ಅಥ ಶ್ರೀರಘುವರ್ಯತೀರ್ಥಸ್ತುತಿಃ
ರಘುನಾಥಕರಾಬ್ಜೋತ್ಥಂ ಮೂಲರಾಮಪದಾರ್ಚಕಮ್ |
ರಘುವರ್ಯಮಹಂ ವಂದೇ ದೇವಾರ್ಚಾಭಾಗ್ಯಸಿದ್ಧಯೇ ||1||

ಪೆನ್ಗೊಂಡಾನಾಮಕೇ ಗ್ರಾಮೇ ಹನೂಮತ್ಸ್ಥಾಪಕಂ ಮುನಿಮ್ |
ರಘುವರ್ಯಮಹಂ ವಂದೇ ಪ್ರಾಣಾರ್ಚಾಭಾಗ್ಯಸಿದ್ಧಯೇ ||2||

ಭೀಮಾನದೀ ದದೌ ಮಾರ್ಗಂ ಯಸ್ಮೈ ರಾಮಯುತಾಯ ತಮ್ |
ರಘುವರ್ಯಮಹಂ ವಂದೇ ಭವೋತ್ತಾರಣಸಿದ್ಧಯೇ ||3||

ರಘೂತ್ತಮಗುರೋಸ್ತಾರಸ್ಯೋಪದೇಶವಿಧಾಯಕಮ್ |
ರಘುವರ್ಯಮಹಂ ವಂದೇ ಸನ್ಮಂತ್ರಜಪಸಿದ್ಧಯೇ ||4||

ಸಚ್ಛಾಸ್ತ್ರಂ ಪಾಠಯಂತಂ ಶ್ರೀರಘೂತ್ತಮಮುನಿಂ ಪ್ರತಿ |
ರಘುವರ್ಯಮಹಂ ವಂದೇ ಸಚ್ಛಾಸ್ತ್ರಜ್ಞಾನಸಿದ್ಧಯೇ ||5||

ಮಂತ್ರಾಕ್ಷತಪ್ರದಾನೇನ ಸತ್ಪುತ್ರಪ್ರಾಪಕಂ ಗುರುಮ್ |
ರಘುವರ್ಯಮಹಂ ವಂದೇ ಸತ್ಪುತ್ರಪ್ರಾಪ್ತಿಸಿದ್ಧಯೇ ||6||

ರಘೂತ್ತಮಮುನೇಃ ಸ್ವಪ್ನ ಉಪದೇಶಪ್ರದಾಯಕಮ್ |
ರಘುವರ್ಯಮಹಂ ವಂದೇ ಹ್ಯಶ್ರುತಜ್ಞಾನಸಿದ್ಧಯೇ ||7||

ರಘೂತ್ತಮಮುನಿದ್ವಾರಾ ಮಠವೈಭವವರ್ಧಕಮ್ |
ರಘುವರ್ಯಮಹಂ ವಂದೇ ಸದ್ವೈಭವಸುಸಿದ್ಧಯೇ ||8||

ಗಜಗಹ್ವರಗಂ ತುಂಗಭದ್ರಾತೀರನಿವಾಸಿನಮ್ |
ರಘುವರ್ಯಮಹಂ ವಂದೇ ನದೀಸ್ನಾನಸುಸಿದ್ಧಯೇ ||9||

ಪದ್ಮನಾಭಕವೀಂದ್ರಾದಿಪೂರ್ವೇ ಸಂಸ್ಥಿತಮಾದರಾತ್ |
ರಘುವರ್ಯಮಹಂ ವಂದೇ ಗುರ್ವನುಗ್ರಹಸಿದ್ಧಯೇ ||10||

ಸತ್ಯಾತ್ಮರಚಿತಂ ಪದ್ಯದಶಕಂ ಯಃ ಪಠೇತ್ ಸುಧೀಃ |
ತಸ್ಯೈತಾಃ ಸಿದ್ಧಯಃ ಸರ್ವಾ ಹಸ್ತಗಾ ನಾತ್ರ ಸಂಶಯಃ ||11||

|| ಇತಿ ಶ್ರೀಸತ್ಯಾತ್ಮತೀರ್ಥವಿರಚಿತಾ ಶ್ರೀರಘುವರ್ಯತೀರ್ಥಸ್ತುತಿಃ ||