atha dvitIyaH sargaH
vij~nAnabhAnumati kAlabalena lIne
durbhAShyasaMtamasasaMtatito janeM.adhe |
mArgAt satAM skhalati khinnahRRido mukuMdaM
devAshchaturmukhamukhAH sharaNaM prajagmuH	 || 1 ||
nAthaH kalau triyugahUtiranud‍bubhUShuH
brahmANamapyanavatAramanAdidikShuH |
sarvaj~namanyamanavekSha sakAryavIryaM
smerAnano bhuvanajIvanamAbabhAShe	 || 2 ||
vedAMtamArgaparimArgaNadInadUnA
daivIH prajA visharaNAH karuNApadaM naH |
AnaMdayeH sumukha bhUShitabhUmibhAgo
rUpAMtareNa mama sadguNanirNayena	 || 3 ||
AdeshavaulimaNimujjvalavarNamenaM
baddhAMjalirmarudanargha(rghya)madhatta mUrdhnA |
hArAvalImiva hRRidA vibudheMdrayA~nchAM
bibhran nijAnanujighRRikShuravAtitIrShat	 || 4 ||
kAlaH sa eva samavartata nAma yAvat
chiMtAkulaM vividhasAdhukulaM babhUva |
vedAMtasaMtatakRRitAMtarasaM na vidmaH 
shreyo labhemahi kathaM nu vayaM bateti	 || 5 ||
tatprItaye rajatapIThapurAdhivAsI
devo vivesha puruShaM shubhasUchanAya |
prApte mahAya mahitAya mahAjanaughe
kolAhalena sa(su)kutUhalini pravRRitte	 || 6 ||
AviShTavAnakushalaM puruShaM prakRRityA
pratyAyayan nijajanAn nitarAmanRRityat |
uttuMgaketushikhare sa kRRitAMgahAro
raMgAMtare naTa ivAkhilavismayAt‍mA	 || 7 ||
AbhAShya so.atra janatAM shapathAnuviddhaM
uchchairidaM vachanamuddhRRitadorbabhAShe |
utpatsyate jagati vishvajanInavRRittiH
vishvaj~na eva bhagavAnachirAdiheti	 || 8 ||
sadvIpavArinidhisaptakabhUtadhAtryA
madhye.api karmabhuvi bhAratanAmakhaMDe |
kAle kalau suvimalAnvayalabdhajanmA
sanmadhyagehakulavaulimaNirdvijo.abhUt	 || 9 ||
vedAdrisadrajatapIThapureshvarAbhyAM
grAmo vibhUShitataraH shivarUpyanAmA |
hemAdrirAjavibhurAjadilAvRRitAbhaH
tasyAbhavadguruguNaH khalu mUlabhUmiH	 || 10 ||
rAmAdhiveshitaharisvasRRivaulimAlA-
rAjadvimAnagirishobhitamadhyuvAsa |
kShetraM sa pAjakapadaM trikulaikaketuH
kaM yaddadhAti satataM khalu vishvapAjAt	 || 11 ||
arthaM kamapyanavamaM puruShArthahetuM
puMsAM pradAtumuchitAmuchitasvarUpAm |
kanyAM suvarNalasitAmiva vedavidyAM
jagrAha vipravRRiShabhapratipAditAM saH	 || 12 ||
reme.achChayopaniShadeva mahAviveko
bhaktyeva shuddhakaraNaH paramashritA.alam |
mithyAbhimAnarahitaH parayeva muktyA
svAnaMdasaMtatikRRitA sa tayA dvijeMdraH	 || 13 ||
tasya prabhoshcharaNayoH kuladevatAyA
bhaktiM babaMdha nijadharmarataH sa dhIraH |
vij~nAtabhAratapurANamahArahasyaM
yaM bhaTTa ityabhivadaMti janA vinItam	 || 14 ||
goviMdasuMdarakathAsudhayA sa nRRiANAM
AnaMdayanna kila kevalamiMdriyANi |
kiMtu prabho rajatapIThapure padAbjaM 
shrIvallabhasya bhajatAmapi daivatAnAm	 || 15 ||
itthaM harerguNakathAsudhayA sutRRipto 
nairguNyavAdiShu janeShvapi sAgraheShu |
tattve sa kAlachaladhIratisaMshayAluH
dhImAn dhiyA shravaNashodhitayA pradadhyau	 || 16 ||
trAtA ya eva narakAt sa hi putranAmA 
mukhyAvanaM na sulabhaM puruShAdapUrNAt |
tasmAt samastavidapat‍yamavadyahInaM 
vidyAkarAkRRiti labhemahi kairupAyaiH	 || 17 ||
pUrve.api kardamaparAsharapAMDumukhyA 
yatsevayA guNagaNADhyamapatyamApuH |
taM pUrNasadguNatanuM karuNAmRRitAbdhiM 
nArAyaNaM kulapatiM sharaNaM vrajema	 || 18 ||
itthaM vichiMtya sa vichiMtyamananyabaMdhuH 
