shrInRRisiMhastutiH
atha shrInRRisiMhastutiH 
udayaravisahasradyotitaM rUkShavIkShaM 
pralayajaladhinAdaM kalpakRRidvahnivaktram |  
surapatiripuvakShashChedaraktokShitAMgaM 
praNatabhayaharaM taM nArasiMhaM namAmi ||1||
pralayaravikarAlAkArarukchakravAlaM 
viralayadururochIrochitAshAMtarAla |  
pratibhayatamakopAtyutkaTochchATTahAsin 
daha daha narasiMhAsahyavIryAhitaM me||2||
sarasarabhasapAdApAtabhArAbhirAva-
prachakitachalasaptadvaMdvalokastutastvam |   
ripurudhiraniShekeNeva shoNAMghrishAlin 
daha daha narasiMhAsahyavIryAhitaM me ||3||
tava ghanaghanaghoSho ghoramAghrAya jaMghA-
parighamalaghumUruvyAjatejogiriM cha |
ghanavighaTitamAgAddaityajaMghAlasaMgho 
daha daha narasiMhAsahyavIryAhitaM me ||4||
kaTakikaTakarAjaddhATakAgryasthalAbhA
prakaTapaTataTitte satkaTisthA.atipaTvI |   
kaTukakaTukaduShTATopadRRiShTipramuShTau 
daha daha narasiMhAsahyavIryAhitaM me ||5||
prakharanakharavajrotkhAtarUkShArivakShaH
shikharishikhararaktairAktasaMdohadeha |  
suvilabha shubhakukShe bhadragaMbhIranAbhe 
daha daha narasiMhAsahyavIryAhitaM me ||6||
sphurayati tava sAkShAt saiva nakShatramAlA 
kShapitaditijavakShovyAptanakShatramArgam |  
aridaradhara jAnvAsaktahastadvayAho 
daha daha narasiMhAsahyavIryAhitaM me ||7|| 
kaTuvikaTasaTaughodghaTTanAdbhraShTabhUyo
ghanapaTalavishAlAkAshalabdhAvakAsham |  
karaparighavimardaprodyamaM dhyAyataste 
daha daha narasiMhAsahyavIryAhitaM me ||8||
haThaluThadalaghiShThotkaMTha daShToShTha vidyut- 
saTa shaThakaThinoraH pIThabhitsuShTu niShThAm |  
paThati nu tava kaMThAdhiShThaghorAMtramAlA 
daha daha narasiMhAsahyavIryAhitaM me ||9||
hRRitabahumihirAbhAsahyasaMhAraraMho-
hutavahabahuhetihreShikAnaMtaheti |  
ahitavihitamohaM saMvahan saiMhamAsyaM 
daha daha narasiMhAsahyavIryAhitaM me ||10|| 
gurugurugirirAjatkaMdarAMtargate vA 
dinamaNimaNishRRiMge vAMtavahnipradIpte |   
dadhadatikaTudaMShTre bhIShaNojjihvavaktre 
daha daha narasiMhAsahyavIryAhitaM me ||11||
adharitavibudhAbdhidhyAnadhairyaM vidIdhya-
dvividhavibudhadhIshraddhApiteMdrArinAsham |  
vidadhadatikaTAhodghaTTaneddhATTahAsam 
daha daha narasiMhAsahyavIryAhitaM me ||12||  
tribhuvanatRRiNamAtratrANatRRiShNaM tu netra-
trayamatilaghitArchirviShTapAviShTapAdam  |   
navatararavitAmraM dhArayan rUkShavIkShaM 
daha daha narasiMhAsahyavIryAhitaM me ||13||
bhramadabhibhavabhUbhRRidbhUri bhUbhArasadbhid-
bhidanavavibhavabhrUvibhramAdabhrashubhra |   
RRibhubhavabhayabhettarbhAsi bho bho vibhAbhiH 
daha daha narasiMhAsahyavIryAhitaM me ||14||
shravaNakhachitachaMchatkuMDalollAsigaMDa-
bhrukuTikaTulalATa shreShThanAsAruNoShTha |   
varada surada rAjatkesarotsAritAre 
daha daha narasiMhAsahyavIryAhitaM me ||15||
pravikachakacharAjadratnakoTIrashAlin 
galagatagaladusrodAraratnAMgadADya |   
kanakakaTakakAMchIsiMjinImudrikAvan 
daha daha narasiMhAsahyavIryAhitaM me ||16||
aridaramasikheTau chApabANe gadAM san-
musalamapi karAbhyAmaMkushaM pAshavaryam |  
karayugaladhRRitAMtrasragvibhinnArivakSho 
daha daha narasiMhAsahyavIryAhitaM me ||17||
chaTa chaTa chaTa dUraM mohaya bhrAmayArIn 
kaDi kaDi kaDi kAyaM jvAraya sphoTayasva |  
jahi jahi jahi vegaM shAtravaM sAnubaMdhaM 
daha daha narasiMhAsahyavIryAhitaM me ||18|| 
vidhibhavavibudheshabhrAmakAgnisphuliMga-
prasavivikaTadaMShTrojjihvavaktra trinetra |   
kala kala kala kAmaM pAhi mAM te subhaktaM 
daha daha narasiMhAsahyavIryAhitaM me ||19|| 
kuru kuru karuNAM tAM sAMkurAM daityapote 
disha disha vishadAM me shAshvatIM deva dRRiShTim |   
jaya jaya jayamUrte.anArta jetavyapakShaM 
daha daha narasiMhAsahyavIryAhitaM me ||20|| 
stutiriyamahitaghnI sevitA nArasiMhI 
tanuriva parishAMtA mAlinI sA.abhito.alam |  
tadakhilagurumAgryashrIdarUpA lasadbhiH
suniyamanayakRRityaiH sadguNairnityayuktA||21||
udayaravisahasradyotitaM rUkShavIkShaM 
pralayajaladhinAdaM kalpakRRidvahnivaktram |  
surapatiripuvakShashChedaraktokShitAMgaM 
praNatabhayaharaM taM nArasiMhaM namAmi ||22||
likuchatilakasUnuH saddhitArthAnusArI 
naraharinutimetAM shatrusaMhArahetum |  
akRRita sakalapApadhvaMsinIM yaH paThettAM 
vrajati nRRiharilokaM kAmalobhAdyasaktaH ||23||
|| iti shrImatkavikulatilakashrItrivikramapaMDitAchAryavirachita shrI nRRisiMhastutiH ||