ஸுந்த³ரகாண்ட³ம்
ராமாய ஶாஶ்வதஸுவிஸ்த்ருʼதஷட்³கு³ணாய 
 ஸர்வேஶ்வராய ப³லவீர்யமஹார்ணவாய | 
நத்வா லிலங்க⁴யிஷுரர்ணவமுத்பபாத
 நிஷ்பீட்³ய தம்ʼ கி³ரிவரம்ʼ பவனஸ்ய ஸூனு: || 1|| 
சுக்ஷோப⁴வாரிதி⁴ரனுப்ரயயௌ ச ஶீக்⁴ரம்ʼ 
 யாதோ³க³ணை: ஸஹ ததீ³யப³லாபி⁴க்ருʼஷ்ட: | 
வ்ருʼக்ஷாஶ்ச பர்வதக³தா: பவனேன பூர்வம்ʼ
 க்ஷிப்தோர்ணவே கி³ரிருதா³க³மத³ஸ்ய ஹேதோ: || 2|| 
ஶ்யாலோ ஹரஸ்ய கி³ரிபக்ஷவிநாஶகாலே
 க்ஷிப்தோர்ணவே ஸ மருதோர்வரிதாத்மபக்ஷ: | 
ஹைமோ கி³ரி: பவனஜஸ்ய து விஶ்ரமார்த²-
 முத்³பி⁴த்³ய வாரிதி⁴மவர்த⁴த³னேகஸானு: || 3|| 
நைவாத்ர விஶ்ரமணமைச்ச²த³விஶ்ரமோऽஸௌ
 நிஸ்ஸீமபௌருஷப³லஸ்ய குத: ஶ்ரமோऽஸ்ய | 
ஆஶ்லிஷ்ய பர்வதவரம்ʼ ஸ த³த³ர்ஶ க³ச்ச²ன் 
 தே³வைஸ்து நாக³ஜனனீம்ʼ ப்ரஹிதாம்ʼ வரேண || 4|| 
ஜிக்ஞாஸுபி⁴ர்னிஜப³லம்ʼ தவ ப⁴க்ஷமேது
 யத்³யத்த்வமிச்ச²ஸி ததி³த்யமரோதி³தாயா: | 
ஆஸ்யம்ʼ ப்ரவிஶ்ய ஸபதி³ ப்ரவினி:ஸ்ருʼதோऽஸ்மாத் 
 தே³வானனந்த³யது³த ஸ்வ்ருʼதமேஷு ரக்ஷன் || 5|| 
த்³ருʼஷ்ட்வா ஸுரப்ரணயிதாம்ʼ ப³லமஸ்ய சோக்³ரம்ʼ 
 தே³வா: ப்ரதுஷ்டுவுரமும்ʼ ஸுமனோऽபி⁴வ்ருʼஷ்ட்யா | 
தைராத்³ருʼத: புனரஸௌ வியதைவ க³ச்ச²ன்
 சா²யாக்³ரஹம்ʼ ப்ரதித³த³ர்ஶ ச ஸிம்ʼஹிகாக்²யம் || 6|| 
லங்காவனாய ஸகலஸ்ய ச நிக்³ரஹேऽஸ்யா:
 ஸாமர்த்²யமப்ரதிஹதம்ʼ ப்ரத³தௌ³ விதா⁴தா | 
சா²யாமவாக்ஷிபத³ஸௌ பவனாத்மஜஸ்ய 
 ஸோऽஸ்யா: ஶரீரமனுவிஶ்ய பி³பே⁴த³ சாஶு || 7|| 
நி:ஸீமமாத்மப³லமித்யனுத³ர்ஶயானோ 
 ஹத்வைவ தாமபி விதா⁴த்ருʼவராபி⁴கு³ப்தாம் | 
லம்பே³ ஸ லம்ப³ஶிக²ரே நிபபாத லங்கா- 
 ப்ராகாரரூபககி³ராவத² ஸஞ்சுகோச || 8|| 
பூ⁴த்வா பி³டா³லஸமிதோ நிஶி தாம்ʼ புரீம்ʼ ச
 ப்ராப்ஸ்யன் த³த³ர்ஶ நிஜரூபவதீம்ʼ ஸ லங்காம் | 
ருத்³தோ⁴ऽநயாऽஶ்வத² விஜித்ய ச தாம்ʼ ஸ்வமுஷ்டி-
