વત્પ્રસાદાત્ સદ્યો વિદ્યોપલબ્ધ્યૈ ગુરુતમમગુરું દેવદેવં નમામિ ॥૩૭॥ આજ્ઞામન્યૈરધાર્યાં શિરસિ પરિસરદ્રશ્મિકોટીરકોટૌ કૃષ્ણસ્યાક્લિષ્ટકર્મા દધદનુસરણાદર્થિતો દેવસંઘૈ: । ભૂમાવાગત્ય ભૂમન્નસુકરમકરોબ્રહ્મસૂત્રસ્ય ભાષ્યં દુર્ભાષ્યં વ્યસ્ય દસ્યોર્મણિમત ઉદિતં વેદ સદ્યુક્તિભિસ્ત્વમ્ ॥૩૮॥ ભૂત્વા ક્ષેત્રે વિશુદ્ધે દ્વિજગણનિલયે રૂપ્યપીઠાભિધાને તત્રાપિ બ્રહ્મજાતિસ્ત્રિભુવનવિશદે મધ્યગેહાખ્યગેહે । પારિવ્રાજ્યાધિરાજ: પુનરપિ બદરીં પ્રાપ્ય કૃષ્ણં ચ નત્વા કૃત્વા ભાષ્યાણિ સમ્યગ્ વ્યતનુત ચ ભવાન્ ભારતાર્થપ્રકાશમ્ ॥૩૯॥ વંદે તં ત્વા સુપૂર્ણપ્રમતિમનુદિનાસેવિતં દેવવૃંદૈઃ વંદે વંદારુમીશે શ્રિય ઉત નિયતં શ્રીમદાનંદતીર્થમ્ । વંદે મંદાકિનીસત્સરિદમલજલાસેકસાધિક્યસંગં વંદેઽહં દેવ ભક્ત્યા ભવભયદહનં સજ્જનાન્મોદયંતમ્ ॥૪૦॥ સુબ્રહ્મણ્યાખ્યસૂરે: સુત ઇતિ સુભૃશં કેશવાનંદતીર્થ- શ્રીમત્પાદાબ્જભક્ત: સ્તુતિમકૃત હરેર્વાયુદેવસ્ય ચાસ્ય । તત્પાદાર્ચાદરેણ ગ્રથિતપદલસન્માલયા ત્વેતયા યે સંરાધ્યામૂ નમંતિ પ્રતતમતિગુણા મુક્તિમેતે વ્રજંતિ ॥૪૧॥ પાંત્વસ્માન્ પુરુહૂતવૈરિબલવન્માતંગમાદ્યદ્ઘટા- કુંભોચ્ચાદ્રિવિપાટનાધિકપટુપ્રત્યેકવજ્રાયિતા: । શ્રીમત્કંઠીરવાસ્ય પ્રતતસુનખરા દારિતારાતિદૂર- પ્રધ્વસ્તધ્વાંતશાંતપ્રવિતતમનસા ભાવિતા નાકિવૃંદૈ: ॥૧॥ લક્ષ્મીકાંત સમંતતો વિકલયન્નૈવેશિતુસ્તે સમં પશ્યામ્યુત્તમવસ્તુ દૂરતરતોઽપાસ્તં રસો યોઽષ્ટમ: । યદ્રોષોત્કરદક્ષનેત્રકુટિલપ્રાંતોત્થિતાગ્નિસ્ફુરત્- ખદ્યોતોપમવિસ્ફુલિંગભસિતા બ્રહ્મેશશક્રોત્કરા: ॥૨॥ ॥ ઇતિ શ્રીત્રિવિક્રમપંડિતાચાર્યવિરચિતા શ્રીહરિવાયુસ્તુતિ: ॥