|| atha suMdarakAMDam ||

rAmAya shAshvatasuvistRRitaShaDguNAya
sarveshvarAya balavIryamahArNavAya |
natvA lilaMghayiShurarNavamutpapAta
niShpIDya taM girivaraM pavanasya sUnu: ||1||

chukShobhavAridhiranuprayayau cha shIghraM
yAdogaNai: saha tadIyabalAbhikRRiShTa: |
vRRikShAshcha parvatagatA: pavanena pUrvaM
kShiptorNave girirudAgamadasya heto: ||2||

shyAlo harasya giripakShavinAshakAle
kShiptorNave sa marutorvaritAtmapakSha: |
haimo giri: pavanajasya tu vishramArthaM
udbhidya vAridhimavardhadanekasAnu: ||3||

naivAtra vishramaNamaichChadavishramo.asau
nissImapauruShabalasya kuta: shramo.asya |
AshliShya parvatavaraM sa dadarsha gachChan
devaistu nAgajananIM prahitAM vareNa ||4||

jij~nAsubhirnijabalaM tava bhakShametu
yadyattvamichChasi tadityamaroditAyA: |
AsyaM pravishya sapadi pravini:sRRito.asmAt
devAnanaMdayaduta svRRitameShu rakShan ||5||

dRRiShTvA surapraNayitAM balamasya chograM
devA: pratuShTuvuramuM sumano.abhivRRiShTyA |
tairAdRRita: punarasau viyataiva gachChan
ChAyAgrahaM pratidadarsha cha siMhikAkhyam ||6||

laMkAvanAya sakalasya cha nigrahe.asyA:
sAmarthyamapratihataM pradadau vidhAtA |
ChAyAmavAkShipadasau pavanAtmajasya
so.asyA: sharIramanuvishya bibheda chAshu ||7||

ni:sImamAtmabalamityanudarshayAno
hatvaiva tAmapi vidhAtRRivarAbhiguptAm |
laMbe sa laMbashikhare nipapAta laMkA-
prAkArarUpakagirAvatha saMchukocha ||8||

bhUtvA biDAlasamito nishi tAM purIM cha
prApsyan dadarsha nijarUpavatIM sa laMkAm |
ruddho.anayA.ashvatha vijitya cha tAM svamuShTi-
piShTAM tayA.anumata eva vivesha laMkAm ||9||

mArgamANo bahishchAMta: so.ashokavanikAtale |
dadarsha shiMshupAvRRikShamUlasthitaramAkRRitim ||10||

naralokaviDaMbasya jAnan rAmasya hRRidgatam |
tasya cheShTAnusAreNa kRRitvA cheShTAshcha saMvidam ||11||

tAdRRikcheShTAsametAyA aMgulIyamadAttata: |
sItAyA yAni chaivAsannAkRRitestAni sarvasha: ||12||

bhUShaNAni dvidhA bhUtvA tAnyevAsaMstathaiva cha |
atha chUDAmaNiM divyaM dAtuM rAmAya sA dadau ||13||

yadyapyetanna pashyaMti nishAcharagaNAstu te |
dyulokachAriNa: sarve pashyaMtyRRiShaya eva cha ||14||

teShAM viDaMbanAyaiva daityAnAM vaMchanAya cha |
pashyatAM kalimukhyAnAM viDaMbo.ayaM kRRito bhavet ||15||

kRRitvA kAryamidaM sarvaM vishaMka: pavanAtmaja: |
AtmAviShkaraNe chittaM chakre matimatAM vara: ||16||

atha vanamakhilaM tadrAvaNasyAvaluMpya
kShitiruhamimamekaM varjayitvA.a.ashu vIra: |
rajanicharavinAshaM kAMkShamANo.ativelaM
muhuratiravanAdI toraNaM chAruroha ||17||

athAshRRiNoddashAnana: kapIMdracheShTitaM param |
didesha kiMkarAn bahUn kapirnigRRihyatAmiti ||18||

samastasho vimRRityavo varAddharasya kiMkarA: |
samAsadan mahAbalaM surAMtarAtmanoM.agajam ||19||

ashItikoTiyUthapaM purassarAShTakAyutam |
anekahetisaMkulaM kapIMdramAvRRiNodbalam ||20||

samAvRRitastathA.ayudhai: sa tADitaishcha tairbhRRisham |
chakAra tAn samastashastalaprahArachUrNitAn ||21||

punashcha maMtriputrakAn sa rAvaNaprachoditAn |
mamarda saptaparvataprabhAn varAbhirakShitAn ||22||

