શ્રીરાઘવેંદ્રસ્તોત્રમ્
॥ અથ શ્રીરાઘવેંદ્રસ્તોત્રમ્ ॥
શ્રીપૂર્ણબોધગુરુતીર્થપયોબ્ધિપારા
કામારિમાક્ષવિષમાક્ષશિર:સ્પૃશંતી ।
પૂર્વોત્તરામિતતરંગચરત્સુહંસા 
દેવાલિસેવિતપરાંઘ્રિપયોજલગ્ના ॥૧॥ 
જીવેશભેદગુણપૂર્તિજગત્સુસત્ત્વ- 
નીચોચ્ચભાવમુખનક્રગણૈ: સમેતા ।
દુર્વાદ્યજાપતિગિલૈર્ગુરુરાઘવેંદ્ર-
વાગ્દેવતાસરિદમું વિમલીકરોતુ ॥૨॥
શ્રીરાઘવેંદ્ર: સકલપ્રદાતા 
સ્વપાદકંજદ્વયભક્તિમદ્ભ્ય: ।
અઘાદ્રિસંભેદનદૃષ્ટિવજ્ર: 
ક્ષમાસુરેંદ્રોઽવતુ માં સદાઽયમ્ ॥૩॥
શ્રીરાઘવેંદ્રો હરિપાદકંજ-
નિષેવણાલ્લબ્ધસમસ્તસંપત્ । 
દેવસ્વભાવો દિવિજદ્રુમોઽય-
મિષ્ટપ્રદો મે સતતં સ ભૂયાત્ ॥૪॥
ભવ્યસ્વરૂપો ભવદુ:ખતૂલ-
સંઘાગ્નિચર્ય: સુખધૈર્યશાલી ।
સમસ્તદુષ્ટગ્રહનિગ્રહેશો 
દુરત્યયોપપ્લવસિંધુસેતુ: ॥૫॥
નિરસ્તદોષો નિરવદ્યવેષ: 
પ્રત્યર્થિમૂકત્વનિદાનભાષ: ।
વિદ્વત્પરિજ્ઞેયમહાવિશેષો 
વાગ્વૈખરીનિર્જિતભવ્યશેષ: ॥૬॥
સંતાનસંપત્પરિશુદ્ધભક્તિ-
વિજ્ઞાનવાગ્દેહસુપાટવાદીન્ । 
દત્વા શરીરોત્થસમસ્તદોષાન્ 
હત્વા સ નોઽવ્યાદ્ગુરુરાઘવેંદ્ર: ॥૭॥
યત્પાદોદકસંચય: સુરનદીમુખ્યાપગાસાદિતા-
સંખ્યાનુત્તમપુણ્યસંઘવિલસત્પ્રખ્યાતપુણ્યાવહ: ।
દુસ્તાપત્રયનાશનો ભુવિ મહાવંધ્યાસુપુત્રપ્રદો
વ્યંગસ્વંગસમૃદ્ધિદો ગ્રહમહાપાપાપહસ્તં શ્રયે ॥૮॥
યત્પાદકંજરજસા પરિભૂષિતાંગા 
યત્પાદપદ્મમધુપાયિતમાનસા યે ।
યત્પાદપદ્મપરિકીર્તનજીર્ણવાચઃ
તદ્દર્શનં દુરિતકાનનદાવભૂતમ્ ॥૯॥
સર્વતંત્રસ્વતંત્રોઽસૌ શ્રીમધ્વમતવર્ધન: ।
વિજયીંદ્રકરાબ્જોત્થસુધીંદ્રવરપુત્રક: ॥૧૦॥
શ્રીરાઘવેંદ્રો યતિરાટ્ ગુરુર્મે સ્યાદ્ ભયાપહ: । 
જ્ઞાનભક્તિસુપુત્રાયુર્યશ:શ્રીપુણ્યવર્ધન: ॥૧૧॥
પ્રતિવાદિજયસ્વાંતભેદચિહ્નાદરો ગુરુ: । 
સર્વવિદ્યાપ્રવીણોઽન્યો રાઘવેંદ્રાન્ન વિદ્યતે ॥૧૨॥
અપરોક્ષીકૃતશ્રીશ: સમુપેક્ષિતભાવજ: । 
અપેક્ષિતપ્રદાતાઽન્યો રાઘવેંદ્રાન્ન વિદ્યતે ॥૧૩॥
દયાદાક્ષિણ્યવૈરાગ્યવાક્પાટવમુખાંકિત: । 
શાપાનુગ્રહશક્તોઽન્યો રાઘવેંદ્રાન્ન વિદ્યતે ॥૧૪॥
અજ્ઞાનવિસ્મૃતિભ્રાંતિસંશયાપસ્મૃતિક્ષયા: । 
તંદ્રાકંપવચ:કૌંઠ્યમુખા યે ચેંદ્રિયોદ્ભવા: ॥૧૫॥
દોષાસ્તે નાશમાયાંતિ રાઘવેંદ્રપ્રસાદત: । 
‘‘શ્રીરાઘવેંદ્રાય નમ: ’’ ઇત્યષ્ટાક્ષરમંત્રત: ॥૧૬॥
જપિતાદ્ભાવિતાન્નિત્યમિષ્ટાર્થા: સ્યુર્ન સંશય: ।
હંતુ ન: કાયજાન્ દોષાનાત્માત્મીયસમુદ્ભવાન્ ॥૧૭॥
સર્વાનપિ પુમર્થાંશ્ચ દદાતુ ગુરુરાત્મવિત્ ।
