।। అథ నారాయణవర్మ ।।

యయా గుప్తః సహస్రాక్షః సవాహాన్ రిపుసైనికాన్ ।
క్రీడన్నివ వినిర్జిత్య త్రైలోక్యా బుభుజే శ్రియమ్ ॥౧॥

భగవంస్తన్మమాఖ్యాహి వర్మ నారాయణాత్మకమ్ ।
యథాతతాయినః శత్రూన్యేన గుప్తో జయన్మృధే ॥౨॥

బాదరాయణిరువాచ-
వృతః పురోహితస్త్వాష్ట్రో మహేంద్రాయానుపృచ్ఛతే ।
నారాయణాఖ్యం వర్మాహ తదిహైకమనాః శ్రుణు ॥౩॥

విశ్వరూప ఉవాచ-
ధౌతాంఘ్రిపాణిరాచమ్య సపవిత్ర ఉదఙ్ముఖః ।
కృతస్వాంగకరన్యాసో మంత్రాభ్యాం వాగ్యతః శుచిః ॥౪॥

నారాయణమయం వర్మ సన్నహ్యేద్ భయ ఆగతే ।
దైవభూతాత్మకర్మభ్యో నారాయణమయః పుమాన్ ॥౫॥

పాదయోర్జానునోరుర్వోరుదరే హృద్యథోరసి ।
ముఖే శిరస్యానుపూర్వ్యాదోంకారాదీని విన్యసేత్ ॥౬॥

ఓం నమో నారాయణాయేతి విపర్యయమథాపి వా ।
కరన్యాసం తతః కుర్యాత్ ద్వాదశాక్షరవిద్యయా ॥౭॥

ప్రణవాదియకారాంతమంగుల్యంగుష్ఠపర్వసు ।
న్యసేద్ హృదయ ఓంకారం వికారమను మూర్ధని ॥౮॥

షకారం తు భ్రువోర్మధ్యే ణకారం శిఖయా దిశేత్ ।
వేకారం నేత్రయోర్యుంజ్యాన్నకారం సర్వసంధిషు ॥౯॥

మకారమస్త్రముద్దిశ్య మంత్రమూర్తిర్భర్వేద్బుధః ।
సవిసర్గం ఫడంతం తు సర్వదిక్షు వినిర్దిశేత్ ॥౧౦॥

॥ ఓం విష్ణవే నమః ఇతి ॥

ఆత్మానం పరమం ధ్యాయేత్ ధ్యేయం షట్శక్తిభిర్యుతమ్ ।
విద్యాతేజస్తపోమూర్తిరిమం మంత్రముదాహరేత్ ॥౧౧॥

ఓం హరిర్విదధ్యాన్మమ సర్వరక్షాం
న్యస్తాంఘ్రిపద్మః పతగేంద్రపృష్ఠే ।
దరారిచర్మాసిగదేషు చాప-
పాశాన్ దధానోఽష్టగుణోఽష్టబాహుః ॥౧౨॥

జలేషు మాం రక్షతు మత్స్యమూర్తిః
యాదోగణేభ్యో వరుణస్య పాశాత్ ।
స్థలే చ మాయావటువామనోఽవ్యాత్
త్రివిక్రమః ఖేఽవతు విశ్వరూపః ॥౧౩।।

దుర్గేష్వటవ్యాజిముఖాదిషు ప్రభుః
పాయాన్నృసింహోఽసురయూథపారిః ।
విముంచతో యస్య మహాట్టహాసం
దిశో వినేదుర్న్యపతంశ్చ గర్భాః ॥౧౪॥

రక్షత్వసౌ మాఽధ్వని యజ్ఞకల్పః
స్వదంష్ట్రయోన్నీతధరో వరాహః ।
రామోఽద్రికూటేష్వథ విప్రవాసే
సలక్ష్మణోఽవ్యాద్ భరతాగ్రజో మామ్ ॥౧౫।।

మాముగ్రధన్వా నిఖిలాత్ ప్రమాదాత్
నారాయణః పాతు నరశ్చ హాసాత్ ।
దత్తస్త్వయోగాదథ యోగనాథః
పాయాద్గుణేశః కపిలః కర్మబంధాత్ ॥౧౬।।

సనత్కుమారోఽవతు కామదేవాత్
హయశీర్షో మాం పథి దేవహేలనాత్ ।
దేవర్షివర్యః పురుషాంతరార్చనాత్
కూర్మో హరిర్మాం నిరయాదశేషాత్ ॥౧౭॥

ధన్వంతరిర్భగవాన్పాత్వపథ్యాత్
ద్వంద్వాద్భయాదృషభో నిర్జితాత్మా ।
యజ్ఞశ్చ లోకాదుత తత్కృతాన్నో
బలో గణాత్ క్రోధవశాదహీంద్రః ॥౧౮।।

ద్వైపాయనో భగవాన్ సమ్ప్రమోహాత్
బుద్ధస్తు పాఖండగణాత్ప్రమాదాత్ ।
కల్కీ కలేః కాలమలాత్ ప్రపాతు
ధర్మావనాయోరుకృతావతారః ॥౧౯॥

మాం కేశవో గదయా ప్రాతరవ్యాత్
గోవింద ఆసంగవ ఆత్తవేణుః ।
నారాయణః పాతు సదాత్తశక్తిః
మధ్యందినే విష్ణురరీంద్రపాణిః ॥౨౦॥

దేవోఽపరాహ్ణే మధుహోగ్రధన్వా
సాయం త్రిధామావతు మాధవో మామ్ ।
దోషే హృషీకేశ ఉతార్ధరాత్రే
నిశీథ ఏకోఽవతు పద్మనాభః ॥౨౧॥

