ಶ್ರೀರಮೇಶಗೀತಿಃ 
ಅಥ ಶ್ರೀರಮೇಶಗೀತಿಃ 
ಜಲಚರತಯಾ ದದೌ ವೇದಮಾದೌ 
ತರುಣತರಣಿಚ್ಛವಿರ್ಯೋ ವಿಧಾತ್ರೇ |  
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||1||
ಅಧೃತ ಸುಮನೋಮನೋವಲ್ಲಭೋ ಯಃ 
ಕಮಠವಪುಷಾ ಮಹಾಮಂದರಾದ್ರಿಮ್‌ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||2||
ಜಿತದಿತಿಸುತೋ ವರಾಹೋ ವರೇಣ್ಯೋ 
ಧರಣಿಮುದಧಾದಧೀರಾಂ ಪುರಾ ಯಃ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||3||
ದಿತಿಗಜರಾಜವಿಧ್ವಂಸಸಿಂಹಂ 
ಪ್ರಖರನಖರಾಖ್ಯವಜ್ರಂ ನೃಸಿಂಹಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||4||
ಅನುಜಮಮರಾಧಿರಾಜಸ್ಯ ಬಾಲಂ 
ಸಿತಬತಿಬಲಂ ತ್ರಿವಿಕ್ರಾಂತಿಮಂತಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||5||
ಅವನಿಪವನಾನಲಂ ಜಾಮದಗ್ನ್ಯಂ 
ಗಿರಿಶವರದಾಯಿನಂ ರಾಮದೇವಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||6||
ದಶಮುಖಮುಖದ್ವಿಜಾಹಾರಿಮೃತ್ಯುಂ 
ದಶರಥಸುತಂ ಪತಿಂ ಭೂಮಿಜಾಯಾಃ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||7||
ಮಥಿತಪೃಥಿವೀಭರಂ ವಾಸುದೇವಂ 
ಮಧುರಮಧಿಕಪ್ರಿಯಂ ಪಾಂಡವಾನಾಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||8||
ಅಸುರಮನಸಾಂ ಮಹಾಮೋಹಹೇತುಂ 
ವಿಶದಮನಸಾಂ ಹಿತಂ ಬುದ್ಧರೂಪಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||9||
ಕಲಿಕಲಿಲಕಾಲವೈಕಲ್ಯಮೂಲಂ 
ಕಲಿತಖಲಸಂಕಟಂ ಕಲ್ಕಿದೇವಮ್  |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||10||
ಅಗಣಿತಗುಣಂ ಗುಣಾಪೇತಮೇಕಂ 
ವಿಧಿಮುಖವಿಚಿಂತಿತಂ ಬ್ರಹ್ಮಸಂಜ್ಞಮ್‌
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||11||
ದಶಶತತನುಂ ತಥಾಪ್ಯೇಕರೂಪಂ 
ದಶಶತತನುಂ ತಥಾನಂತರೂಪಮ್ |
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||12||
ಲಿಕುಚಕವಿನಂದನಃ ಸನ್ನುಪಾಂತ್ಯೋ 
ವ್ಯದಧದಿತಿ ವೈ ರಮೇಶಸ್ಯ ಗೀತಿಮ್ 
ಶರಣದಮದೋಷಮಾನಂದಪೂರ್ಣಂ 
ಶರಣಮನಿಷಂ ರಮೇಶಂ ಪ್ರಪದ್ಯೇ ||13||
|| ಇತಿ ಶ್ರೀಮತ್ ಶಂಕರಪಂಡಿತಾಚಾರ್ಯಕೃತಾ ಶ್ರೀರಮೇಶಗೀತಿಃ ||