preShThapradaM rajatapIThapurAdhivAsam |
bhaktyA bhavAbdhibhayabhaMgadayA shubhAtmA 
bheje bhujaMgashayanaM dviShaDabdakAlam	 || 19 ||
patnyA samaM bhagavataH sa bhajan padAbjaM 
bhogAn laghUnapi punarlaghayAMchakAra |
dAMtaM svayaM cha hRRidayaM damayAMchakAra 
svachChaM cha dehamadhikaM vimalIchakAra	 || 20 ||
tIvraiH payovratamukhairvividhairvratAgraiH
jAyApatI guNagaNArNavaputrakAmau |
saMpUrNapUruShamatoShayatAM nitAMtaM 
deveritAviva purA.aditikashyapau tau	 || 21 ||
nAthasya bhUrikaruNAsudhayA.abhiShiktau 
shrIshrIdharapratatisArasharIrayaShTI |
bhUrivrataprabhavadivyasukAMtimaMtau 
tau dehashuddhimatimAtramathAlabhetAm	 || 22 ||
kAMtAdRRitau samuchite.atha babhAra garbhaM 
sA bhUsureMdraduhitA jagatAM sukhAya |
achChAMbareva rajanI paripUritAshA 
bhAvinyapAstatamasaM vidhumAdyapakShAt	 || 23 ||
taM pUrvapakShasitabiMbamiva pravRRiddhaM
yAvad dvijeMdravanitA suShuve.atra tAvat |
aMshena vAyuravatIrya sa rUpyapIThe 
viShNuM praNamya bhavanaM prayayau tadIyam	 || 24 ||
saMpUrNalakShaNachaNaM navarAjamAna-
dvArAMtaraM paramasuMdaramaMdiraM tat |
rAjeva satpuravaraM bhuvanAdhirAjo 
niShkAsayan paramasau bhagavAn vivesha	 || 25 ||
saMtuShyatAM sakalasannikarairasadbhiH 
khidyeta vAyurayamAvirabhUt pRRithivyAm |
AkhyAnitIva suraduMdubhimaMdranAdaH 
prAshrAvi kautukavashairiha mAnavaishcha	 || 26 ||
nAthaM niShevya bhavanAnatidUramAptaH 
prAj~no mahaprakRRitaduMdubhinAdapUrvAt |
putrodbhavashravaNato mahadApya saukhyaM
j~nAnaM parokShapadamap‍yamateShTahetum	 || 27 ||
Avishya veshma nijanaMdanamiMduvaktraM 
bhUyo.abhinaMdya sa mukuMdadayAM pravaMdya |
jAtasya tasya guNajAtavahasya jAta-
karmAdikarmanivahaM vidadhe sukarmA	 || 28 ||
j~nAnArthameva yadabhUdasudeva eSha
yadvAsudevapadabhaktirataH sadA.asau |
tadvAsudevapadamanvavadan sureMdrAH
tAtena yannigaditaM sutanAmakart‍rA	 || 29 ||
pAtuM payAMsi shishave kila goprado.asmai 
pUrvAlayaH svasutasUnutayA prajAtaH |
nirvANahetumalabhiShTa parAtmavidyAM 
dAnaM dhruvaM phalati pAtraguNAnukUl‍yAt	 || 30 ||
atrastameva satataM pariullachakShuH 
kAMtyA viDaMbitanaveMdu jagatyanargham |
tat putraratnamupagRRihya kadAchidAptaH 
svasvAmine budha upAyanamArpayat saH	 || 31 ||
natvA hariM rajatapIThapurAdhivAsaM 
bAlasya saMpadamanApadamarthayit‍vA |
sAkaM sutena parivArajanAn‍vito.asau
prAyAnnishIthasamaye nijameva dhAma	 || 32 ||
doSheyuShAM samamanena vane.atibhIme
tatkrIDitagraha ihaikatamaM tutoda |
udvAMtarak‍tamavalokya tamabhyadhAyi
kenApyaho na shishutut kathameSha ittham	 || 33 ||
Avishya pUruShamuvAcha mahAgraho.asau
asmadvihArasamayopagatAn samastAn |
yachChaktiguptirahitAnalamasmi haMtuM
lokeshvaraH sa bata bAlatamaH kileti	 || 34 ||
stanyena bAlamanutoShya muhuH svadhAmno 
mAtA kadAchana yayau virahAsahA.api |
vishvasya vishvaparipAlakapAlanAya 
kanyAM nijAmanuguNAM kila bhIrureShA	 || 35 ||
sA bAlakaM praruditaM parisAMtvayaMtI
mugdhAkShareNa vachasA.anuninAya mugdhA |
mA tAtatAta sumukheti punaH prarodIH
mAtA tanoti ruchitaM tvaritaM taveti	 || 36 ||
rode kriyAsamabhihArata eva vRRitteH
potasya mAtari chirAdapi nA.a.agatAyAm |
