kAMtAya kalyANaguNaikadhAmne
navadyunAthapratimaprabhAya |
nArAyaNAyAkhilakAraNAya
shrIprANanAthAya namaskaromi ||1||

anAkulaM gokulamullalAsa
yatpAlitaM nityamanAvilAtma |
tasmai namo nIradanIlabhAse
kRRiShNAya kRRiShNAramaNapriyAya ||2||

api trilokyA bahirullasaMtI
tamo haraMtI muhurAMtaraM cha |
dishshAddashaM no vishadAM jayaMtI
madhvasya kIrtirdinanAthadIptim ||3||

tamonudA.a.anaMdamavApa lokaH
tattvapradIpAkRRitigogaNena |
yadAsyashItAMshubhuvA gurUMstAn
trivikramAryAn praNamAmi varyAn ||4||

mukuMdabhaktyai gurubhaktijAyai
satAM prasattyaicha niraMtarAyai |
garIyasIM vishvagurorvishuddhAM
vakShyAmi vAyoravatAralIlAm ||5||

tAM maMtravarNairanuvarNanIyAM
sharveMdrapUrvairapi vaktukAme |
saMkShipnuvAkye mayi maMdabuddhau
saMto guNADhyAH karuNAM kriyAsuH ||6||

uchchAvachA yena samastacheShTAH
kiM tatra chitraM charitaM nivedyam |
kiMtUttamashlokashikhAmaNInAM
manovishuddhyai charitAnuvAdaH ||7||

mAlAkRRitastachcharitAkhyaratnaiH
asUkShmadRRiShTeH sakutUhalasya |
pUrvAparIkAramathAparaM vA
kShAmyaMtu me haMta muhurmahAMtaH ||8||

shrIvallabhAj~nAM sasureMdrayA~nchAM
saMbhAvya saMbhAvyatamAM trilokyAm |
prANeshvaraH prANigaNapraNetA
gurussatAM kesariNo gRRihe.abhUt ||9||

yeye guNA nAma jagatprasiddhAH
yaM teShuteShu sma nidarshayaMti |
sAkShAnmahAbhAgavataprabarhaM
shrImaMtamenaM hanumaMtamAhuH ||10||

karmANi kurvan paramAdbhutAni
sabhAsu daivIShu sabhAjitAni |
sugrIvamitraM sa jagatpavitraM
ramApatiM rAmatanuM dadarsha ||11||

pAdAraviMdapraNato harIMdraH
tadA mahAbhaktibharAbhinunnaH |
agrAhi padmodarasuMdarAbhyAM
dorbhyAM purANena sa pUruSheNa ||12||

adAryasAlAvalidAraNena
vyApAditeMdraprabhavena tena |
prAdyotaniprItikRRitA nikAmaM
madhudviShA saMdidishe sa vIraH ||13||

karNAMtamAnIya guNagrahItrA
rAmeNa mukto raNakovidena |
sphurannasau vairibhayaMkaro.abhUt
satpakShapAtI pradaro yathA.agryaH ||14||

gobhiH samAnaMditarUpasItaH
svavahninirdagdhapalAshirAshiH |
aho hanUmannavavArido.asau
tIrNAMbudhirviShNupade nanAma ||15||

apakShapAtI puruShastrilokyAM
abhogabhoktA patagAdhirAjam |
vishvaMbharaM bibhradasau jigAya
tvarAparAkrAMtiShu chitrametat ||16||

nibadhya setuM raghuvaMshaketu-
bhrUbhaMgasaMbhrAMtapayodhimadhye |
muShTiprahAraM dashakAya sItA-
saMtarjanAgryottarameShako.adAt ||17||

jAjvalyamAnojjvalarAghavAgnau
chakre sa sugrIvasuyAyajUke |
AdhvaryavaM yuddhamakhe pratipra-
sthAtrA sumitrAtanayena sAkam ||18||

rAmArchane yo nayataH prasUnaM
dvAbhyAM karAbhyAmabhavatprayatnaH |
ekena doShNA nayato girIMdraM
saMjIvanAdyAshrayamasya nAbhUt ||19||