balAgragAminastathA sa sharvavAksugarvitAn |
nihatya sarvarakShasAM tRRitIyabhAgamakShiNot ||23||

anaupamaM harerbalaM nishamya rAkShasAdhipa: |
kumAramakShamAtmana: samaM sutaM nyayojayat ||24||

sa sarvalokasAkShiNa: sutaM sharairvavarSha ha |
shitairvarAstramaMtritairna chainamabhyachAlayat ||25||

sa maMDamadhyagAsutaM samIkShya rAvaNopamam |
tRRitIya eSha chAMshako balasya hItyachiMtayat ||26||

nidhArya eva rAvaNa: sa rAghavAya nAnyathA |
yadIMdrajinmayA hato na chAsya shaktirIkShyate ||27||

atastayo: samo mayA tRRitIya eSha hanyate |
vichArya chaivamAshu taM pado: pragRRihya pupluve ||28||

sa chakravadbhramAturaM vidhAya rAvaNAtmajam |
apothayaddharAtale kShaNena mArutItanu: ||29||

vichUrNite dharAtale nije sute sa rAvaNa: |
nishamya shokatApitastadagrajaM samAdishat ||30||

atheMdrajinmahAsharairvarAstrasaMprayojitai: |
tatakSha vAnarottamaM na chAshakadvichAlane ||31||

athAstramuttamaM vidheryuyoja sarvadu:saham |
sa tena tADito harirvyachiMtayannirAkula: ||32||

mayA varA vilaMghitA hyanekasha: svayaMbhuva:|
sa mAnanIya eva me tato.atramAnayAmyaham ||33||

ime cha kuryuratra kiM prahRRiShTarakShasAM gaNA: |
itIha lakShyameva me sarAvaNashcha dRRishyate ||34||

idaM samIkShya baddhavat sthitaM kapIMdramAshu te |
babaMdhuranyapAshakairjagAma chAstramasya tat ||35||

atha pragRRihya taM kapiM samIpamAnayaMshcha te |
nishAchareshvarasya taM sa pRRiShTavAMshcha rAvaNa: ||36||

kape kuto.asi kasya vA kimarthamIdRRishaM kRRitam |
itIrita: sa chAvadat praNamya rAmamIshvaram ||37||

avaihi dUtamAgataM duraMtavikramasya mAm |
raghUttamasya mArutiM kulakShaye taveshvaram ||38||

na chet pradAsyasi tvaran raghUttamapriyAM tadA |
saputramitrabAMdhavo vinAshamAshu yAsyasi ||39||

na rAmabANadhAraNe kShamA: sureshvarA api |
viriMchasharvapUrvakA: kimu tvamalpasAraka: ||40||

prakopitasya tasya ka: pura: sthitau kShamo bhavet |
surAsuroragAdike jagatyachiMtyakarmaNa: ||41||

itIrite vadhodyataM nyavArayadvibhIShaNa: |
sa puchChadAhakarmaNi nyayojayannishAcharAn ||42||

athAsya vastrasaMchayai: pidhAya puchChamagnaye |
dadurdadAha nAsya tanmarutsakho hutAshana: ||43||

mamarSha sarvacheShTitaM sa rakShasAM nirAmaya:|
baloddhatashcha kautukAt pradagdhumeva tAM purIm ||44||

dadAha chAkhilAM purIM svapuchChagena vahninA |
kRRitistu vishvakarmaNo.apyadahyatAsya tejasA ||45||

suvarNaratnakAritAM sa rAkShasottamai: saha |
pradahya sarvata: purIM mudAnvito jagarja cha ||46||

sa rAvaNaM saputrakaM tRRiNopamaM vidhAya cha |
tayo: prapashyato: purIM vidhAya bhasmasAdyayau ||47||

vilaMghya chArNavaM puna: svajAtibhi: prapUjita: |
prabhakShya vAnareshiturmadhu prabhuM sameyivAn ||48||

rAmaM sureshvaramagaNyaguNAbhirAmaM
saMprApya sarvakapivIravarai: sameta: |
chUDAmaNiM pavanaja: padayornidhAya
sarvAMgakai: praNatimasya chakAra bhaktyA ||49||

rAmo.api nAnyadanudAtumamuShya yogyaM
atyaMtabhaktibharitasya vilakShya kiMchit |
svAtmapradAnamadhikaM pavanAtmajasya
kurvan samAshliShadamuM paramAbhituShTa: ||50||

|| iti shrImadAnaMdatIrthabhagavatpAdAchAryavirachite shrImanmahAbhAratatAtparyanirNaye saptamo.adhyAya: ||