ಅಥ ಶ್ರೀರಘೂತ್ತಮಮಂಗಲಾಷ್ಟಕಂ
ಶ್ರೀಮದ್ಯ್ವಾಸಸುತೀರ್ಥಪೂಜ್ಯಚರಣಶ್ರೀಪಾದರಾಟ್ಸಂಸ್ತುತ-
ಶ್ರೀಮಚ್ಛ್ರೀರಘುನಾಥತೀರ್ಥಯಮಿಸದ್ಧಸ್ತೋದಯಾತ್ ಸದ್ಗುರೋಃ |
ಧೀರಶ್ರೀರಘುವರ್ಯತೀರ್ಥಮುನಿತಃ ಸಂಪ್ರಾಪ್ತತುರ್ಯಾಶ್ರಮಃ
ಯೋಗೀಶವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||1||

ಶ್ರೀಮದ್ರಾಮಪದಾಬ್ಜಭಕ್ತಿಭರಿತಃ ಶ್ರೀವ್ಯಾಸಸೇವಾರತಃ
ಸನ್ಮಾನ್ಯೋರುಸಮೀರವಂಶವಿಲಸತ್ಸತ್ಕೀರ್ತಿವಿಸ್ಫಾರಕಃ |
ಪ್ರೀತ್ಯರ್ಥಂ ಪುರುಷೋತ್ತಮಸ್ಯ ಸತತಂ ಶಾಸ್ತ್ರಾರ್ಥಚರ್ಚಾಚಣಃ
ಯೋಗೀಶವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||2||

ವಾಚಂ ವಾಚಮನಂತಬುದ್ಧಿಸುಕೃತಂ ಶಾಸ್ತ್ರಂ ಸದಾ ಶುದ್ಧಿಮಾನ್
ಜಾಪಂ ಜಾಪಮಮೋಘಮಂತ್ರನಿವಹಂ ಸಂಪ್ರಾಪ್ತಸಿದ್ಧ್ಯಷ್ಟಕಃ |
ಧ್ಯಾಯಂ ಧ್ಯಾಯಮಮೇಯಮೂರ್ತಿಮಮಲಾಂ ಜಾತಾಪರೋಕ್ಷಃ ಸುಧೀಃ
ಯೋಗೀಶವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||3||

ಯದ್ವೃಂದಾವನಸೇವಯಾ ಸುವಿಪುಲಾ ವಿದ್ಯಾನವದ್ಯಾ ಭವೇತ್
ಯನ್ನಾಮಗ್ರಹಣೇನ ಪಾಪನಿಚಯೋ ದಹ್ಯೇತ ನಿಶ್ಚಪ್ರಚಂ |
ಯನ್ನಾಮಸ್ಮರಣೇನ ಖೇದನಿವಹಾತ್ ಸಂಕೃಷ್ಯತೇ ಸಜ್ಜನಃ
ಯೋಗೀಶವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||4||

ತಾರೇಶಾಚ್ಛಪಿನಾಕಿನೀಸುತಟಿನೀತೀರೇ ಪಿನಾಕಿಸ್ತುತೇ
ದ್ವಾರೇ ಮೋಕ್ಷನಿಕೇತನಸ್ಯ ವಸುಧಾಸಾರೇ ಸುಖಾಸಾರಕೃತ್ |
ಯೋಗೀಡ್ಯೋ ಮಹಿಮಾ ಹಿ ಯಸ್ಯ ಪರಮಃ ಪಾರೇ ಗಿರಾಂ ಮಾದೃಶಾಂ
ಯೋಗೀಶವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||5||

ಬಾಲ್ಯೇಽಧ್ಯಾಪಕತೋಽವಮಾನಸುಮಹಾಶಲ್ಯಾನುವಿದ್ಧಾಂತರಃ
ಕಲ್ಯೇ ಸ್ವಪ್ನಗುರೂದಿತೇನ ಹಿ ಸುಧಾತುಲ್ಯೇನ ಸೂರ್ಯಗ್ರಣೀಃ |
ಕುಲ್ಯೇನ ದ್ವಿಜಮಂಡಲೇನ ಮಹಿತಃ ಸ್ವಲ್ಪೇತರೇಷಾಂ ಸುಧಾ-
ಕುಲ್ಯಾನಂದಕರೋ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||6||

ಸೂರ್ಯಾಶ್ಚರ್ಯಕರೋಪಲಬ್ಧವಿಭವಃ ಸೂರ್ಯಾತುಲೋರುಪ್ರಭಃ
ಭೂರ್ಯಾಚಾರ್ಯಸುಸೇವಕೇಷ್ಟಫಲದಸ್ತುರ್ಯಾಶ್ರಿತಾನುಗ್ರಹಃ |
ಸ್ವರ್ಯಾತಾಚ್ಛಯಶಾಸ್ತಪೋಽಧಿಮಹಿಮೈಶ್ವರ್ಯಾಲಯೋಂಹೋಲಯಃ
ವರ್ಯಾಚಾರ್ಯಗುರೂ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||7||

