మంగలాష్టకమ్
అథ మంగలాష్టకమ్
లక్ష్మీర్యస్య పరిగ్రహ: కమలభూ: సూనుర్గరుత్మాన్ రథ:
పౌత్రశ్‍చంద్రవిభూషణ: సురగురు: శేషశ్చ శయ్యాసన: ।
బ్రహ్మాండం వరమందిరం సురగణా యస్య ప్రభో: సేవకా: 
స త్రైలోక్యకుటుంబపాలనపర: కుర్యాద్ధరిర్మంగలమ్ 	।।౧।।
బ్రహ్మా వాయుగిరీశశేషగరుడా దేవేంద్రకామౌ గురుః
చంద్రార్కౌ వరుణానలౌ మనుయమౌ విత్తేశవిఘ్నేశ్‍వరౌ ।
నాసత్యౌ నిర్ఋతిర్మరుద్గణయుతా: పర్జన్యమిత్రాదయ: 
సస్త్రీకా: సురపుంగవా: ప్రతిదినం కుర్వంతు నో మంగలమ్ 	।।౨।।
విశ్‍వామిత్రపరాశరౌర్వభృగవోఽగస్త్య: పులస్త్య: క్రతు:
శ్రీమానత్రిమరీచికౌత్సపులహా: శక్తిర్వసిష్ఠోంఽగిరా: ।
మాండవ్యో జమదగ్నిగౌతమభరద్వాజాదయస్తాపసా:
శ్రీవిష్ణో: పదపద్మచింతనరతా: కుర్వంతు నో మంగలమ్	।।౩।।
మాంధాతా నహుషోంఽబరీషసగరౌ రాజా పృథుర్హైహయ: 
శ్రీమాన్ ధర్మసుతో నలో దశరథో రామో యయాతిర్యదు: ।
ఇక్ష్వాకుశ్చ విభీషణశ్చ భరతశ్చోత్తానపాద ధ్రువౌ
ఇత్యాద్యా భువి భూభుజశ్చ సతతం కుర్వంతు నో మంగలమ్	।।౪।।
శ్రీమేరుర్హిమవాంశ్చ మందరగిరి: కైలాసశైలస్తథా
మాహేంద్రో మలయశ్చ వింధ్యనిషధౌ సింహస్తథా రైవత: ।
సహ్యాద్రిర్వరగంధమాదనగిరిర్మైనాకగోమంతకౌ 
ఇత్యాద్యా భువి భూధరా: ప్రతిదినం కుర్వంతు నో మంగలమ్	।।౫।।
గంగా సింధుసరస్వతీ చ యమునా గోదావరీ నర్మదా 
కృష్ణా భీమరథీ చ ఫల్గుసరయూ శ్రీగండకీ గోమతీ ।
కావేరీ కపిలా ప్రయాగవినతా నేత్రావతీత్యాదయో 
నద్య: శ్రీహరిపాదపంకజభవా: కుర్వంతు నో మంగలమ్ 	।।౬।।
వేదాశ్చోపనిషద్గణాశ్చ వివిధా: సాంగా: పురాణాన్వితాః
వేదాంతా అపి మంత్రతంత్రసహితాస్తర్కా: స్మృతీనాం గణా: ।
కావ్యాలంకృతినీతినాటకయుతా: శబ్దాశ్చ నానావిధా:
శ్రీవిష్ణోర్గుణరాశికీర్తనపరా: కుర్వంతు నో మంగలమ్  ।।౭।।
ఆదిత్యాదినవగ్రహా: శుభకరా మేషాదయో రాశయో
నక్షత్రాణి సయోగకాశ్చ తిథయస్తద్దేవతాస్తద్గణా: ।
మాసాబ్దా ఋతవస్తథైవ దివసా: సంధ్యాస్తథా రాత్రయ:
సర్వే స్థావరజంగమా: ప్రతిదినం కుర్వంతు నో మంగలమ్	।।౮।।
ఇత్యేతద్వరమంగలాష్టకమిదం శ్రీరాజరాజేశ్‍వరై:
ఆఖ్యాతం జగతామభీష్టఫలదం సర్వాశుభధ్వంసనమ్ ।
మాంగల్యాదిశుభక్రియాసు సతతం సంధ్యాసు వా య: పఠేత్
ధర్మార్థాదిసమస్తవాంఛితఫలం ప్రాప్నోత్యసౌ మానవ: 	।।౯।।
।। ఇతి శ్రీరాజరాజేశ్వరతీర్థవిరచితం మంగలాష్టకమ్ ।।