శ్రీవత్సలక్ష్మాఽపరరాత్ర ఈశః
ప్రత్యూష ఈశోఽసిధరో జనార్దనః ।
దామోదరోఽవ్యాదనుసంధ్యం ప్రభాతే
విష్ణుః శ్రీమాన్భగవాన్కాలమూర్తిః ॥౨౨।।

చక్రం యుగాంతానిలతిగ్మనేమి-
భ్రమత్సమంతాద్భగవత్ప్రయుక్తమ్ ।
దందగ్ధి దందగ్ధ్యరిసైన్యమాశు
కక్షం యథా వాతసఖో హుతాశః ॥౨౩॥

గదేఽశనిస్పర్శనవిస్ఫులింగే
నిష్పింఢి నిష్పింఢ్యజితప్రియాసి ।
కూష్మాండవైనాయకయక్షరక్షో-
భూతగ్రహాంశ్చూర్ణయ చూర్ణయారీన్ ॥౨౪॥

త్వం యాతుధానప్రమథప్రేతమాతృపి-
శాచవిప్రగ్రహఘోరదృష్టీన్ ।
దరేంద్ర విద్రావయ కృష్ణపూరితో
భీమస్వనోఽరీన్ హృదయాని కంపయన్ ॥౨౫।।

త్వం తిగ్మధారాసి వరారిసైన్యం
ఈశప్రయుక్తో మమ ఛింధి ఛింధి ।
చక్షూంషి చర్మంఛతచంద్ర ఛాదయ
ద్విషామఘం నో హర పాపచక్షుషామ్ ॥౨౬।

యన్నో భయం గ్రహేభ్యోఽభూత్ కేతుభ్యో నృభ్య ఏవ చ ।
సరీసృపేభ్యో దంష్ట్రిభ్యో భూతేభ్యోఽఘేభ్య ఏవ చ ॥౨౭॥

సర్వాణ్యేతాని భగవన్నామరూపాస్త్రకీర్తనాత్ ।
ప్రయాంతు సంక్షయం సద్యో యేఽన్యే శ్రేయఃప్రతీపకాః ॥౨౮॥

గరుడో భగవాంస్తోత్రస్తోమచ్ఛందోమయః ప్రభుః ।
రక్షత్వశేషకృఛ్రేభ్యో విష్వక్సేనః స్వనామభిః ॥౨౯॥

సర్వాపద్భ్యో హరేర్నామరూపయానాయుధాని నః ।
బుద్ధీంద్రియమనః ప్రాణాన్ పాంతు పార్షదభూషణాః ॥౩౦॥

యథా హి భగవానేవ వస్తుతః సదసచ్చ యత్ ।
సత్యేన తేన నః సర్వే యాంతు నాశముపద్రవాః ॥౩౧॥

యథైకాత్మానుభావేన వికల్పరహితః స్వయమ్ ।
భూషణాయుధిలింగాఖ్యా ధత్తే శక్తీః స్వమాయయా ॥౩౨॥

తేనైవ సత్యమానేన సర్వజ్ఞో భగవాన్ హరిః ।
పాతు సర్వైః స్వరూపైర్నః సదా సర్వత్ర సర్వగః ॥౩౩॥

విదిక్షు దిక్షూర్ధ్వమధః సమంతాదంతర్బహిర్భగవాన్నారసింహః ।
ప్రహాపయన్ లోకభయం స్వనేన స్వతేజసా గ్రస్తసమస్తతేజాః ॥౩౪॥

విశ్వరూప ఉవాచ-
మఘవన్నిదమాఖ్యాతం వర్మ నారాయణాత్మకమ్ ।
విజేష్యస్యంజసా యేన దంశితోఽసురయూథపాన్ ॥౩౫॥

ఏతద్ధారయమాణస్తు యం యం పశ్యతి చక్షుషా ।
పదా వా సంస్పృశేత్ సద్యః సాధ్వసాత్ స విముచ్యతే ॥౩౬॥

న కుతశ్చిద్ భయం తస్య విద్యాం ధారయతో భవేత్ ।
రాజదస్యుగ్రహాదిభ్యో వ్యాధ్యాదిభ్యశ్చ కర్హిచిత్ ॥౩౭॥

ఇమాం విద్యాం పురా కశ్చిత్ కౌశికో ధారయన్ ద్విజః ।
యోగధారణయా స్వాంగం జహౌ స మరుధన్వని ॥౩౮॥

తస్యోపరి విమానేన గంధర్వపతిరేకదా ।
యయౌ చిత్రరథః స్త్రీభిర్వృతో యత్ర ద్విజక్షయః ॥౩౯॥

సాంగనో న్యపతత్ సద్యః సవిమానో హ్యవాక్శిరాః ।
విద్యామిమాం ధారయతో మృతస్యాస్థివిలంఘనాత్ ॥౪౦॥

స బాలఖిల్యవచనాదస్థీన్యాదాయ విస్మితః ।
ప్రాస్య ప్రాచీ సరస్వత్యాం స్నాత్వా ధామ స్వమన్వగాత్ ॥౪౧॥

య ఇదం శృణుయాత్ కాలే యో ధారయతి చాదృతః ।
తం నమస్యంతి భూతాని ముచ్యతే సర్వతో భయాత్ ॥౪౨॥

ఏతాం విద్యామధిగతో విశ్వరూపాచ్ఛతక్రతుః ।
త్రైలోక్యలక్ష్మీం బుభుజే వినిర్జిత్య మృధేఽసురాత్ ॥౪౩॥

॥ ఇతి శ్రీమద్భాగవతే షష్ఠస్కంధే అష్టమోఽధ్యాయః ॥