atha kadAchana suMdaranaMdana-
smitamukheMdudRRishAM dayitau nRRiNAm |
mahamito nijabaMdhumude mudA
prayayatuH svajanaiH saha daMpatI || 1 ||

svajanatApagamAgamasaMgama-
pratisabhAjitapUrvakasaMbhrame |
aviduShI jananIti sa bAlakaH
sharaNato raNato niragAnnRRibhiH || 2 ||

kva nu yiyAsasi tAta na sAMprataM
svajanasaMtyajanaM tava sAMpratam |
iti vibhuH pathikairudito vrajan
smitamanAkulamuttaramAtanot || 3 ||

tvaritametya sa kAnanadevatA-
sadanamatra nanAma ramApatim |
api tataH pragato laghu nArike-
lyupapadAMtarasadmagataM cha tam || 4 ||

nalinanAbhanibhAlanasaMmadA-
gamavikasvarabhAsvaralochanaH |
janamanonayanAMbujabhAskaro
rajatapIThapuraM prayayAvasau || 5 ||

suhayamedhagaNAtishayAlavo
harinamaskRRitayaH sukRRitA imAH |
iti surairapi bhUsuramaMDalaiH
samanamat sa savismayamIkShitaH || 6 ||

na hi hariM satataM na namatyasau
na cha na pashyati nApi na vaMdate |
api tatheti vidhAya visheShataH
sa nanu sAdhujanAn samashikShayat || 7 ||

anavalokya sutaM sutavatsalo
mRRigayati sma mahIsurapuMgavaH |
muhurapRRichChadamuShya gatiM narAn
pathi pathi pragato.anupadaM drutam || 8 ||

janasadAgatisUchitavartmanA
pratipadaM vrajatA parayA tRRiShA |
dvijamahAmadhupena manoharaM
smitamalAbhi sutAnanavArijam || 9 ||

virahadUnatayodgamanonmukhaM
nyaruNadashru purA sa yayordRRishoH |
atha tayoH pramadotthitamapyadaH
pratinirudhya giraM gururabravIt || 10 ||

ayi sutedamudAhara tattvato
nanu samAgatavAnasi sAMpratam |
svajanatArahitasya tu ko.atra te
sahacharo.arbhaka dIrghatame pathi || 11 ||

janakavAchamimAmavadhArayan
kalamudAharadaMburuhekShaNaH |
svapadamAvrajato vrajato.apyato
nanu sakhA mama kAnanago vibhuH || 12 ||

taditarAyatanAttu yadA.agamaM
kRRitanatiH khalu tatra hariH sakhA |
ahamihApi maheMdradigAlayaM
praNatavAnuta yAvadadhIshvaram || 13 ||

api tato.ahamupetya sahAmunA
bhagavate.atra sate praNatiM vyadhAm |
iti nigadya vibhAti shishuH sma vi-
smitasabhAjanachIrNasabhAjanaH || 14 ||

virahitasvajanaM charaNapriyaM
vividhabhUtabhayaMkaravartmani |
ayi kRRipAlaya pAlaya bAlakaM
laghushubhasya mametyanamad dvijaH || 15 ||

tamupagRRihya sutaM sutaponidhiH
gRRihamasau gRRihINIsahito yayau |
udayatIti hi bAladivAkare
smitamabhUt sujanAnanavArijam || 16 ||

varavimAnagirAvapi chaMDikA
shishumaho jananI tamalAlayat |
aparathA parituShTamanAH kathaM
chiramihaiSha vasedvisahAyakaH || 17 ||

sakalashabdamayI cha sarasvatI
satatamAnamati svayameva yam |
dvijavaro.atha kadAchana mAtRRikAH
kila sutaM parichAyayati sma tam || 18 ||

lipikulaM nanu tAta gate dine
likhitameva punarlikhitaM kutaH |
iti nijapratibhAguNabhAvitaM
haripadasya vachastamanaMdayat || 19 ||

