అథ శ్రీరఘువర్యతీర్థస్తుతిః
రఘునాథకరాబ్జోత్థం మూలరామపదార్చకం |
రఘువర్యమహం వందే దేవార్చాభాగ్యసిద్ధయే ||1||

పెన్గొండానామకే గ్రామే హనూమత్స్థాపకం మునిం |
రఘువర్యమహం వందే ప్రాణార్చాభాగ్యసిద్ధయే ||2||

భీమానదీ దదౌ మార్గం యస్మై రామయుతాయ తం |
రఘువర్యమహం వందే భవోత్తారణసిద్ధయే ||3||

రఘూత్తమగురోస్తారస్యోపదేశవిధాయకం |
రఘువర్యమహం వందే సన్మంత్రజపసిద్ధయే ||4||

సచ్ఛాస్త్రం పాఠయంతం శ్రీరఘూత్తమమునిం ప్రతి |
రఘువర్యమహం వందే సచ్ఛాస్త్రజ్ఞానసిద్ధయే ||5||

మంత్రాక్షతప్రదానేన సత్పుత్రప్రాపకం గురుం |
రఘువర్యమహం వందే సత్పుత్రప్రాప్తిసిద్ధయే ||6||

రఘూత్తమమునేః స్వప్న ఉపదేశప్రదాయకం |
రఘువర్యమహం వందే హ్యశ్రుతజ్ఞానసిద్ధయే ||7||

రఘూత్తమమునిద్వారా మఠవైభవవర్ధకం |
రఘువర్యమహం వందే సద్వైభవసుసిద్ధయే ||8||

గజగహ్వరగం తుంగభద్రాతీరనివాసినం |
రఘువర్యమహం వందే నదీస్నానసుసిద్ధయే ||9||

పద్మనాభకవీంద్రాదిపూర్వే సంస్థితమాదరాత్ |
రఘువర్యమహం వందే గుర్వనుగ్రహసిద్ధయే ||10||

సత్యాత్మరచితం పద్యదశకం యః పఠేత్ సుధీః |
తస్యైతాః సిద్ధయః సర్వా హస్తగా నాత్ర సంశయః ||11||

|| ఇతి శ్రీసత్యాత్మతీర్థవిరచితా శ్రీరఘువర్యతీర్థస్తుతిః ||