atha navagrahastotrāṇi
sūryaḥ-
japākusumasaṁkāśaṁ kāśyapeyaṁ mahādyutiṁ |
tamo'riṁ sarvapāpaghnaṁ praṇato'smi divākaraṁ ||

caṁdraḥ-
dadhiśaṁkhatuṣārābhaṁ kṣīrodārṇavasannibhaṁ |
namāmi śaśinaṁ devaṁ śaṁbhormukuṭabhūṣaṇaṁ ||

kujaḥ-
dharaṇīgarbhasaṁbhūtaṁ vidyutkāṁtisamaprabhaṁ |
kumāraṁ śaktisahitaṁ maṁgalaṁ praṇamāmyahaṁ ||

budhaḥ-
priyaṁgukalikāśyāmaṁ rūpeṇāpratimaṁ budhaṁ |
saumyaṁ saumyaguṇopetaṁ taṁ budhaṁ praṇamāmyahaṁ ||

guruḥ-
devānāṁ ca ṛṣīṇāṁ ca guruṁ kāṁcanasannibhaṁ |
buddhibhūtaṁ trilokeśaṁ taṁ namāmi bṛhaspatiṁ ||

śukraḥ-
himakuṁdasamābhāsaṁ daityānāṁ paramaṁ guruṁ |
sarvaśāstrapravaktāraṁ bhārgavaṁ praṇamāmyahaṁ ||

śaniḥ-
nīlāṁjanasamābhāsaṁ raviputraṁ yamāgrajaṁ |
chāyāmārtāṁḍasaṁbhūtaṁ taṁ namāmi śanaiścaraṁ ||

rāhuḥ-
ardhakāyaṁ mahāvīraṁ caṁdrādityavimardanaṁ |
siṁhikāgarbhasaṁbhūtaṁ taṁ rāhuṁ praṇamāmyahaṁ ||

ketuḥ-
palāśapuṣpasaṁkāśaṁ tārakāgrahamastakaṁ |
raudraṁ raudrātmakaṁ ghoraṁ taṁ ketuṁ praṇamāmyahaṁ ||

|| iti navagrahastotrāṇi ||