శ్రీరఘూత్తమగురుస్తోత్రమ్
॥ అథ శ్రీరఘూత్తమగురుస్తోత్రమ్ ॥
గంభీరాశయగుంభసంభృతవచ:సందర్భగర్భోల్లసత్- 
టీకాభావవిబోధనాయ జగతాం యస్యావతారోఽజని ।
తత్తాదృక్షదురంతసంతతతప:సంతానసంతోషిత- 
శ్రీకాంతం సుగుణం రఘూత్తమగురుం వందే పరం దేశికమ్ ॥౧॥
సచ్ఛాస్త్రామలభావబోధకిరణై: సంవర్ధయన్ మధ్వసత్- 
సిద్ధాంతాబ్ధిమనంతశిష్యకుముదవ్రాతం వికాసం నయన్ ।
ఉద్భూతో రఘువర్యతీర్థజలధేస్తాపత్రయం త్రాసయన్
యస్తం నౌమి రఘూత్తమాఖ్యశశినం శ్రీవిష్ణుపాదాశ్రయమ్ ॥౨॥
ఉద్యన్మార్తండసంకాశం దండమాలాకమండలూన్ ।
ధరం కౌపీనసూత్రం చ సీతారాఘవమానసమ్ ॥౩॥
శ్రీనివాసేన వంద్యాంఘ్రిం తులసీదామభూషణమ్ ।
ధ్యాయేద్రఘూత్తమగురుం సర్వసౌఖ్యప్రదం నృణామ్ ॥౪॥
రఘూత్తమగురుం నౌమి శాంత్యాదిగుణమండితమ్ ।
రఘూత్తమపదద్వంద్వకంజభృంగాయితాంతరమ్ ॥౫॥
రఘూత్తమగురుం వందే రఘూత్తమపదార్చకమ్ ।
గాంభీర్యేణార్థబాహుల్యటీకాతాత్పర్యబోధకమ్ ॥౬॥
భావబోధకృతం నౌమి భావభావితభావుకమ్ ।
భావభాజం భావజాదిపరీభావపరాయణమ్ ॥౭॥
సంన్యాయవివృతేష్టీకాశేషసంపూర్ణకారిణమ్ ।
టీకాం దృష్ట్వా పేటికానాం నిచయం చ చకార య:
ప్రమేయమణిమాలానాం స్థాపనాయ మహామతి: ॥౮॥
యచ్ఛిష్యశిష్యశిష్యాద్యాష్టిప్పణ్యాచార్యసంజ్ఞితా: ।
తమలం భావబోధార్యం భూయో భూయో నమామ్యహమ్ ॥౯॥
శుకేన శాంత్యాదిషు వాఙ్మయేషు వ్యాసేన ధైర్యేంఽబుధినోపమేయమ్ ।
మనోజజిత్యాం మనసాం హి పత్యా రఘూత్తమాఖ్యం స్వగురుం నమామి ॥౧౦॥
రామ రామ తవ పాదపంకజం చింతయామి భవబంధముక్తయే ।
వందితం సురనరేంద్రమౌలిభిర్ధ్యాయతే మనసి యోగిభి: సదా ॥౧౧॥
పినాకినీరసంజుష్టదేశే వాసమనోరమమ్ ।
పినాకిపూజ్యశ్రీమధ్వశాస్త్రవార్ధినిశాకరమ్ ॥౧౨॥
పంచకైర్భావబోధాఖ్యైర్గ్రంథై: పంచ లసన్ముఖై: । 
తత్త్వవిజ్ఞాపకై: స్వానాముపమేయం పినాకినా ॥౧౩॥
గాంభీర్యే సర్వదుర్వాదిగిరిపక్షవిదారణే ।
విషయేషు విరాగిత్వే చోపమేయం పినాకినా ॥౧౪॥
ధరణే భగవన్మూర్తేర్భరణే భక్తసంతతే: ।
వినా వినా చోపమేయం మేయం తత్త్వప్రకాశనే ॥౧౫॥
గురుత్వేఽఖిలలోకానాం ప్రదానేఽభీష్టసంతతే: ।
శిష్యేభ్యస్తత్త్వవిజ్ఞానప్రదానే పరమం గురుమ్ ॥౧౬॥
సదారరామపాదాబ్జసదారతిసుధాకరమ్ ।
సదాఽరిభేదనే విష్ణుగదారిసదృశం సదా ॥౧౭॥
రఘునాథాంఘ్రిసద్భక్తౌ రఘునాథానుజాయితమ్ ।
రఘునాథార్యపాణ్యుత్థరఘువర్యకరోదితమ్ ॥౧౮॥
వేదేశార్చితపాదాబ్జం వేదేశాంఘ్ర్యబ్జపూజకమ్ ।
రఘూత్తమగురుం వందే రఘూత్తమపదార్చకమ్ ॥౧౯॥
రఘూత్తమగురుస్తోత్రస్యాష్టకం య: పఠేన్నర: ।
రఘూత్తమప్రసాదాచ్చ స సర్వాభీష్టభాగ్భవేత్ ॥౨౦॥
యద్వృందావనపూర్వత: ఫలవతీ ధాత్రీ జగత్పావనీ
యామ్యాయాం తు పినాకినీ చలదలో మూర్తిత్రయాధిష్ఠిత: ।
వారుణ్యాం దిశి వామత: ప్రతికృతౌ ఛాయాకృతా తింత్రిణీ
తద్వృందావనమధ్యగో గురువరో భూయాత్ స న: శ్రేయసే ॥౨౧॥
ప్రణమత్కామధేనుం చ భజత్సురతరూపమమ్ ।
శ్రీభావబోధకృత్పాదచింతామణిముపాస్మహే ॥౨౨॥
॥ ఇతి శ్రీరఘూత్తమగురుస్తోత్రమ్ ॥