ઇતિ કાલત્રયે નિત્યં પ્રાર્થનાં ય: કરોતિ સ: ॥૧૮॥
ઇહામુત્રાપ્તસર્વેષ્ટો મોદતે નાત્ર સંશય: ।
અગમ્યમહિમા લોકે રાઘવેંદ્રો મહાયશા: ॥૧૯॥
શ્રીમધ્વમતદુગ્ધાબ્ધિચંદ્રોઽવતુ સદાઽનઘ: ।
સર્વયાત્રાફલાવાપ્ત્યૈ યથાશક્તિ પ્રદક્ષિણમ્ ॥૨૦॥
કરોમિ તવ સિદ્ધસ્ય વૃંદાવનગતં જલમ્ ।
શિરસા ધારયામ્યદ્ય સર્વતીર્થફલાપ્તયે ॥૨૧॥
સર્વાભીષ્ટાર્થસિધ્દ્યર્થં નમસ્કારં કરોમ્યહમ્ ।
તવ સંકીર્તનં વેદશાસ્ત્રાર્થજ્ઞાનસિદ્ધયે ॥૨૨॥
સંસારેઽક્ષયસાગરે પ્રકૃતિતોઽગાધે સદા દુસ્તરે
સર્વાવદ્યજલગ્રહૈરનુપમૈ: કામાદિભંગાકુલે ।
નાનાવિભ્રમદુર્ભ્રમેઽમિતભયસ્તોમાદિફેનોત્કટે 
દુ:ખોત્કૃષ્ટવિષે સમુદ્ધર ગુરો મા મગ્નરૂપં સદા ॥૨૩॥
રાઘવેંદ્રગુરુસ્તોત્રં ય: પઠેદ્ભક્તિપૂર્વકમ્ ।
તસ્ય કુષ્ઠાદિરોગાણાં નિવૃત્તિસ્ત્વરયા ભવેત્ ॥૨૪॥
અંધોઽપિ દિવ્યદૃષ્ટિ: સ્યાદેડમૂકોઽપિ વાક્પતિ: ।
પૂર્ણાયુ: પૂર્ણસંપત્તિ: સ્તોત્રસ્યાસ્ય જપાદ્ભવેત્ ॥૨૫॥
ય: પિબેજ્જલમેતેન સ્તોત્રેણૈવાભિમંત્રિતમ્ ।
તસ્ય કુક્ષિગતા દોષા: સર્વે નશ્યંતિ તત્ક્ષણાત્ ॥૨૬॥
યદ્વૃંદાવનમાસાદ્ય પંગુ: ખંજોઽપિ વા જન: ।
સ્તોત્રેણાનેન ય: કુર્યાત્ પ્રદક્ષિણનમસ્કૃતી: ॥૨૭॥
સ જંઘાલો ભવેદેવ ગુરુરાજપ્રસાદત: ।
સોમસૂર્યોપરાગે ચ પુષ્યાર્કાદિસમાગમે ॥૨૮॥
યોઽનુત્તમમિદં સ્તોત્રમષ્ટોત્તરશતં જપેત્ ।
ભૂતપ્રેતપિશાચાદિપીડા તસ્ય ન જાયતે ॥૨૯॥
એતત્ સ્તોત્રં સમુચ્ચાર્ય ગુરોર્વૃંદાવનાંતિકે ।
દીપસંયોજનાત્ જ્ઞાનં પુત્રલાભો ભવેદ્ ધ્રુવમ્ ॥૩૦॥
પરવાદિજયો દિવ્યજ્ઞાનભક્ત્યાદિવર્ધનમ્ ।
સર્વાભીષ્ટપ્રર્વૃદ્ધિ: સ્યાન્નાત્ર કાર્યા વિચારણા ॥૩૧॥
રાજચોરમહાવ્યાઘ્રસર્પનક્રાદિપીડનમ્ ।
ન જાયતેઽસ્ય સ્તોત્રસ્ય પ્રભાવાન્નાત્ર સંશય: ॥૩૨॥
યો ભક્ત્યા ગુરુરાઘવેંદ્રચરણદ્વંદ્વં સ્મરન્ ય: પઠેત્ 
સ્તોત્રં દિવ્યમિદં સદા ન હિ ભવેત્ તસ્યાસુખં કિંચન ।
કિંત્વિષ્ટાર્થસમૃદ્ધિરેવ કમલાનાથપ્રસાદોદયાત્ 
કીર્તિર્દિગ્વિદિતા વિભૂતિરતુલાસાક્ષી હયાસ્યોઽત્ર હિ ॥૩૩॥
ઇતિ શ્રીરાઘવેંદ્રાર્યગુરુરાજપ્રસાદત: । 
કૃતં સ્તોત્રમિદં પુણ્યં શ્રીમદ્ભિર્હ્યપ્પણાભિધૈ: ॥૩૪॥
પૂજ્યાય રાઘવેંદ્રાય સત્યધર્મરતાય ચ । 
ભજતાં કલ્પવૃક્ષાય નમતાં કામધેનવે ॥૩૫॥
દુર્વાદિધ્વાંતરવયે વૈષ્ણવેંદીવરેંદવે । 
શ્રીરાઘવેંદ્રગુરવે નમોઽત્યંતદયાલવે ॥૩૬॥
॥ ઇતિ શ્રીમદપ્પણાચાર્યવિરચિતં શ્રીરાઘવેંદ્રસ્તોત્રમ્ ॥