jagrAha bAlamatha chaikShata mAtRRimArgaM
sA.api kriyAsamabhihArata eva bAlA	 || 37 ||
kartavyamauDhyamabhipadya nirUpya sA taM
prAbhojayat khalu kulitthakulaM prapakvam |
shItaM payo.api satataM paripAyayaMtI
yasyoShNarogamativelamashaMkatAMbA	 || 38 ||
nUnaM pipAsuratiroditi haMta bAlo
dhi~N mAM dayAvirahitAM parakRRityasaktAm |
ityAkulA gRRihamupetya tadA prasannaM
pUrNodaraM sutamavaikShata viprapatnI	 || 39 ||
pRRiShTvA.avagamya sakalaM cha tataH pravRRittaM
yUnAM cha duHsahamidaM shishunopabhuk‍tam |
itthaM vichiMtya tanayAM bahu bhartsayaMtyA
bhItaM tayota kupitaM manasA.anutap‍tam	 || 40 ||
ArogyashAlini tadA.api pureva putre
vismeratAmupajagAma jananyamuShya |
yasya trilokajananI jananI viShe.api
pIte na vismayamavApa samastashakteH	 || 41 ||
stanyaM muhuH kila dadau jananI gRRihItvA
kShemAya taM kila dadhajjanako jajApa |
anyo jano.api kila lAlayati sma kiMtu
sarvo.api tanmukhasuhAsarasAyanotkaH	 || 42 ||
devAdisadbhiranupAlitayA.a.adareNa
devyAtmaneva vilasatpadayA nitAMtam |
avyaktayA prathamato vadane.asya vANyA
shAlInayeva bhuvanArchitayA vijahre	 || 43 ||
pAgriMkhaNaM svayamatha sthitameSha chakre
pashchAdgatiM parichayena kila krameNa |
vishvasya cheShTitamaho yadanugraheNa
sarvaM tadasya pavanasya viDaMbanaM hi	 || 44 ||
puchChAMtamachChamavalaMbya kadAchideShaH
prAtarvrajAd‍vrajata eva nijarShabhasya |
prAyAt priyasya sahasA svajanairadRRiShTo
nAnAvaneShu charatashcharatastRRiNAni	 || 45 ||
uttuMgashRRiMgalasitasya mahiShThamUrteH
pAdAvRRitAvanitalasya suraMdhrakasya |
Ashritya tasya shushubhe.avayavaikadeshaM
bAlo divAkara ivodayaparvatasya	 || 46 ||
lIlAM karoti nu gRRihAMtarago nu bAlaH
kUpAMtare nu patitaH prakRRitisvataMtraH |
itthaM vichiMtya sa muhuH svajano vimRRigya
haMtAnavekShya tanayaM hRRidi tApamApa	 || 47 ||
bAlasya bAlaparilaMbanagocharaM tat
vyashvasyatApi vachanaM vanagocharoktam |
yat sAyamaikShata janaH shishumAvrajaMtam
ekAbdakaM vRRiShabhabAlakRRitAvalaMbam	 || 48 ||
chiMtAmaNIMdramiva chiMtitadaM daridro
vij~nAnamArgamiva viShNuparaM mumukShuH |
naShTaM cha naMdanamiti svajano.asya labdhvA
nAthasya tasya tamanugrahameva mene	 || 49 ||
lIlAvasAnasamaye sahasA kadAchit
Aryo.amunA.abhyavahRRitiM prati chodyamAnaH |
roddhaiSha no.asti dhaniko vRRiShavikrayIti
provAcha naMdanamukheMdumavekShya maMdam	 || 50 ||
lIlAkareNa sa kareNa sukomalena
bIjAMtarANi kila kAnichidAshu tasmai |
smitvA.arbhako.abhimataniShkapade yadA.adAt
Adatta tAni dhaniko bahumAnapUrvam	 || 51 ||
labdhaM sutAditi vadan dvijapuMgavena
kAlAMtare nijadhane pratiditsite.api |
sAkShAdamAnavanavAkRRititaH sa lebhe
bIjachChalena puruShArthamaho vishiShTam	 || 52 ||
vAsudevamiha vAsudevatA-
satkalAmabhinanaMda taM janaH |
vAsudevamiti vAsudevasan-
nAmakaM vividhalIlamarbhakam	 || 53 ||
iti viharati mahyAM viShNudAse.api gUDhe
samajani sujanAnAM chittamAnaMdapUrNam |
udayati ghanamAlAlInabhAnau cha bhAnau
nanu jananayanAbjairlabhyate.alaM vikAsaH	 || 54 ||
|| iti shrImatkavikulatilakashrItrivikramapaMDitAchAryasuta-
shrInArAyaNapaMDitAchAryavirachite 
shrImatsumadhvavijaye mahAkAvye 
AnaMdAMke dvitIyaH sargaH ||