 பிஷ்டாம்ʼ தயாऽநுமத ஏவ விவேஶ லங்காம் || 9|| 
மார்க³மாணோ ப³ஹிஶ்சாந்த: ஸோऽஶோகவனிகாதலே | 
த³த³ர்ஶ ஶிம்ʼஶுபாவ்ருʼக்ஷமூலஸ்தி²தரமாக்ருʼதிம் || 10|| 
நரலோகவிட³ம்ப³ஸ்ய ஜானன் ராமஸ்ய ஹ்ருʼத்³க³தம் | 
தஸ்ய சேஷ்டானுஸாரேண க்ருʼத்வா சேஷ்டாஶ்ச ஸம்ʼவித³ம் || 11|| 
தாத்³ருʼக்சேஷ்டாஸமேதாயா அங்கு³லீயமதா³த்தத: | 
ஸீதாயா யானி சைவாஸன்னாக்ருʼதேஸ்தானி ஸர்வஶ: || 12|| 
பூ⁴ஷணானி த்³விதா⁴ பூ⁴த்வா தான்யேவாஸம் ̐ஸ்ததை²வ ச | 
அத² சூடா³மணிம்ʼ தி³வ்யம்ʼ தா³தும்ʼ ராமாய ஸா த³தௌ³ || 13|| 
யத்³யப்யேதந்ந பஶ்யந்தி நிஶாசரக³ணாஸ்து தே | 
த்³யுலோகசாரிண: ஸர்வே பஶ்யந்த்ய்ருʼஷய ஏவ ச || 14|| 
தேஷாம்ʼ விட³ம்ப³னாயைவ தை³த்யானாம்ʼ வஞ்சனாய ச | 
பஶ்யதாம்ʼ கலிமுக்²யானாம்ʼ விட³ம்போ³ऽயம்ʼ க்ருʼதோ ப⁴வேத் || 15|| 
க்ருʼத்வா கார்யமித³ம்ʼ ஸர்வம்ʼ விஶங்க: பவனாத்மஜ: | 
ஆத்மாவிஷ்கரணே சித்தம்ʼ சக்ரே மதிமதாம்ʼ வர: || 16|| 
அத² வனமகி²லம்ʼ தத்³ராவணஸ்யாவலும்ப்ய 
 க்ஷிதிருஹமிமமேகம்ʼ வர்ஜயித்வாऽऽஶு வீர: | 
ரஜனிசரவிநாஶம்ʼ காங்க்ஷமாணோऽதிவேலம்ʼ 
 முஹுரதிரவனாதீ³ தோரணம்ʼ சாருரோஹ || 17|| 
அதா²ஶ்ருʼணோத்³த³ஶானன: கபீந்த்³ரசேஷ்டிதம்ʼ பரம் | 
தி³தே³ஶ கிங்கரான் ப³ஹூன் கபிர்நிக்³ருʼஹ்யதாமிதி || 18|| 
ஸமஸ்தஶோ விம்ருʼத்யவோ வராத்³த⁴ரஸ்ய கிங்கரா: | 
ஸமாஸத³ன் மஹாப³லம்ʼ ஸுராந்தராத்மனோऽங்க³ஜம் || 19|| 
அஶீதிகோடியூத²பம்ʼ புரஸ்ஸராஷ்டகாயுதம் | 
அனேகஹேதிஸங்குலம்ʼ கபீந்த்³ரமாவ்ருʼணோத்³ப³லம் || 20|| 
ஸமாவ்ருʼதஸ்ததா²ऽயுதை⁴: ஸ தாடி³தைஶ்ச தைர்ப்⁴ருʼஶம் | 
சகார தான் ஸமஸ்தஶஸ்தலப்ரஹாரசூர்ணிதான் || 21|| 
புனஶ்ச மந்த்ரிபுத்ரகான் ஸ ராவணப்ரசோதி³தான் | 
மமர்த³ ஸப்தபர்வதப்ரபா⁴ன் வராபி⁴ரக்ஷிதான் || 22|| 
ப³லாக்³ரகா³மினஸ்ததா² ஸ ஶர்வவாக்ஸுக³ர்விதான் | 