sa dAritAriM paramaM pumAMsaM
samanvayAsInnaradevaputryA |
vahnipraveshAdhigatAtmashuddhyA
virAjitaM kAMchanamAlayeva ||20||

shyAmaM smitAsyaM pRRithudIrghahastaM
sarojanetraM gajarAjayAtram |
vapurjaganmaMgalameSha dRRigbhyAM
chirAdayodhyAdhipateH siSheve ||21||

rAjyAbhiSheke.avasite.atra sItA
preShThAya nastAM bhajatAM disheti |
rAmasya vANyA maNimaMjumAlA-
vyAjena dIrghAM karuNAM babaMdha ||22||

hRRidorusauhArdabhRRitA.adhimauli-
nyastena hastena dayArdradRRiShTyA |
sevAprasanno.amRRitakalpavAchA
didesha devaH sahabhogamasmai ||23||

preShTho na rAmasya babhUva tasmAt
na rAmarAjye.asulabhaM cha kiMchit |
tatpAdasevAratireSha naichChat
tathA.api bhogAn nanu sA viraktiH ||24||

namonamo nAtha namonamaste
namonamo rAma namonamaste |
punaHpunaste charaNAraviMdaM
namAmi nAtheti naman sa reme ||25||

kiM varNayAmaH paramaM prasAdaM
sItApatestatra hariprabarhe |
muMchanmahIM nityaniShevaNArthaM
svAtmAnamevaiSha dadau yadasmai ||26||

svAnaMdahetau bhajatAM janAnAM
magnaH sadA rAmakathAsudhAyAm |
asAvidAnIM cha niShevamANo
rAmaM patiM kiMpuruShe kilA.aste ||27||

tasyaiva vAyoravatAramenaM
saMto dvitIyaM pravadaMti bhImam |
spRRiShTaiva yaM prItimatA.anilena
nareMdrakAMtA suShuve.atra kuMtI ||28||

iMdrAyudhaM hIMdrakarAbhinunnaM
chichCheda pakShAn kShitidhAriNAM prAk |
bibheda bhUbhRRidvapuraMgasaMgAt
chitraM sa panno jananIkarAgrAt ||29||

pure kumArAnalasAn vihArAn
nirIkShya sarvAnapi maMdalIlaH |
kaishoralIlAM hatasiMhasaMghAM
vane pravRRittAM smarati sma sUtkaH ||30||

bhuktaM cha jIrNaM paripaMthidattaM
viShaM viShaNNo viShabhRRidgaNo.ataH |
pramANakoTeH sa hi helayA.agAt
nedaM jagajjIvanade.atra chitram ||31||

dagdhvA puraM yogabalAtsa niryan
dharmAniva svAn sahajAn dadhAnaH |
adAribhAvena jagatsu pUjyo
yogIva nArAyaNamAsasAda ||32||

samarpya kRRityAni kRRitI kRRitAni
vyAsAya bhUmne sukRRitAni tAvat |
kariShyamANAni cha tasya pUjAM
saMkalpayAmAsa sa shuddhabuddhiH ||33||

viShNoH padashridbakasannirAsI
kShiptAnyapakShiprakaraH supakShaH |
sasodaro.athAdita rAjahaMsaH
sa rAjahaMsImiva rAjakanyAm ||34||

iMdIvarashrIjayisuMdarAbhaM
smerAnaneMduM dayitaM mukuMdam |
svamAtuleyaM kamalAyatAkShaM
samabhyanaMdat suchirAya bhImaH ||35||

mahAgadaM chaMDaraNaM pRRithivyAM
bArhadrathaM maMkShu nirasya vIraH |
rAjAnamatyujjvalarAjasUyaM
chakAra goviMdasureMdrajAbhyAm ||36||

duHshAsanenAkulitAn priyAyAH
sUkShmAnarAlAnasitAMshcha keshAn |
jighAMsayA vairijanasya tIkShNaH
sa kRRiShNasarpAniva saMchikAya ||37||

jAjvalyamAnasya vanevane.alaM
didhakShataH pArthivasArthamugram |
sattvAni puMsAM bhayadAni nAshaM
vRRikodarAgnergurutejasA.a.apuH ||38||

