atha navagrahastotram
bhāsvānme bhāsayettattvaṁ candraścāhlādakṛdbhavet |

maṁgalo maṁgalaṁ dadyādbudhaśca budhatāṁ diśet ||1||

gururme gurutāṁ dadyāt kaviśca kavitāṁ diśet |

śaniśca śaṁ prāpayatu ketuḥ ketuṁ jaye'rpayet ||2||

rāhurme rahayedrogaṁ grahāḥ santu karagrahāḥ |

navaṁ navaṁ mamaiśvaryaṁ diśantvete navagrahāḥ ||3||

śane dinamaṇeḥ sūno hyanekaguṇasanmaṇe |

ariṣṭaṁ hara me'bhīṣṭaṁ kuru mā kuru saṁkaṭam ||4||

hareranugrahārthāya śatrūṇāṁ nigrahāya ca |

vādirājayatiproktaṁ grahastotraṁ sadā paṭhet ||5||

|| iti śrīvādirājayativiracitaṁ navagrahastotram ||