நிஹத்ய ஸர்வரக்ஷஸாம்ʼ த்ருʼதீயபா⁴க³மக்ஷிணோத் || 23|| 
அனௌபமம்ʼ ஹரேர்ப³லம்ʼ நிஶம்ய ராக்ஷஸாதி⁴ப: | 
குமாரமக்ஷமாத்மன: ஸமம்ʼ ஸுதம்ʼ ந்யயோஜயத் || 24|| 
ஸ ஸர்வலோகஸாக்ஷிண: ஸுதம்ʼ ஶரைர்வவர்ஷ ஹ | 
ஶிதைர்வராஸ்த்ரமந்த்ரிதைர்ந சைனமப்⁴யசாலயத் || 25|| 
ஸ மண்ட³மத்⁴யகா³ஸுதம்ʼ ஸமீக்ஷ்ய ராவணோபமம் | 
த்ருʼதீய ஏஷ சாம்ʼஶகோ ப³லஸ்ய ஹீத்யசிந்தயத் || 26|| 
நிதா⁴ர்ய ஏவ ராவண: ஸ ராக⁴வாய நான்யதா² | 
யதீ³ந்த்³ரஜின்மயா ஹதோ ந சாஸ்ய ஶக்திரீக்ஷ்யதே || 27|| 
அதஸ்தயோ: ஸமோ மயா த்ருʼதீய ஏஷ ஹன்யதே | 
விசார்ய சைவமாஶு தம்ʼ பதோ³: ப்ரக்³ருʼஹ்ய புப்லுவே || 28|| 
ஸ சக்ரவத்³ப்⁴ரமாதுரம்ʼ விதா⁴ய ராவணாத்மஜம் | 
அபோத²யத்³த⁴ராதலே க்ஷணேன மாருதீதனு: || 29|| 
விசூர்ணிதே த⁴ராதலே நிஜே ஸுதே ஸ ராவண: | 
நிஶம்ய ஶோகதாபிதஸ்தத³க்³ரஜம்ʼ ஸமாதி³ஶத் || 30|| 
அதே²ந்த்³ரஜின்மஹாஶரைர்வராஸ்த்ரஸம்ப்ரயோஜிதை: | 
ததக்ஷ வானரோத்தமம்ʼ ந சாஶகத்³விசாலனே || 31|| 
அதா²ஸ்த்ரமுத்தமம்ʼ விதே⁴ர்யுயோஜ ஸர்வது³:ஸஹம் | 
ஸ தேன தாடி³தோ ஹரிர்வ்யசிந்தயன்நிராகுல: || 32|| 
மயா வரா விலங்கி⁴தா ஹ்யனேகஶ: ஸ்வயம்பு⁴வ:| 
ஸ மானனீய ஏவ மே ததோऽத்ரமானயாம்யஹம் || 33|| 
இமே ச குர்யுரத்ர கிம்ʼ ப்ரஹ்ருʼஷ்டரக்ஷஸாம்ʼ க³ணா: | 
இதீஹ லக்ஷ்யமேவ மே ஸராவணஶ்ச த்³ருʼஶ்யதே || 34|| 
இத³ம்ʼ ஸமீக்ஷ்ய ப³த்³த⁴வத் ஸ்தி²தம்ʼ கபீந்த்³ரமாஶு தே | 
ப³ப³ந்து⁴ரன்யபாஶகைர்ஜகா³ம சாஸ்த்ரமஸ்ய தத் || 35|| 
அத² ப்ரக்³ருʼஹ்ய தம்ʼ கபிம்ʼ ஸமீபமானயம்ʼஶ்ச தே | 
நிஶாசரேஶ்வரஸ்ய தம்ʼ ஸ ப்ருʼஷ்டவாம்ʼஶ்ச ராவண: || 36|| 
கபே குதோऽஸி கஸ்ய வா கிமர்த²மீத்³ருʼஶம்ʼ க்ருʼதம் | 
இதீரித: ஸ சாவத³த் ப்ரணம்ய ராமமீஶ்வரம் || 37|| 
அவைஹி தூ³தமாக³தம்ʼ து³ரந்தவிக்ரமஸ்ய மாம் | 