ವೈರಾಗ್ಯಾದಿಗುಣಾಕರೋ ವನಕರೋ ದಾನೇ ಸದೋದ್ಯತ್ಕರೋ
ಭಾಸ್ವದ್ಭಕ್ತಿಚಿದುತ್ಕರೋ ಜಯಕರಃ ಶ್ರೀಶಾಂಘ್ರಿಸತ್ಕಿಂಕರಃ |
ದೋಷಾಂಕೂರಮರುಃ ಶ್ರಿತಾಮರತರುರ್ದುವಾದವೃಕ್ಷತ್ಸರುಃ
ಮರ್ತ್ಯಾತೀತಗುರೂ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||8||

ಸರ್ವಜ್ಞಪ್ರಿಯಸಜ್ಜಯಾರ್ಯವಿವೃತೇಃ ಭಾವಾವಬೋಧಾಮೃತೀ-
ಭಾವಾಢ್ಯಾಃ ಸುಕೃತೀರ್ವಿಧಾಯ ವಿಶಯಾಭಾವಾಯ ಸುಜ್ಞಾನಿನಾಂ |
ಸೇವಾನಮ್ರಜನೇಷ್ಟದಾನಮಹಸಾ ದೇವಾವನೀಕ್ಷ್ಮಾರುಹೋ
ವ್ರೀಡಾಪಾದಯಿತಾ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||9||

ರಾಮಾರಾಮಯಮೀಂದ್ರವಂದ್ಯಚರಣಃ ಸಾಮಾದಿಮಾನೋರುಮಃ
ಆಮ್ನಾಯಾದಿಸುಗೇಯಮೇಯಮಹಿಮಾಶ್ರೀಮೂಲರಾಮಾರ್ಚಕಃ |
ಸೀಮಾ ಸತ್ಕರುಣಾರಸಸ್ಯ ಚರಮಾ ಸೋಮಾಯಮಾನೋ ಮುನಿ-
ಸ್ತೋಮಾನಾಂ ವ್ರತಿರಾಟ್ ರಘೂತ್ತಮಗುರುಃ ಕುರ್ಯಾತ್ ಸದಾ ಮಂಗಲಂ ||10

ವೇದವ್ಯಾಸೋರುಯೋಗೀ ಯದುಪತಿಸುಗುರುರ್ವಂದ್ಯವೇದೇಶಭಿಕ್ಷುಃ
ವಿದ್ಯಾವದ್ವರ್ಯಧುರ್ಯಪ್ರಥಿತವಿವರಣಗ್ರಂಥನಿರ್ಮಾಣವಿತ್ತಃ |
ವಿದ್ಯಾಧೀಶೋಽಪಿ ತದ್ವದ್ ಬುಧಜನಮಣಯೋ ಯಸ್ಯ ಶಿಷ್ಯಾ ಪ್ರಶಿಷ್ಯಾಃ
ಸೋಽಯಂ ಶ್ರೀಯೋಗಿರಾಜೋ ರಘುವರತನಯೋ ಮಂಗಲಾನ್ಯಾತನೋತು ||11||

ಕಾಶೀಕಾಂಚೀಸುಮಾಯಾಹಿಮಗಿರಿಮಧುರಾದ್ವಾರಕಾವೇಂಕಟಾದ್ರಿ-
ಶ್ರೀರಂಗಕ್ಷೇತ್ರಪೂರ್ವತ್ರಿಭುವನವಿಲಸತ್ಪುಣ್ಯವೃಂದಾವನಸ್ಥಃ |
ಗುಲ್ಮಾದಿವ್ಯಾಧಿಹರ್ತಾ ಗ್ರಹಜನಿತಮಹಾಭೀತಿವಿಧ್ವಂಸಕರ್ತಾ
ಭೂತಪ್ರೇತಾದಿಭೇದೀ ರಘುವರತನಯೋ ಮಂಗಲಾನ್ಯಾತನೋತು ||12||

ಮೂಢಾಗ್ರಣೀಃ ವೇಂಕಟಭಟ್ಟಸೂದಃ
ಸೂರ್ಯಗ್ರಗಣ್ಯೋಽಭವದಾತ್ಮವೇದೀ |
ಯಸ್ಯ ಪ್ರಸಾದಾತ್ ಸ ಗುರುಪ್ರಬರ್ಹೋ
ವಿದ್ಯಾಮಬಾಧಾಂ ವಿಪುಲಾಂ ಪ್ರದದ್ಯಾತ್ ||13||

ನ್ಯಾಯಾಮೃತಂ ನ್ಯಾಯವಚೋವಿಶೇಷೈಃ
ಸುಸಾರಭೂತಂ ಸುಘನತ್ವಮಾಪ್ತಂ |
ಪ್ರವಾಹಯಾಮಾಸ ತರಂಗಿಣೀಮಿಷಾತ್
ಸ ವ್ಯಾಸರಾಮೋಽಪಿ ತದೀಯಶಿಷ್ಯಃ ||14||

|| ಇತಿ ಶ್ರೀರಘೂತ್ತಮತೀರ್ಥಮಂಗಲಸ್ತುತಿಃ ||