श्रीतुलसीमाहात्म्यम्
अथ श्रीतुलसीमाहात्म्यम्
पापानि यानि रविसूनुपटस्थितानि
गोब्रह्मबालपितृमातृवधादिकानि । 
नश्यंति तानि तुलसीवनदर्शनेन
गोकोटिदानसदृशं फलमाप्नुवंति	।।१।।
पुष्कराद्यानि तीर्थानि गंगाद्या: सरितस्तथा । 
वासुदेवादयो देवा वसंति तुलसीवने	।।२।।
तुलसीकाननं यत्र यत्र पद्मवनानि च ।
वसंति वैष्णवा यत्र तत्र सन्निहितो हरि: ।।३।।
यन्मूले सर्वतीर्थानि यन्मध्ये सर्वदेवता: ।
यदग्रे सर्ववेदाश्च तुलसि त्वां नमाम्यहम्	।।४।।
तुलसि श्रीसखि शुभे पापहारिणि पुण्यदे । 
नमस्ते नारदनुते नारायणमन:प्रिये	।।५।।
राजद्वारे सभामध्ये संग्रामे शत्रुपीडने । 
तुलसीस्मरणं कुर्यात् सर्वत्र विजयी भवेत्	।।६।।
तुलस्यमृतजन्माऽसि सदा त्वं केशवप्रिये । 
केशवार्थे चिनोमि त्वां वरदा भव शोभने	।।७।।
मोक्षैकहेतोर्धरणीधरस्य 
विष्णो: समस्तस्य गुरो: प्रियस्य ।
आराधनार्थं पुरुषोत्तमस्य 
छिंदे दलं ते तुलसि क्षमस्व	।।८।।
कृष्यारंभे तथा पुण्ये विवाहे चार्थसंग्रहे ।
सर्वकार्येषु सिद्ध्यर्थं प्रस्थाने तुलसीं स्मरेत् 	।।९।।
य: स्मरेत् तुलसीं सीतां रामं सौमित्रिणा सह ।
विनिर्जित्य रिपून् सर्वान् पुनरायाति कार्यकृत्	।।१०।।
या दृष्टा निखिलाघसंघशमनी स्पृष्टा वपु: पावनी
रोगाणामभिवंदिता निरसनी सिक्तांऽतकत्रासिनी ।
प्रत्यासत्तिविधायिनी भगवत: कृष्णस्य संरोपिता
न्यस्ता तच्चरणे विमुक्तिफलदा तस्यै तुलस्यै नम:	।।११।।
खादन् मांसं पिबन् मद्यं संगच्छन्नंत्यजादिभि: ।
सद्यो भवति पूतात्मा कर्णयोस्तुलसीं धरन्	।।१२।।
चतु: कर्णे मुखे चैकं नाभावेकं तथैव च ।
शिरस्येकं तथा प्रोक्तं तीर्थे त्रयमुदाहृतम्	।।१३।।
अन्नोपरि तथा पंच भोजनांते दलत्रयम् । 
एवं श्रीतुलसी ग्राह्या अष्टादशदला सदा 	।।१४।।
।। इति श्रीतुलसीमाहात्म्यम् ।।