athaiSha sallokadayAsudhArdrayA
sadAgamastenanirAsakAmayA |
ramAvarAvAsabhuvA vishArado
vishAlayA.achiMtayadAtmano dhiyA || 1 ||

ananyasaMgAdguNasaMgitA hare-
rjanasya mAnaM tu vishiShTacheShTitam |
asaMgamasmAt prakaTIkaromyahaM
nijaM bhajan pAramahaMsyamAshramam || 2 ||

mama prabhornAparathA hi shobhate
dviShatsu viShNuM yadadaMDadhAraNam |
harisvasA nanvachirAdasadbhide
bhavedato nAsmi cha daMDadhArakaH || 3 ||

vichiMtayannitthamanaMtachiMtakaH
samastasaMnyAsanibaddhanishchayaH |
asAvanuj~nArthamathAnamaddhariM
samastasaMvyApinamAtmadAyagam || 4 ||

nije jane kiM namasIti pRRichChati
bruvan svavastupraNatiM vyadhAmiti |
guroH kilAnveShaNavAn jagadguruH
tadA jagAmAkhilalokashikShakaH || 5 ||

yatiryatAtmA bhuvi kashchanAbhava-
dvibhUShaNo bhUriviraktibhUShaNaH |
na nAmamAtrAchChuchimarthato.api yaM
jano.achyutaprekShamudAharat sphuTam || 6 ||

puraiSha kRRiShNAkarasiddhashuddhimad-
varAnnabhuktyA kila pAMDavAlaye |
vishodhitAtmA madhukRRitpravRRittimAn
chachAra kAMshchit parivatsarAn mudA || 7 ||

abhUtkushAstrAbhyasanaM na pAtakaM
kramAgatAdvipratisArato yateH |
yathA kushastrAdhyasanaM muradviShaH
padAMbuje vyAdhavarasya garhitam || 8 ||

vinItamAmnAyashirovishAradaM
sadaiva tattvaM prabubhutsumAdarAt |
gururviditvopagatAM nijAM mRRitiM
kadAchidUche tamupahvare giram || 9 ||

ahaM svayaM brahma na kiMchidasti mat-
paraM vijRRiMbheta yadA sphuTaM chitiH |
itIha mAyAsamayopapAditaM
niranvayaM suvrata mA sma vishvasIH || 10 ||

yadetadAtmaikyamupAstichoditaM
na me gurorapyaparokShatAM gatam |
purAtanAnAmapi saumya kutrachit
tato mukuMdaM bhaja saMvide mudA || 11 ||

itIdamAdishya vacho vachasvini
svake gurau lokamathAnyamIyuShi |
asevatA.a.alochya muhurgurorgiraM
sa rUpyapIThAlayamiMdirAvaram || 12 ||

subhaktinA tena sa bhaktavatsalo
niShevitastatra paraM bubhutsunA |
bhaviShyataH shiShyavarAddhi viddhi mAm
iti praviShTaH puruShaM tamabhyadhAt || 13 ||

pratIkShamANaM tamanugrahaM mudA
niShevamANaM punaraMbujekShaNam |
satAM guruH kAraNamAnuShAkRRitiH
yatiM prashAMtaM tamupAsasAda saH || 14 ||

sutaM yatIMdrAnucharaM virAgiNaM
nishamya saMnyAsanibaddhamAnasam |
suvatsalau rUpyatalAlayasthitaM
viyogatAMtau pitarau samIyatuH || 15 ||

varAshramaste jaratoranAthayoH
na jIvatoH syAdayi naMdanAvayoH |
sayAchanaM vAkyamudIrya tAvidaM
parItya putrAya natiM vitenatuH || 16 ||

natirna shushrUShujanAya shasyate
nataM bhavadbhyAM sphuTamatra sAMpratam |
aho vidhAtrA svayameva dApitA
tadabhyanuj~neti jagAda sa prabhuH || 17 ||

anuttaraj~naH sa tamarthayan puna-
ryatIMdramAnamya gataH priyAyutaH |
gRRihe vasan kalpasamAn kShaNAn nayan
sutAnaneMdoranishaM tato.asmarat || 18 ||

