atha shrIraghUttamamaMgalAShTakaM
shrImadyvAsasutIrthapUjyacharaNashrIpAdarATsaMstuta-
shrImachChrIraghunAthatIrthayamisaddhastodayAt sadguroH |
dhIrashrIraghuvaryatIrthamunitaH saMprAptaturyAshramaH
yogIshavratirAT raghUttamaguruH kuryAt sadA maMgalaM ||1||

shrImadrAmapadAbjabhaktibharitaH shrIvyAsasevArataH
sanmAnyorusamIravaMshavilasatsatkIrtivisphArakaH |
prItyarthaM puruShottamasya satataM shAstrArthacharchAchaNaH
yogIshavratirAT raghUttamaguruH kuryAt sadA maMgalaM ||2||

vAchaM vAchamanaMtabuddhisukR^itaM shAstraM sadA shuddhimAn
jApaM jApamamoghamaMtranivahaM saMprAptasiddhyaShTakaH |
dhyAyaM dhyAyamameyamUrtimamalAM jAtAparokShaH sudhIH
yogIshavratirAT raghUttamaguruH kuryAt sadA maMgalaM ||3||

yadvR^iMdAvanasevayA suvipulA vidyAnavadyA bhavet
yannAmagrahaNena pApanichayo dahyeta nishchaprachaM |
yannAmasmaraNena khedanivahAt saMkR^iShyate sajjanaH
yogIshavratirAT raghUttamaguruH kuryAt sadA maMgalaM ||4||

tAreshAchChapinAkinIsutaTinItIre pinAkistute
dvAre mokShaniketanasya vasudhAsAre sukhAsArakR^it |
yogIDyo mahimA hi yasya paramaH pAre girAM mAdR^ishAM
yogIshavratirAT raghUttamaguruH kuryAt sadA maMgalaM ||5||

bAlye.adhyApakato.avamAnasumahAshalyAnuviddhAMtaraH
kalye svapnagurUditena hi sudhAtulyena sUryagraNIH |
kulyena dvijamaMDalena mahitaH svalpetareShAM sudhA-
kulyAnaMdakaro raghUttamaguruH kuryAt sadA maMgalaM ||6||

sUryAshcharyakaropalabdhavibhavaH sUryAtuloruprabhaH
bhUryAchAryasusevakeShTaphaladasturyAshritAnugrahaH |
svaryAtAchChayashAstapo.adhimahimaishvaryAlayoMholayaH
varyAchAryagurU raghUttamaguruH kuryAt sadA maMgalaM ||7||

vairAgyAdiguNAkaro vanakaro dAne sadodyatkaro
bhAsvadbhaktichidutkaro jayakaraH shrIshAMghrisatkiMkaraH |
doShAMkUramaruH shritAmaratarurduvAdavR^ikShatsaruH
martyAtItagurU raghUttamaguruH kuryAt sadA maMgalaM ||8||

sarvaj~napriyasajjayAryavivR^iteH bhAvAvabodhAmR^itI-
bhAvADhyAH sukR^itIrvidhAya vishayAbhAvAya suj~nAninAM |
sevAnamrajaneShTadAnamahasA devAvanIkShmAruho
vrIDApAdayitA raghUttamaguruH kuryAt sadA maMgalaM ||9||

rAmArAmayamIMdravaMdyacharaNaH sAmAdimAnorumaH
AmnAyAdisugeyameyamahimAshrImUlarAmArchakaH |
sImA satkaruNArasasya charamA somAyamAno muni-
stomAnAM vratirAT raghUttamaguruH kuryAt sadA maMgalaM ||10

vedavyAsoruyogI yadupatisugururvaMdyavedeshabhikShuH
vidyAvadvaryadhuryaprathitavivaraNagraMthanirmANavittaH |
vidyAdhIsho.api tadvad budhajanamaNayo yasya shiShyA prashiShyAH
so.ayaM shrIyogirAjo raghuvaratanayo maMgalAnyAtanotu ||

kAshIkAMchIsumAyAhimagirimadhurAdvArakAveMkaTAdri-
shrIraMgakShetrapUrvatribhuvanavilasatpuNyavR^iMdAvanasthaH |
gulmAdivyAdhihartA grahajanitamahAbhItividhvaMsakartA
bhUtapretAdibhedI raghuvaratanayo maMgalAnyAtanotu ||12||

mUDhAgraNIH veMkaTabhaTTasUdaH
sUryagragaNyo.abhavadAtmavedI |
yasya prasAdAt sa guruprabarho
vidyAmabAdhAM vipulAM pradadyAt ||13||

nyAyAmR^itaM nyAyavachovisheShaiH
susArabhUtaM sughanatvamAptaM |
pravAhayAmAsa taraMgiNImiShAt
sa vyAsarAmo.api tadIyashiShyaH ||14||

|| iti shrIraghUttamatIrthamaMgalastutiH ||