ಅಥ ಶ್ರೀಶಿವಸ್ತುತಿ:

ಸ್ಫುಟಂ ಸ್ಫಟಿಕಸಪ್ರಭಂ ಸ್ಫುಟಿತಹಾಟಕಶ್ರೀಜಟಂ
ಶಶಾಂಕದಲಶೇಖರಂ ಕಪಿಲಫುಲ್ಲನೇತ್ರತ್ರಯಮ್ ।
ತರಕ್ಷುವರಕೃತ್ತಿಮದ್ಭುಜಗಭೂಷಣಂ ಭೂತಿಮತ್
ಕದಾ ತು ಶಿತಿಕಂಠ ತೇ ವಪುರವೇಕ್ಷತೇ ವೀಕ್ಷಣಮ್ ।।೧।।

ತ್ರಿಲೋಚನ ವಿಲೋಚನೇ ಲಸತಿ ತೇ ಲಲಾಮಾಯಿತೇ
ಸ್ಮರೋ ನಿಯಮಘಸ್ಮರೋ ನಿಯಮಿನಾಮಭೂದ್ಭಸ್ಮಸಾತ್ ।
ಸ್ವಭಕ್ತಿಲತಯಾ ವಶೀಕೃತವತೀ ಸತೀಯಂ ಸತೀ
ಸ್ವಭಕ್ತವಶಗೋ ಭವಾನಪಿ ವಶೀ ಪ್ರಸೀದ ಪ್ರಭೋ ।।೨।।

ಮಹೇಶ ಮಹಿತೋಽಸಿ ತತ್ಪುರುಷ ಪೂರುಷಾಗ್ರ್ಯೋ ಭವಾನ್
ಅಘೋರ ರಿಪುಘೋರ ತೇಽನವಮ ವಾಮದೇವಾಂಜಲಿ: ।
ನಮ: ಸಪದಿಜಾತ ತೇ ತ್ವಮಿತಿ ಪಂಚರೂಪೋಂಽಚಿತ:
ಪ್ರಪಂಚಯ ಚ ಪಂಚವೃನ್ಮಮ ಮನಸ್ತಮಸ್ತಾಡಯ ।।೩।।

ರಸಾಘನರಸಾನಲಾನಿಲವಿಯದ್ವಿವಸ್ವದ್ವಿಧು-
ಪ್ರಯಷ್ಟೃಷು ನಿವಿಷ್ಟಮಿತ್ಯಜ ಭಜಾಮಿ ಮೂರ್ತ್ಯಷ್ಟಕಮ್ ।
ಪ್ರಶಾಂತಮುತ ಭೀಷಣಂ ಭುವನಮೋಹನಂ ಚೇತ್ಯಹೋ
ವಪೂಂಷಿ ಗುಣಪುಂಷಿ ತೇಽಹಮಹಮಾತ್ಮನೋಽಹಂ ಭಿದೇ ।।೪।।

ವಿಮುಕ್ತಿಪರಮಾಧ್ವನಾಂ ತವ ಷಡಧ್ವನಾಮಾಸ್ಪದಂ
ಪದಂ ನಿಗಮವೇದಿನೋ ಜಗತಿ ವಾಮದೇವಾದಯ: ।
ಕಥಂಚಿದುಪಶಿಕ್ಷಿತಾ ಭಗವತೈವ ಸಂವಿದ್ರತೇ
ವಯಂ ತು ವಿರಲಾಂತರಾ: ಕಥಮುಮೇಶ ತನ್ಮನ್ಮಹೇ ।।೫।।

ಕಠೋರಿತಕುಠಾರಯಾ ಲಲಿತಶೂಲಯಾ ಬಾಹಯಾ
ರಣಡ್ಢಮರಯಾ ಸ್ಫುರದ್ಧರಿಣಯಾ ಸಖಟ್ವಾಂಗಯಾ ।
ಚಲಾಭಿರಚಲಾಭಿರಪ್ಯಗಣಿತಾಭಿರುನ್ನೃತ್ಯತ:
ಚತುರ್ದಶ ಜಗಂತಿ ತೇ ಜಯ ಜಯೇತ್ಯಯುರ್ವಿಸ್ಮಯಮ್ ।।೬।।

ಪುರತ್ರಿಪುರರಂಧನಂ ವಿವಿಧದೈತ್ಯವಿಧ್ವಂಸನಂ
ಪರಾಕ್ರಮಪರಂಪರಾ ಅಪಿ ಪರಾ ನ ತೇ ವಿಸ್ಮಯ: ।
ಅಮರ್ಷಬಲಹರ್ಷಿತಕ್ಷುಭಿತವೃತ್ತನೇತ್ರತ್ರಯೋ-
ಜ್ಜ್ವಲಜ್ವಲನ ಹೇಲಯಾ ಶಲಭಿತಂ ಹಿ ಲೋಕತ್ರಯಮ್ ।।೭।।

