అథ శ్రీనృసింహస్తుతిః

ఉదయరవిసహస్రద్యోతితం రూక్షవీక్షం
ప్రలయజలధినాదం కల్పకృద్వహ్నివక్త్రమ్ ।
సురపతిరిపువక్షశ్ఛేదరక్తోక్షితాంగం
ప్రణతభయహరం తం నారసింహం నమామి ॥౧॥

ప్రలయరవికరాలాకారరుక్చక్రవాలం
విరలయదురురోచీరోచితాశాంతరాల ।
ప్రతిభయతమకోపాత్యుత్కటోచ్చాట్టహాసిన్
దహ దహ నరసింహాసహ్యవీర్యాహితం మే॥౨॥

సరసరభసపాదాపాతభారాభిరావ-
ప్రచకితచలసప్తద్వంద్వలోకస్తుతస్త్వమ్ ।
రిపురుధిరనిషేకేణేవ శోణాంఘ్రిశాలిన్
దహ దహ నరసింహాసహ్యవీర్యాహితం మే ॥౩॥

తవ ఘనఘనఘోషో ఘోరమాఘ్రాయ జంఘా-
పరిఘమలఘుమూరువ్యాజతేజోగిరిం చ ।
ఘనవిఘటితమాగాద్దైత్యజంఘాలసంఘో
దహ దహ నరసింహాసహ్యవీర్యాహితం మే ॥౪॥

కటకికటకరాజద్ధాటకాగ్ర్యస్థలాభా
ప్రకటపటతటిత్తే సత్కటిస్థాఽతిపట్వీ ।
కటుకకటుకదుష్టాటోపదృష్టిప్రముష్టౌ
దహ దహ నరసింహాసహ్యవీర్యాహితం మే ॥౫॥

ప్రఖరనఖరవజ్రోత్ఖాతరూక్షారివక్షః
శిఖరిశిఖరరక్తైరాక్తసందోహదేహ ।
సువిలభ శుభకుక్షే భద్రగంభీరనాభే
దహ దహ నరసింహాసహ్యవీర్యాహితం మే ॥౬॥

స్ఫురయతి తవ సాక్షాత్ సైవ నక్షత్రమాలా
క్షపితదితిజవక్షోవ్యాప్తనక్షత్రమార్గమ్ ।
అరిదరధర జాన్వాసక్తహస్తద్వయాహో
దహ దహ నరసింహాసహ్యవీర్యాహితం మే ॥౭॥

కటువికటసటౌఘోద్ఘట్టనాద్భ్రష్టభూయో
ఘనపటలవిశాలాకాశలబ్ధావకాశమ్ ।
కరపరిఘవిమర్దప్రోద్యమం ధ్యాయతస్తే
దహ దహ నరసింహాసహ్యవీర్యాహితం మే ॥౮॥

హఠలుఠదలఘిష్ఠోత్కంఠ దష్టోష్ఠ విద్యుత్-
సట శఠకఠినోరః పీఠభిత్సుష్టు నిష్ఠామ్ ।
పఠతి ను తవ కంఠాధిష్ఠఘోరాంత్రమాలా
దహ దహ నరసింహాసహ్యవీర్యాహితం మే ॥౯॥

హృతబహుమిహిరాభాసహ్యసంహారరంహో-
హుతవహబహుహేతిహ్రేషికానంతహేతి ।
అహితవిహితమోహం సంవహన్ సైంహమాస్యం
దహ దహ నరసింహాసహ్యవీర్యాహితం మే ॥౧౦॥

గురుగురుగిరిరాజత్కందరాంతర్గతే వా
దినమణిమణిశృంగే వాంతవహ్నిప్రదీప్తే ।
దధదతికటుదంష్ట్రే భీషణోజ్జిహ్వవక్త్రే
దహ దహ నరసింహాసహ్యవీర్యాహితం మే ॥౧౧॥

అధరితవిబుధాబ్ధిధ్యానధైర్యం విదీధ్య-
ద్వివిధవిబుధధీశ్రద్ధాపితేంద్రారినాశమ్ ।
విదధదతికటాహోద్ఘట్టనేద్ధాట్టహాసమ్
దహ దహ నరసింహాసహ్యవీర్యాహితం మే ॥౧౨॥