sa chiMtayan putramanorathaM shuchA
punashcha tIrtvopagato mahAnadIm |
yatIshvarAnuvratamAtmanaMdanaM
tamaikShata grAmavare maThAMtare || 19 ||

sa jAtakopAkulito dharAsuro
mahAtmanAM laMghanabhIrurapyalam |
sutasya kaupInadhRRitau hi sAhasa-
pratishravo me dRRiDha ityabhAShata || 20 ||

kShaNena kaupInadharo nijaM paTaM
vidArya he tAta kuruShva sAhasam |
itImamuktvA prabhurabravIt punaH
shubhAMtarAyaM na bhavAMshcharediti || 21 ||

na putra pitroravanaM vinA shubhaM
vadaMti saMto nanu tau sutau mRRitau |
nivartamAne na hi pAlako.asti nau
tvayIti vaktAramamuM suto.abravIt || 22 ||

yadA viraktaH puruShaH prajAyate
tadaiva saMnyAsavidhiH shrutau shrutaH |
na saMgahIno.api parivrajAmi vAm
ahaM tu shushrUShumakalpayanniti || 23 ||

bahushrutatvAdyadi tatsahe balAt
na sA savitrI virahaM saheta te |
iti dvijenAbhihite.anamat sa taM
bhavAnanuj~nAM pradadAtviti bruvan || 24 ||

vichiMtya vidvAn sa niruttarIkRRita-
stathA.astu mAtA.anuvadedyadIti tam |
udIrya kRRichChrAdupagamya maMdiraM
priyAsakAshe tamudaMtamabravIt || 25 ||

nishAcharAreriva lakShmaNaH purA
vRRikodarasyeva sureMdranaMdanaH |
gado.atha shaureriva karmakRRitpriyaH
subhaktimAn vishvavido.anujo.abhavat || 26 ||

kadAchidApyAlayabuddhirAlayaM
nivedayan pAlakamenametayoH |
dRRiDhasvasaMnyAsaniShedhanishchayAM
dhavAnumatyedamuvAcha mAtaram || 27 ||

varAshramAptiM mama saMvadasva mAM
kadAchidapyaMba yadIchChasIkShitum |
yadanyathA deshamimaM parityajan
na jAtu dRRiShTerviShayo bhavAmi vaH || 28 ||

iti bruvANe tanaye kadAchida-
pyadarshanaM tasya mRRiternidarshanam |
vichiMtya paryAkulitA chikIrShitaM
sutasya kRRichChrAnnyaruNanna sA shubhA || 29 ||

athopagamyaiSha guruM jagadguruH
prasAdya taM devavaraprasAditaH |
sadA samastAshramabhAk sureshvaro
visheShataH khalvabhajadvarAshramam || 30 ||

kriyAkalApaM sakalaM sa kAlavid
vidhAnamArgeNa vidhAya kevalam |
sadA prasannasya hareH prasattaye
muhuH samastanyasanaM samabhyadhAt || 31 ||

anaMtamAtrAMtamudAharaMti yaM
trimAtrapUrvaM praNavochchayaM budhAH |
tadA.abhavadbhAvichaturmukhAkRRitiH
japAdhikArI yatirasya sUchitaH || 32 ||

guNAnurUponnati pUrNabodha i-
tyamuShya nAma dvijavRRiMdavaMditaH |
udAharadbhUriyashA hi kevalaM
na maMtravarNaH sa cha maMtravarNakaH || 33 ||

niraMgarAgaM mukharAgavarjitaM
vibhUShaNaM viShTapabhUShaNAyitam |
amuM dhRRitAShADhamavekShya menire
svabhAvashobhA.anupameti jaMtavaH || 34 ||

bhujaMgabhUteshavihaMgapAdikaiH
pravaMditaH sAvasarapratIkShaNaiH |
nanAma so.ayaM gurupUrvakAn yatIn
aho mahIyo mahatAM viDaMbanam || 35 ||

varAshramAchAravisheShashikShaNaM
vidhitsurasyAcharitaM nishAmayan |
visheShashikShAM svayamApya dhIradhIH
yatIshvaro vismayamAyatAMtaram || 36 ||

sa rUpyapIThAlayavAsine yadA
nanAma nAthAya mahAmatirmudA |
tadA.amunA.agrAhi narapraveshinA
bhuje bhujenAshu bhujaMgashAyinA || 37 ||

