puruShottamayogaH
atha puruShottamayogaH
UrdhvamUlamadhaH shAkhamashvatthaM prAhuravyayam |
ChaMdAMsi yasya parNAni yastaM veda sa vedavit	||1||
adhashchordhvaM prasRRitAstasya shAkhAH 
guNapravRRiddhA viShayapravAlAH |
adhashcha mUlAnyanusaMtatAni 
karmAnubaMdhIni manuShyaloke	||2||
na rUpamasyeha tathopalabhyate 
nAMto na chAdirna cha saMpratiShThA |
ashvatthamenaM suvirUDhamUlaM
asaMgashastreNa dRRiDhena ChitvA	||3||
tataH paraM tatparimArgitavyaM 
yasmin gatA na nivartaMti bhUyaH |
tameva chAdyaM puruShaM prapadye 
yataH pravRRittiH prasRRitA purANI	||4||
nirmAnamohA jitasaMgadoShAH 
adhyAtmanityA vinivRRittakAmAH |
dvaMdvairvimuktAH sukhaduHkhasaMj~naiH 
gachChaMtyamUDhAH padamavyayaM tat ||5||
na tadbhAsayate sUryo na shashAMko na pAvakaH |
yadgatvA na nivartaMte taddhAma paramaM mama	||6||
mamaivAMsho jIvaloke jIvabhUtaH sanAtanaH | 
manaHShaShThAnIMdriyANi prakRRitisthAni karShati	||7||
sharIraM yadavApnoti yachchApyutkrAmatIshvaraH |
gRRihItvaitAni saMyAti vAyurgaMdhAnivAshayAt	||8||
shrotraM chakShuH sparshanaM cha rasanaM ghrANameva cha |
adhiShThAya manashchAyaM viShayAnupasevate 	||9||
utkrAmaMtaM sthitaM vApi bhuMjAnaM vA guNAnvitam |
vimUDhA nAnupashyaMti pashyaMti j~nAnachakShuShaH	||10||
yataMto yoginashchainaM pashyaMtyAtmanyavasthitam | 
yataMtopyakRRitAtmAno nainaM pashyaMtyachetasaH	||11||
yadAdityagataM tejo jagadbhAsayate.akhilam |
yachchaMdramasi yachchAgnau tattejo viddhi mAmakam	||12||
gAmAvishya cha bhUtAni dhArayAmyahamojasA |
puShNAmi choShadhIH sarvAH somo bhUtvA rasAtmakaH	||13||
ahaM vaishvAnaro bhUtvA prANinAM dehamAshritaH | 
prANApAnasamAyuktaH pachAmyannaM chaturvidham	||14||
sarvasya chAhaM hRRidi sanniviShTo 
mattaH smRRitij~nAnamapohanaM cha | 
vedaishcha sarvairahameva vedyo 
vedAMtakRRidvedavideva chAham	||15||
dvAvimau puruShau loke kSharashchAkShara eva cha |
kSharaH sarvANi bhUtAni kUTastho.akShara uchyate	||16||
uttamaH puruShastvanyaH paramAtmetyudAhRRitaH |
yo lokatrayamAvishya bibhartyavyaya IshvaraH	||17||
yasmAd kSharamatItohamakSharAdapi chottamaH |
ato.asmi loke vede cha prathitaH puruShottamaH	||18||
yo mAmevamasaMmUDho jAnAti puruShottamam |
sa sarvavidbhajati mAM sarvabhAvena bhArata	||19||
iti guhyatamaM shAstramidamuktaM mayAnagha |
etadbuddhvA buddhimAn syAt kRRitakRRityashcha bhArata	||20||
|| oM tatsaditi shrImadbhagavadgItAsu upaniShatsu brahmavidyAyAM yogashAstre shrIkRRiShNArjunasaMvAde puruShottamayogo nAma paMchadasho.adhyAyaH ||