shishurasau pratibhAMbudhirityalaM
janamanovachanagrahapIDanA |
na bhavatAditi taM vijanasthale
svatanayaM samashikShayadeShakaH || 20 ||

mahavatA svajanena samIrita-
svajananIsahitena kadAchana |
ruchiravAchanayA.architavAkChriyA
pratiyaye prabhuNA ghRRitavallyapi || 21 ||

pariShadA nitarAM parivAritaH
shivapadaH kila dhautapaTodbhavaH |
iha kathAM kathayan dadRRishe tataH
pRRithudhiyA pRRithukAkRRitinA.amunA ||22 ||

idamuvAcha vichAravichakShaNaH
shuchi vachaH shanakaiH sa janAMtare |
aparathA kathitaM kathaka tvayA
nanu matAnmahatAmiti sasmitam || 23 ||

agaNayanna shivaM janatA tadA
savachane vasudevasutAhvaye |
mukharamichChati ko mRRigadhUrtakaM
prakRRitahuMkRRitasiMhashishau sati || 24 ||

atha kathAM kathayeti tadA jane
gaditavatyuchitArthamudAharat |
sa samalAlyata vismayirbhirnarai-
rapi surairvijayAMkurapUjakaiH || 25 ||

sa jananIsahito janakaM gRRihe
pragatavAMstamudaMtamavedayat |
nigada tAta shivaH kathakaH sa kiM
vitathagIrathavA.ahamitIrayan || 26 ||

nanu sutAvitathaM kathitaM tvaye-
tyamumudIrya savismayamasmarat |
prakRRititaH kRRititA khalu me shishoH
madadhinAthadayodayajetyasau || 27 ||

kathayatAM prathame kathayatyalaM
svajanake janasaMghavRRite kathAm |
sakalalokamanonayanotsavaH
chaturadhIH sa kadAchidavAchayat || 28 ||

vividhashAkhipadArthanivedane
likuchanAmni tadA.anuditArthake |
kimiti tAta tadarthamavarNayan
kathayasIti shanairayamabravIt || 29 ||

avadatIti pitaryapi chodite
pratibubhutsuShu tatra janeShvapi |
ayamudIrya tadarthamavAptavAn
pariShado hyasamAnasumAnanAm || 30 ||

bahuvidhaishcharitairiti chArubhiH
sakalalokakutUhalakAriNam |
dvijavareNa vayasyuchite sthitaM
tamupanetumanena dadhe manaH || 31 ||

samuchitagrahayogaguNAnvitaM
samavadhArya muhUrtamadUShaNaM |
praNayabaMdhurabAMdhavavAnasau
dvijakulAkulamutsavamAtanot || 32 ||

vividhavedatayA vijihIrShavo
vadanaraMgapade.asya chirAya yAH |
suravarapramadA api sapriyA
abhinanaMduraho viyato maham || 33 ||

vihitasAdhanasAdhitasatkriyo
jvalanamujjvaladhIrjvalayannayam |
upaninAya sutaM samalaMkRRitaM
kushalinaM kushalIkRRitashIrShakam || 34 ||

paricharAgnigurU charitavrataH
sucharaNaH paTha sAdhu sadAgamAn |
iti gurosijagadgurushikShaNe
sphuTamahAsi suraiH kRRitasAkShibhiH || 35 ||

jitakumAraguNaM sukumArakaM
nijakumAramavekShya niraMtaram |
samuchitAcharaNe chaturaM svataH
kShitisuro mudamAyata shikShayan || 36 ||

sapaTakhaMDamakiMchanavat kvachit
svavibhavAnuchitaM charaNAdikam |
bhuvanabharturaho svanigUhanaM
surasabhAsu kutUhalamAtanot || 37 ||

aviralairgaraloShmabhirAkulI-
kRRitasamastajano vichachAra yaH |
kvachidamuM nijighAMsurashAMtimAn
upasasarpa sa sarpamayo.asuraH || 38 ||

tvaritamudyatavistRRitamastakaH
pratidadaMsha yadainamavikShatam |
prabhupadAruNachArutarAMgulI-
vihRRitipiShTatanuH pratatAma saH || 39 ||