chirAt sutattvaM prabubhutsanA tvayA
niShevaNaM me yadakAri tatphalam |
imaM dadAmItyabhidhAya so.amunA
tadA praNIya pradade.achyutAtmane || 38 ||

anugrahaM taM pratigRRihya sAdaraM
mudA.a.atmanA.a.aptAM kRRitakRRityatAM smaran |
abhUdasaMgo.api sa tatsusaMgavAn
asaMgabhUShA nanu sAdhusaMgitA || 39 ||

yiyAsati svastaTinIM muhurmuhuH
namatyanuj~nArthini bhUrichetasi |
tamasmarat svAminameva dUnadhIH
gururbhaviShyadvirahAgnishaMkayA || 40 ||

itastRRitiye divase dyunimnagA
tvadarthamAsmAkataTAkamAvrajet |
ato na yAyA iti taM tadA.avadat
pravishya kaMchit karuNAkaro hariH || 41 ||

tadAj~nayopAgatajAhnavIjale
jano.atra sasnau saha pUrNabuddhinA |
tataH paraM dvAdashavatsarAMtare
sadA.a.avrajet sA tadanugrahAMkinI || 42 ||

gate dinAnAM dashake samAsake
varAshramaM prApya sapatralaMbanam |
jigAya jaitrAnbahutarkakarkashAn
sa vAsudevAhvayapaMDitAdikAn || 43 ||

guroH svashiShyaM chaturaM chikIrShataH
prachodanAchChrotumihopachakrame |
atheShTasiddhishChalajAtivAridhiH
nirAdareNApi mahAtmanA.amunA || 44 ||

tadAdyapadyasthamavadyamaMDalaM
yadA.avadat ShoDashakadvayAtmakam |
uparyapAstaM taditi bruvatyasau
gurau tamUche praNigadyatAmiti || 45 ||

bhavatpravaktRRitvasamarthatA na me
sakopamitthaM bruvati vratIshvare |
apIha mAyAsamaye paTau nRRiNAM
babhUva taddUShaNasaMshayAMkuraH || 46 ||

budho.abhidhAnaM shravaNaM budhetaro
dhruvaM vidadhyAd vimumukShurAtmanaH |
yatirvisheShAditi lokachodanAt
pravakti mAyAsamayaM sma pUrNadhIH || 47 ||

akhaMDitopanyasanaM visaMshayaM
sasaMpradAyaM pravacho dRRiDhottaram |
samAgaman shrotumamuShya sAgrahAH
janAH shrutADhyAshchaturA bubhUShavaH || 48 ||

gurorupAMte shravaNe ratairdvijaiH
sa paMchaShairbhAgavate kadAchana |
bahuprakAre likhite.api vAchite
prakAramekaM prabhurabhyadhAddaDham || 49 ||

paraprakAreShvapi saMbhavatsu te
vinirNayo.asmin kathamityudIrite |
mukuMdabodhena mahAhRRidabravIt
prakAramenaM bhagavatkRRitaM sphuTam || 50 ||

nigadyatAM gadyamihaiva paMchame
jagadgurorvettha kRRitisthitiM yadi |
iti bruvANe yatisattame svayaM
taduktamArgeNa jagAda bhUrihRRit || 51 ||

asheShashiShyaishcha tadAj~nayA tadA
parIkShaNAyaikShi samastapustakam |
sa tatra haMtaikatame sthitaM tyajan
na tAvadadhyAyanikAyamabhyadhAt || 52 ||

atra janmani na yatpaThitaM te
jaitra bhAti kathamityamunokte |
pUrvajanmasu hi veda puredaM
sarvamityamitabuddhiruvAcha || 53 ||

iti bahuvidhavishvAshcharyachittapravRRitteH
jagati vitatimApannUtanA.apyasya kIrtiH |
kShapitatatatamaskA bhAskarIva prabhA.alaM
sujanakumudavRRiMdAnaMdadA chaMdrikeva || 54 ||

|| iti shrImatkavikulatilakashrItrivikramapaMDitAchAryasuta shrInArAyaNapaMDitAchAryavirachite shrImatsumadhvavijaye mahAkAvye AnaMdAMke chaturthaH sargaH ||