అథ నవగ్రహస్తోత్రం
భాస్వాన్మే భాసయేత్తత్త్వం చంద్రశ్చాహ్లాదకృద్భవేత్ |

మంగలో మంగలం దద్యాద్బుధశ్చ బుధతాం దిశేత్ ||1||

గురుర్మే గురుతాం దద్యాత్ కవిశ్చ కవితాం దిశేత్ |

శనిశ్చ శం ప్రాపయతు కేతుః కేతుం జయేఽర్పయేత్ ||2||

రాహుర్మే రహయేద్రోగం గ్రహాః సంతు కరగ్రహాః |

నవం నవం మమైశ్వర్యం దిశంత్వేతే నవగ్రహాః ||3||

శనే దినమణేః సూనో హ్యనేకగుణసన్మణే |

అరిష్టం హర మేఽభీష్టం కురు మా కురు సంకటం ||4||

హరేరనుగ్రహార్థాయ శత్రూణాం నిగ్రహాయ చ |

వాదిరాజయతిప్రోక్తం గ్రహస్తోత్రం సదా పఠేత్ ||5||

|| ఇతి శ్రీవాదిరాజయతివిరచితం నవగ్రహస్తోత్రం ||