अथ श्रीपुरुषोत्तम स्तोत्रम्‌
यम उवाच
नमस्ते भगवन्‌ देव
लोकनाथ जगत्पते |

क्षीरोदवासिनं देवं
शेषभोगानुशायिनम्‌ || १||

वरं वरेण्यं वरदं
कर्तारमकृतं प्रभुम्‌ |

विश्वेश्वरमजं विष्णुं
सर्वज्ञमपराजितं || २||

नीलोत्पलदलश्यामं
पुंडरीकनिधे क्षणम्‌ |

सर्वज्ञं निर्गुणं शांतं
जगद्धातारमव्ययं || ३||

सर्वलोकविधातारं
सर्वलोकसुखावहम्‌ |

पुराणं पुरुषं वेद्यं
व्यक्ताव्यक्तं सनातनं || ४||

परावराणां सृष्टारं
लोकनाथं जगद्गुरुं |

श्रीवत्सोरस्कसंयुक्तं
वनमालादिभूषितं || ५||

पीतवस्त्रं चतुर्बाहुं
शंखचक्रगदाधरम्‌ |

हारकेयूरसंयुक्तं
मुकुटांगदधारिणं || ६||

सर्वलक्षणसंपूर्णं
सर्वेंद्रियविवर्जितं |

कूटस्थमचलं सूक्ष्मं
ज्योति रूपं सनातनं || ७||

भावाभाव विनिर्मुक्तं
व्यापिनं प्रकृतेः परं |

नमस्यामि जगन्नाथं
ईश्वरं सुखदं प्रभुम्‌ || ८||

इत्येवं धर्मराजस्तु
पुरा न्यग्रोध सन्निधौ |

स्तुत्वा नानाविधैः स्तोत्रैः
प्रणाममकरोत्तदा || ९||

|| इति श्री ब्रह्ममहापुराणे यमकृतं पुरुषोत्तम स्तोत्रम्‌ ||