garuDatuMDamiva pratipannavAn
dvijakumArapadaM sa mamAra cha |
samuchitaM charitaM mahatAmidaM
sumanaso manaseShTamapUjayan || 40 ||

girishagurvamareMdramukhaishcha ya-
chcharaNareNuradhAri surAdhipaiH |
kShitisurAMghryabhivaMdanapUrvakaM
sa vidadhe.adhyayanaM ChalamAnuShaH || 41 ||

karatale khalu kaMdukavat sadA
sakalayA kalayA saha vidyayA |
aridhareNa samaM sphuritaM guroH
manasi tasya viDaMbayato janAn || 42 ||

anadhikairadhikaishcha vayasyatho
bahubhiradhyayanoparamAMtare |
anikaTe vaTubhiH paTubhirguroH
sa vijahAra sukhI sakhibhiH samam || 43 ||

padamudIrya javena yiyAsitaM
drutasakheShvabhavat sa puraHsaraH |
ayamayatnatayeti na vismayo
nanu manojavajit pavano hyasau || 44 ||

plavanatejasi haMta na kevalaM
vijitavAn sa tadA sakalAn janAn |
prabhunideshakaro hanumattanau
nanu jigAya sa vAlisutAdikAn || 45 ||

jalavihAraparAjayibhiH spRRidhA
sakhibhirIritavAriparishritam |
vadanamAkulalochanamAdadhe
smitamamuShya hi kaMchana vibhramam || 46 ||

sa shanakairbalino.ayugapadgatAn
pravihRRiteShu sakhIn nirapAtayat |
ashanakairyugapatprakRRitAhavAn
sahasito dvijasUnurayatnavAn || 47 ||

grahaNanigrahaNe grahaNe dhRRiDhe
gurubharoddharaNAdividhau paTau |
iha vibhAvupachAradhiyA nRRiNAM
RRitamayaM nanu bhIma itIritam || 48 ||

viharatIti paThatyapi na sphuTaM
svagRRihagAmini chAdrutamAyati |
paritutoSha na tatra jagadgurau
sa kila pUgavanAnvayajo dvijaH || 49 ||

atha kadAchana so.adhyayanAMtare
tamavadat kupito.anyamanasvinam |
paThasi no shaTha te sakhibhiH samaM
kimiti nityamudAsitadhIriti || 50 ||

guNanikA charaNAdikagocharA
na mama hRRiddayitetyudite.amunA |
vada vishAradavAda yathepsitaM
tvamuparItyavadaddharaNIsuraH || 51 ||

sakalalakShaNashikShaNamUlabhUH
shrutisamAmananaM skhalanojjhitam |
na khalu kevalamasya gurorvyadhAt
sumanasAmapi tatra kutUhalam || 52 ||

priyavayasyashiroguruvedanAm
ashamayatsahajAmapi dussahAm |
sa vipine vijane mukhavAyunA
shravaNagocharitena kadAchana || 53 ||

adhigatopaniShachcha sakRRichChrutA
prakaTabhAgavatIti na vismayaH |
adhigatA nanu jAtvapi na shrutAH
pratibhayA shrutayaH shatasho.amunA || 54 ||

sAkShAdathopaniShado vibhuraitareyyAH
pAThachChalena vijane.artharasAn bruvANaH |
adhyApakAya vitatAra vimokShabIjaM
goviMdabhaktimuchitAM gurudakShiNAM saH || 55 ||

ayi svAmin duShTAn damayadamaya
vyaktamachirAd
guNAn gUDhAn viShNoH kathayakathaya svAn
pramadayan |
tadAnaMdaM tanvanniti sumanasAM so.anusaratAM
anuj~nAmAdatta tribhuvanagururbrAhmaNaguroH || 56 ||

|| iti shrImatkavikulatilakashrItrivikramapaMDitAchAryasuta shrInArAyaNapaMDitAchAryavirachite hrImatsumadhvavijaye mahAkAvye AnaMdAMke tRRitIyaH sargaH ||