త్రిభువనతృణమాత్రత్రాణతృష్ణం తు నేత్ర-
త్రయమతిలఘితార్చిర్విష్టపావిష్టపాదమ్ ।
నవతరరవితామ్రం ధారయన్ రూక్షవీక్షం
దహ దహ నరసింహాసహ్యవీర్యాహితం మే ॥౧౩॥

భ్రమదభిభవభూభృద్భూరి భూభారసద్భిద్-
భిదనవవిభవభ్రూవిభ్రమాదభ్రశుభ్ర ।
ఋభుభవభయభేత్తర్భాసి భో భో విభాభిః
దహ దహ నరసింహాసహ్యవీర్యాహితం మే ॥౧౪॥

శ్రవణఖచితచంచత్కుండలోల్లాసిగండ-
భ్రుకుటికటులలాట శ్రేష్ఠనాసారుణోష్ఠ ।
వరద సురద రాజత్కేసరోత్సారితారే
దహ దహ నరసింహాసహ్యవీర్యాహితం మే ॥౧౫॥

ప్రవికచకచరాజద్రత్నకోటీరశాలిన్
గలగతగలదుస్రోదారరత్నాంగదాడ్య ।
కనకకటకకాంచీసింజినీముద్రికావన్
దహ దహ నరసింహాసహ్యవీర్యాహితం మే ॥౧౬॥

అరిదరమసిఖేటౌ చాపబాణే గదాం సన్-
ముసలమపి కరాభ్యామంకుశం పాశవర్యమ్ ।
కరయుగలధృతాంత్రస్రగ్విభిన్నారివక్షో
దహ దహ నరసింహాసహ్యవీర్యాహితం మే ॥౧౭॥

చట చట చట దూరం మోహయ భ్రామయారీన్
కడి కడి కడి కాయం జ్వారయ స్ఫోటయస్వ ।
జహి జహి జహి వేగం శాత్రవం సానుబంధం
దహ దహ నరసింహాసహ్యవీర్యాహితం మే ॥౧౮॥

విధిభవవిబుధేశభ్రామకాగ్నిస్ఫులింగ-
ప్రసవివికటదంష్ట్రోజ్జిహ్వవక్త్ర త్రినేత్ర ।
కల కల కల కామం పాహి మాం తే సుభక్తం
దహ దహ నరసింహాసహ్యవీర్యాహితం మే ॥౧౯॥

కురు కురు కరుణాం తాం సాంకురాం దైత్యపోతే
దిశ దిశ విశదాం మే శాశ్వతీం దేవ దృష్టిమ్ ।
జయ జయ జయమూర్తేఽనార్త జేతవ్యపక్షం
దహ దహ నరసింహాసహ్యవీర్యాహితం మే ॥౨౦॥

స్తుతిరియమహితఘ్నీ సేవితా నారసింహీ
తనురివ పరిశాంతా మాలినీ సాఽభితోఽలమ్ ।
తదఖిలగురుమాగ్ర్యశ్రీదరూపా లసద్భిః
సునియమనయకృత్యైః సద్గుణైర్నిత్యయుక్తా॥౨౧॥

ఉదయరవిసహస్రద్యోతితం రూక్షవీక్షం
ప్రలయజలధినాదం కల్పకృద్వహ్నివక్త్రమ్ ।
సురపతిరిపువక్షశ్ఛేదరక్తోక్షితాంగం
ప్రణతభయహరం తం నారసింహం నమామి ॥౨౨॥

లికుచతిలకసూనుః సద్ధితార్థానుసారీ
నరహరినుతిమేతాం శత్రుసంహారహేతుమ్ ।
అకృత సకలపాపధ్వంసినీం యః పఠేత్తాం
వ్రజతి నృహరిలోకం కామలోభాద్యసక్తః ॥౨౩॥

॥ ఇతి శ్రీమత్కవికులతిలకశ్రీత్రివిక్రమపండితాచార్యవిరచిత శ్రీ నృసింహస్తుతిః ॥