శ్రీతులసీమాహాత్మ్యమ్
అథ శ్రీతులసీమాహాత్మ్యమ్
పాపాని యాని రవిసూనుపటస్థితాని
గోబ్రహ్మబాలపితృమాతృవధాదికాని । 
నశ్యంతి తాని తులసీవనదర్శనేన
గోకోటిదానసదృశం ఫలమాప్నువంతి	।।౧।।
పుష్కరాద్యాని తీర్థాని గంగాద్యా: సరితస్తథా । 
వాసుదేవాదయో దేవా వసంతి తులసీవనే	।।౨।।
తులసీకాననం యత్ర యత్ర పద్మవనాని చ ।
వసంతి వైష్ణవా యత్ర తత్ర సన్నిహితో హరి: ।।౩।।
యన్మూలే సర్వతీర్థాని యన్మధ్యే సర్వదేవతా: ।
యదగ్రే సర్వవేదాశ్చ తులసి త్వాం నమామ్యహమ్	।।౪।।
తులసి శ్రీసఖి శుభే పాపహారిణి పుణ్యదే । 
నమస్తే నారదనుతే నారాయణమన:ప్రియే	।।౫।।
రాజద్వారే సభామధ్యే సంగ్రామే శత్రుపీడనే । 
తులసీస్మరణం కుర్యాత్ సర్వత్ర విజయీ భవేత్	।।౬।।
తులస్యమృతజన్మాఽసి సదా త్వం కేశవప్రియే । 
కేశవార్థే చినోమి త్వాం వరదా భవ శోభనే	।।౭।।
మోక్షైకహేతోర్ధరణీధరస్య 
విష్ణో: సమస్తస్య గురో: ప్రియస్య ।
ఆరాధనార్థం పురుషోత్తమస్య 
ఛిందే దలం తే తులసి క్షమస్వ	।।౮।।
కృష్యారంభే తథా పుణ్యే వివాహే చార్థసంగ్రహే ।
సర్వకార్యేషు సిద్ధ్యర్థం ప్రస్థానే తులసీం స్మరేత్ 	।।౯।।
య: స్మరేత్ తులసీం సీతాం రామం సౌమిత్రిణా సహ ।
వినిర్జిత్య రిపూన్ సర్వాన్ పునరాయాతి కార్యకృత్	।।౧౦।।
యా దృష్టా నిఖిలాఘసంఘశమనీ స్పృష్టా వపు: పావనీ
రోగాణామభివందితా నిరసనీ సిక్తాంఽతకత్రాసినీ ।
ప్రత్యాసత్తివిధాయినీ భగవత: కృష్ణస్య సంరోపితా
న్యస్తా తచ్చరణే విముక్తిఫలదా తస్యై తులస్యై నమ:	।।౧౧।।
ఖాదన్ మాంసం పిబన్ మద్యం సంగచ్ఛన్నంత్యజాదిభి: ।
సద్యో భవతి పూతాత్మా కర్ణయోస్తులసీం ధరన్	।।౧౨।।
చతు: కర్ణే ముఖే చైకం నాభావేకం తథైవ చ ।
శిరస్యేకం తథా ప్రోక్తం తీర్థే త్రయముదాహృతమ్	।।౧౩।।
అన్నోపరి తథా పంచ భోజనాంతే దలత్రయమ్ । 
ఏవం శ్రీతులసీ గ్రాహ్యా అష్టాదశదలా సదా 	।।౧౪।।
।। ఇతి శ్రీతులసీమాహాత్మ్యమ్ ।।