bhogAdhikAbhogavato.aruNAkShAn
itastataH saMchalato dhareMdre |
bahUn dvijihvAnmaNimatpurogAn
asau kaTUn krodhavashAn jaghAna ||39||

athaiSha veShAMtarabhasmalInaH
krameNa vAyuprabhavaH sutejAH |
ruddhAkhilAshaM mukharaM prachaMDaM
bhasmIchakArAkhilakIchakaugham ||40||

sa kRRiShNavartmA vijayena yukto
muhurmahAhetidharo.apradhRRiShyaH |
bhIShmadvijAdyairatibhIShaNAbhaM
vipakShakakShaM kShapayan vireje ||41||

tarasvinaH prochchalitAnadhIrAn
nirdagdhapakShAnatitIkShNakopAn |
sa dhArtarAShTrAn bahuhetilIlo
vinAshya vishvAn parayA shriyA.abhAt ||42||

kRRiShNAMghripaMkeruhabhRRiMgarAjaH
kRRiShNAmukhAMbhoruhahaMsarAjaH |
prajAsarojAvalirashmirAjaH
sasodaro.arAjata vIrarAjaH ||43||

pautre pavitrAhvayajAmipautre
dharAM nidhAyAsuradhIShu tApam |
kIrtiM trilokyAM hRRidaye mukuMdaM
bheje padaM svaM sahajaiH sa bhImaH ||44||

viShNoH padAMtaM bhajatA.anilena
ghorapraghAtairiti nAshitAste |
rasojjhitAshchaMchalavRRittayo.alaM
shobhAM na bhejuH suravairimeghAH ||45||

etatpratIpaM kila kartukAmA
naShTaujasaH saMkaTamevamApya |
mukuMdavaiguNyakathAM svayogyAM
kAle kalAvAkalayaMta te.alam ||46||

yo bhUrivairo maNimAn mRRitaH prAg-
vAgmI bubhUShuH paritoShiteshaH |
sa saMkarAkhyoM.aghritaleShu jaj~ne
spRRidhA.apare.apyAsurihAsureMdrAH ||47||

sAnnAyyamavyaktahRRidAkhubhugvA
shvA vA puroDAshamasArakAmaH |
maNisrajaM vA plavago.avyavastho
jagrAha vedAdikameSha pApaH ||48||

jano namennAparatheti matvA
shaThashchaturthAshramameSha bheje |
padmAkaraM vA kaluShIchikIrShuH
sudurdamo duShTagajo vishuddham ||49||

avaidikaM mAdhyamikaM nirastaM
nirIkShya tatpakShasupakShapAtI |
tameva pakShaM pratipAduko.asau
nyarUrupanmArgamihAnurUpam ||50||

asatpade.asan sadasadviviktaM
mAyAkhyayA saMvRRitimabhyadhatta |
brahmApyakhaMDaM bata shUnyasiddhyai
prachChannabauddho.ayamataH prasiddhaH ||51||

yadbrahmasUtrotkarabhAskaraM cha
prakAshayaMtaM sakalaM svagobhiH |
achUchuradvedasamUhavAhaM
tato mahAtaskaramenamAhuH ||52||

svasUtrajAtasya viruddhabhAShI
tadbhAShyakAro.ahamiti bruvan yaH |
taM tatkShaNAdyo na didhakShati sma
sa vyAsarUpo bhagavAn kShamAbdhiH ||53||

nigamasanmaNidIpagaNo.abhavat
taduruvAggaNapaMkanigUDhabhAH |
aviduShAmiti saMkaratAkaraH
sa kila saMkara ityabhishushruve ||54||

vishvaM mithyA vibhuraguNavAnAtmanAM nAsti bhedo
daityA itthaM vyadadhata girAM dikShu bhUyaH prasiddhim |
AnaMdAdyairguruguNagaNaiH pUrito vAsudevo
maMdaM maMdaM manasi cha satAM haMta nUnaM tiro.abhUt ||55||

|| iti shrImatkavikulatilakashrItrivikramapaMDitAchAryasuta-
shrInArAyaNapaMDitAchAryavirachite shrImatsumadhvavijaye mahAkAvye
AnaMdAMke prathamaH sargaH ||1||