ಸಹಸ್ರನಯನೋ ಗುಹ: ಸಹಸಹಸ್ರರಶ್ಮಿರ್ವಿಧು:
ಬೃಹಸ್ಪತಿರುತಾಪ್ಪತಿ: ಸಸುರಸಿದ್ಧವಿದ್ಯಾಧರಾ: ।
ಭವತ್ಪದಪರಾಯಣಾ: ಶ್ರಿಯಮಿಮಾಮಗು: ಪ್ರಾರ್ಥಿನಾಂ
ಭವಾನ್ ಸುರತರುರ್ದೃಶಂ ದಿಶ ಶಿವಾಂ ಶಿವಾವಲ್ಲಭ ।।೮।।

ತವ ಪ್ರಿಯತಮಾದತಿಪ್ರಿಯತಮಂ ಸದೈವಾಂತರಂ
ಪಯಸ್ಯುಪಹಿತಂ ಘೃತಂ ಸ್ವಯಮಿವ ಶ್ರಿಯೋ ವಲ್ಲಭಮ್ ।
ವಿಭಿದ್ಯ ಲಘುಬುದ್ಧಯ: ಸ್ವಪರಪಕ್ಷಲಕ್ಷಾಯಿತಂ
ಪಠಂತಿ ಹಿ ಲುಠಂತಿ ತೇ ಶಠಹೃದ: ಶುಚಾ ಶುಂಠಿತಾ: ।।೯।।

ನಿವಾಸನಿಲಯಶ್ಚಿತಾ ತವ ಶಿರಸ್ತತಿರ್ಮಾಲಿಕಾ
ಕಪಾಲಮಪಿ ತೇ ಕರೇ ತ್ವಮಶಿವೋಽಸ್ಯನಂತರ್ಧಿಯಾಮ್ ।
ತಥಾಽಪಿ ಭವತ: ಪದಂ ಶಿವ ಶಿವೇತ್ಯದೋ ಜಲ್ಪತಾಂ
ಅಕಿಂಚನ ನ ಕಿಂಚನ ವೃಜಿನಮಸ್ತ್ಯಭಸ್ಮೀಭವತ್ ।।೧೦।।

ತ್ವಮೇವ ಕಿಲ ಕಾಮಧುಕ್ ಸಕಲಕಾಮಮಾಪೂರಯನ್
ಅಪಿ ತ್ರಿನಯನ: ಸದಾ ವಹಸಿ ಚಾತ್ರಿನೇತ್ರೋದ್ಭವಮ್ ।
ವಿಷಂ ವಿಷಧರಾನ್ ದಧತ್ ಪಿಬಸಿ ತೇನ ಚಾನಂದವಾನ್
ವಿರುದ್ಧಚರಿತೋಚಿತಾ ಜಗದಧೀಶ ತೇ ಭಿಕ್ಷುತಾ ।।೧೧।।

ನಮ: ಶಿವ ಶಿವಾಶಿವಾಶಿವ ಶಿವಾರ್ಧ ಕೃಂತಾಶಿವಂ
ನಮೋ ಹರ ಹರಾಹರಾಹರಹರಾಂತರೀಂ ಮೇ ದೃಶಮ್ ।
ನಮೋ ಭವ ಭವಾಭವ ಪ್ರಭವ ಭೂತಯೇ ಸಂಪದಾಂ
ನಮೋ ಮೃಡ ನಮೋ ನಮೋ ನಮ ಉಮೇಶ ತುಭ್ಯಂ ನಮ: ।।೧೨।।

ಸತಾಂ ಶ್ರವಣಪದ್ಧತಿಂ ಸರತು ಸನ್ನತೋಕ್ತೇತ್ಯಸೌ
ಶಿವಸ್ಯ ಕರುಣಾಂಕುರಾತ್ ಪ್ರತಿಕೃತಾತ್ ಸದಾ ಸೋದಿತಾ ।
ಇತಿ ಪ್ರಥಿತಮಾನಸೋ ವ್ಯಧಿತ ನಾಮ ನಾರಾಯಣ:
ಶಿವಸ್ತುತಿಮಿಮಾಂ ಶಿವಾಂ ಲಿಕುಚಸೂರಿಸೂನು: ಸುಧೀ: ।।೧೩।।

॥ ಇತಿ ಶ್ರೀ ನಾರಾಯಣಪಂಡಿತಾಚಾರ್ಯವಿರಚಿತಾ ಶ್ರೀ ಶಿವಸ್ತುತಿಃ ॥