atha śrīraghuvaryatīrthastutiḥ
raghunāthakarābjōtthaṁ mūlarāmapadārcakam |
raghuvaryamahaṁ vaṁdē dēvārcābhāgyasiddhayē ||1||

pengoṁḍānāmakē grāmē hanūmatsthāpakaṁ munim |
raghuvaryamahaṁ vaṁdē prāṇārcābhāgyasiddhayē ||2||

bhīmānadī dadau mārgaṁ yasmai rāmayutāya tam |
raghuvaryamahaṁ vaṁdē bhavōttāraṇasiddhayē ||3||

raghūttamagurōstārasyōpadēśavidhāyakam |
raghuvaryamahaṁ vaṁdē sanmaṁtrajapasiddhayē ||4||

sacchāstraṁ pāṭhayaṁtaṁ śrīraghūttamamuniṁ prati |
raghuvaryamahaṁ vaṁdē sacchāstrajñānasiddhayē ||5||

maṁtrākṣatapradānēna satputraprāpakaṁ gurum |
raghuvaryamahaṁ vaṁdē satputraprāptisiddhayē ||6||

raghūttamamunēḥ svapna upadēśapradāyakam |
raghuvaryamahaṁ vaṁdē hyaśrutajñānasiddhayē ||7||

raghūttamamunidvārā maṭhavaibhavavardhakam |
raghuvaryamahaṁ vaṁdē sadvaibhavasusiddhayē ||8||

gajagahvaragaṁ tuṁgabhadrātīranivāsinam |
raghuvaryamahaṁ vaṁdē nadīsnānasusiddhayē ||9||

padmanābhakavīṁdrādipūrvē saṁsthitamādarāt |
raghuvaryamahaṁ vaṁdē gurvanugrahasiddhayē ||10||

satyātmaracitaṁ padyadaśakaṁ yaḥ paṭhēt sudhīḥ |
tasyaitāḥ siddhayaḥ sarvā hastagā nātra saṁśayaḥ ||11||

|| iti śrīsatyātmatīrthaviracitā śrīraghuvaryatīrthastutiḥ ||