ரகூ⁴த்தமஸ்ய மாருதிம்ʼ குலக்ஷயே தவேஶ்வரம் || 38|| 
ந சேத் ப்ரதா³ஸ்யஸி த்வரன் ரகூ⁴த்தமப்ரியாம்ʼ ததா³ | 
ஸபுத்ரமித்ரபா³ந்த⁴வோ விநாஶமாஶு யாஸ்யஸி || 39|| 
ந ராமபா³ணதா⁴ரணே க்ஷமா: ஸுரேஶ்வரா அபி | 
விரிஞ்சஶர்வபூர்வகா: கிமு த்வமல்பஸாரக: || 40|| 
ப்ரகோபிதஸ்ய தஸ்ய க: புர: ஸ்தி²தௌ க்ஷமோ ப⁴வேத் | 
ஸுராஸுரோரகா³தி³கே ஜக³த்யசிந்த்யகர்மண: || 41|| 
இதீரிதே வதோ⁴த்³யதம்ʼ ந்யவாரயத்³விபீ⁴ஷண: | 
ஸ புச்ச²தா³ஹகர்மணி ந்யயோஜயன்நிஶாசரான் || 42|| 
அதா²ஸ்ய வஸ்த்ரஸஞ்சயை: பிதா⁴ய புச்ச²மக்³னயே | 
த³து³ர்த³தா³ஹ நாஸ்ய தன்மருத்ஸகோ² ஹுதாஶன: || 43|| 
மமர்ஷ ஸர்வசேஷ்டிதம்ʼ ஸ ரக்ஷஸாம்ʼ நிராமய:| 
ப³லோத்³த⁴தஶ்ச கௌதுகாத் ப்ரத³க்³து⁴மேவ தாம்ʼ புரீம் || 44|| 
த³தா³ஹ சாகி²லாம்ʼ புரீம்ʼ ஸ்வபுச்ச²கே³ன வஹ்னினா | 
க்ருʼதிஸ்து விஶ்வகர்மணோऽப்யத³ஹ்யதாஸ்ய தேஜஸா || 45|| 
ஸுவர்ணரத்னகாரிதாம்ʼ ஸ ராக்ஷஸோத்தமை: ஸஹ | 
ப்ரத³ஹ்ய ஸர்வத: புரீம்ʼ முதா³ன்விதோ ஜக³ர்ஜ ச || 46|| 
ஸ ராவணம்ʼ ஸபுத்ரகம்ʼ த்ருʼணோபமம்ʼ விதா⁴ய ச | 
தயோ: ப்ரபஶ்யதோ: புரீம்ʼ விதா⁴ய ப⁴ஸ்மஸாத்³யயௌ || 47|| 
விலங்க்⁴ய சார்ணவம்ʼ புன: ஸ்வஜாதிபி⁴: ப்ரபூஜித: | 
ப்ரப⁴க்ஷ்ய வானரேஶிதுர்மது⁴ ப்ரபு⁴ம்ʼ ஸமேயிவான் || 48|| 
ராமம்ʼ ஸுரேஶ்வரமக³ண்யகு³ணாபி⁴ராமம்ʼ
 ஸம்ப்ராப்ய ஸர்வகபிவீரவரை: ஸமேத: | 
சூடா³மணிம்ʼ பவனஜ: பத³யோர்நிதா⁴ய
 ஸர்வாங்க³கை: ப்ரணதிமஸ்ய சகார ப⁴க்த்யா || 49|| 
ராமோऽபி நான்யத³னுதா³துமமுஷ்ய யோக்³ய-
 மத்யந்தப⁴க்திப⁴ரிதஸ்ய விலக்ஷ்ய கிஞ்சித் | 
ஸ்வாத்மப்ரதா³னமதி⁴கம்ʼ பவனாத்மஜஸ்ய
 குர்வன் ஸமாஶ்லிஷத³மும்ʼ பரமாபி⁴துஷ்ட: || 50|| 
|| இதி ஶ்ரீமதா³னந்த³தீர்த²ப⁴க³வத்பாதா³சார்யவிரசிதே ஶ்ரீமன்மஹாபா⁴ரததாத்பர்யநிர்ணயே ஸப்தமோऽத்⁴யாய: ||