అథ శ్రీశివస్తుతి:

స్ఫుటం స్ఫటికసప్రభం స్ఫుటితహాటకశ్రీజటం
శశాంకదలశేఖరం కపిలఫుల్లనేత్రత్రయమ్ ।
తరక్షువరకృత్తిమద్భుజగభూషణం భూతిమత్
కదా తు శితికంఠ తే వపురవేక్షతే వీక్షణమ్ ।।౧।।

త్రిలోచన విలోచనే లసతి తే లలామాయితే
స్మరో నియమఘస్మరో నియమినామభూద్భస్మసాత్ ।
స్వభక్తిలతయా వశీకృతవతీ సతీయం సతీ
స్వభక్తవశగో భవానపి వశీ ప్రసీద ప్రభో ।।౨।।

మహేశ మహితోఽసి తత్పురుష పూరుషాగ్ర్యో భవాన్
అఘోర రిపుఘోర తేఽనవమ వామదేవాంజలి: ।
నమ: సపదిజాత తే త్వమితి పంచరూపోంఽచిత:
ప్రపంచయ చ పంచవృన్మమ మనస్తమస్తాడయ ।।౩।।

రసాఘనరసానలానిలవియద్వివస్వద్విధు-
ప్రయష్టృషు నివిష్టమిత్యజ భజామి మూర్త్యష్టకమ్ ।
ప్రశాంతముత భీషణం భువనమోహనం చేత్యహో
వపూంషి గుణపుంషి తేఽహమహమాత్మనోఽహం భిదే ।।౪।।

విముక్తిపరమాధ్వనాం తవ షడధ్వనామాస్పదం
పదం నిగమవేదినో జగతి వామదేవాదయ: ।
కథంచిదుపశిక్షితా భగవతైవ సంవిద్రతే
వయం తు విరలాంతరా: కథముమేశ తన్మన్మహే ।।౫।।

కఠోరితకుఠారయా లలితశూలయా బాహయా
రణడ్ఢమరయా స్ఫురద్ధరిణయా సఖట్వాంగయా ।
చలాభిరచలాభిరప్యగణితాభిరున్నృత్యత:
చతుర్దశ జగంతి తే జయ జయేత్యయుర్విస్మయమ్ ।।౬।।

పురత్రిపురరంధనం వివిధదైత్యవిధ్వంసనం
పరాక్రమపరంపరా అపి పరా న తే విస్మయ: ।
అమర్షబలహర్షితక్షుభితవృత్తనేత్రత్రయో-
జ్జ్వలజ్వలన హేలయా శలభితం హి లోకత్రయమ్ ।।౭।।

సహస్రనయనో గుహ: సహసహస్రరశ్మిర్విధు:
బృహస్పతిరుతాప్పతి: ససురసిద్ధవిద్యాధరా: ।
భవత్పదపరాయణా: శ్రియమిమామగు: ప్రార్థినాం
భవాన్ సురతరుర్దృశం దిశ శివాం శివావల్లభ ।।౮।।

తవ ప్రియతమాదతిప్రియతమం సదైవాంతరం
పయస్యుపహితం ఘృతం స్వయమివ శ్రియో వల్లభమ్ ।
విభిద్య లఘుబుద్ధయ: స్వపరపక్షలక్షాయితం
పఠంతి హి లుఠంతి తే శఠహృద: శుచా శుంఠితా: ।।౯।।

నివాసనిలయశ్చితా తవ శిరస్తతిర్మాలికా
కపాలమపి తే కరే త్వమశివోఽస్యనంతర్ధియామ్ ।
తథాఽపి భవత: పదం శివ శివేత్యదో జల్పతాం
అకించన న కించన వృజినమస్త్యభస్మీభవత్ ।।౧౦।।

త్వమేవ కిల కామధుక్ సకలకామమాపూరయన్
అపి త్రినయన: సదా వహసి చాత్రినేత్రోద్భవమ్ ।
విషం విషధరాన్ దధత్ పిబసి తేన చానందవాన్
విరుద్ధచరితోచితా జగదధీశ తే భిక్షుతా ।।౧౧।।

నమ: శివ శివాశివాశివ శివార్ధ కృంతాశివం
నమో హర హరాహరాహరహరాంతరీం మే దృశమ్ ।
నమో భవ భవాభవ ప్రభవ భూతయే సంపదాం
నమో మృడ నమో నమో నమ ఉమేశ తుభ్యం నమ: ।।౧౨।।

సతాం శ్రవణపద్ధతిం సరతు సన్నతోక్తేత్యసౌ
శివస్య కరుణాంకురాత్ ప్రతికృతాత్ సదా సోదితా ।
ఇతి ప్రథితమానసో వ్యధిత నామ నారాయణ:
శివస్తుతిమిమాం శివాం లికుచసూరిసూను: సుధీ: ।।౧౩।।

॥ ఇతి శ్రీ నారాయణపండితాచార్యవిరచితా శ్రీ శివస్తుతిః ॥