ಮಂಗಲಾಷ್ಟಕಮ್
ಅಥ ಮಂಗಲಾಷ್ಟಕಮ್
ಲಕ್ಷ್ಮೀರ್ಯಸ್ಯ ಪರಿಗ್ರಹ: ಕಮಲಭೂ: ಸೂನುರ್ಗರುತ್ಮಾನ್ ರಥ:
ಪೌತ್ರಶ್‍ಚಂದ್ರವಿಭೂಷಣ: ಸುರಗುರು: ಶೇಷಶ್ಚ ಶಯ್ಯಾಸನ: ।
ಬ್ರಹ್ಮಾಂಡಂ ವರಮಂದಿರಂ ಸುರಗಣಾ ಯಸ್ಯ ಪ್ರಭೋ: ಸೇವಕಾ: 
ಸ ತ್ರೈಲೋಕ್ಯಕುಟುಂಬಪಾಲನಪರ: ಕುರ್ಯಾದ್ಧರಿರ್ಮಂಗಲಮ್ 	।।೧।।
ಬ್ರಹ್ಮಾ ವಾಯುಗಿರೀಶಶೇಷಗರುಡಾ ದೇವೇಂದ್ರಕಾಮೌ ಗುರುಃ
ಚಂದ್ರಾರ್ಕೌ ವರುಣಾನಲೌ ಮನುಯಮೌ ವಿತ್ತೇಶವಿಘ್ನೇಶ್‍ವರೌ ।
ನಾಸತ್ಯೌ ನಿರ್ಋತಿರ್ಮರುದ್ಗಣಯುತಾ: ಪರ್ಜನ್ಯಮಿತ್ರಾದಯ: 
ಸಸ್ತ್ರೀಕಾ: ಸುರಪುಂಗವಾ: ಪ್ರತಿದಿನಂ ಕುರ್ವಂತು ನೋ ಮಂಗಲಮ್ 	।।೨।।
ವಿಶ್‍ವಾಮಿತ್ರಪರಾಶರೌರ್ವಭೃಗವೋಽಗಸ್ತ್ಯ: ಪುಲಸ್ತ್ಯ: ಕ್ರತು:
ಶ್ರೀಮಾನತ್ರಿಮರೀಚಿಕೌತ್ಸಪುಲಹಾ: ಶಕ್ತಿರ್ವಸಿಷ್ಠೋಂಽಗಿರಾ: ।
ಮಾಂಡವ್ಯೋ ಜಮದಗ್ನಿಗೌತಮಭರದ್ವಾಜಾದಯಸ್ತಾಪಸಾ:
ಶ್ರೀವಿಷ್ಣೋ: ಪದಪದ್ಮಚಿಂತನರತಾ: ಕುರ್ವಂತು ನೋ ಮಂಗಲಮ್	।।೩।।
ಮಾಂಧಾತಾ ನಹುಷೋಂಽಬರೀಷಸಗರೌ ರಾಜಾ ಪೃಥುರ್ಹೈಹಯ: 
ಶ್ರೀಮಾನ್ ಧರ್ಮಸುತೋ ನಲೋ ದಶರಥೋ ರಾಮೋ ಯಯಾತಿರ್ಯದು: ।
ಇಕ್ಷ್ವಾಕುಶ್ಚ ವಿಭೀಷಣಶ್ಚ ಭರತಶ್ಚೋತ್ತಾನಪಾದ ಧ್ರುವೌ
ಇತ್ಯಾದ್ಯಾ ಭುವಿ ಭೂಭುಜಶ್ಚ ಸತತಂ ಕುರ್ವಂತು ನೋ ಮಂಗಲಮ್	।।೪।।
ಶ್ರೀಮೇರುರ್ಹಿಮವಾಂಶ್ಚ ಮಂದರಗಿರಿ: ಕೈಲಾಸಶೈಲಸ್ತಥಾ
ಮಾಹೇಂದ್ರೋ ಮಲಯಶ್ಚ ವಿಂಧ್ಯನಿಷಧೌ ಸಿಂಹಸ್ತಥಾ ರೈವತ: ।
ಸಹ್ಯಾದ್ರಿರ್ವರಗಂಧಮಾದನಗಿರಿರ್ಮೈನಾಕಗೋಮಂತಕೌ 
ಇತ್ಯಾದ್ಯಾ ಭುವಿ ಭೂಧರಾ: ಪ್ರತಿದಿನಂ ಕುರ್ವಂತು ನೋ ಮಂಗಲಮ್	।।೫।।
ಗಂಗಾ ಸಿಂಧುಸರಸ್ವತೀ ಚ ಯಮುನಾ ಗೋದಾವರೀ ನರ್ಮದಾ 
ಕೃಷ್ಣಾ ಭೀಮರಥೀ ಚ ಫಲ್ಗುಸರಯೂ ಶ್ರೀಗಂಡಕೀ ಗೋಮತೀ ।
ಕಾವೇರೀ ಕಪಿಲಾ ಪ್ರಯಾಗವಿನತಾ ನೇತ್ರಾವತೀತ್ಯಾದಯೋ 
ನದ್ಯ: ಶ್ರೀಹರಿಪಾದಪಂಕಜಭವಾ: ಕುರ್ವಂತು ನೋ ಮಂಗಲಮ್ 	।।೬।।
ವೇದಾಶ್ಚೋಪನಿಷದ್ಗಣಾಶ್ಚ ವಿವಿಧಾ: ಸಾಂಗಾ: ಪುರಾಣಾನ್ವಿತಾಃ
ವೇದಾಂತಾ ಅಪಿ ಮಂತ್ರತಂತ್ರಸಹಿತಾಸ್ತರ್ಕಾ: ಸ್ಮೃತೀನಾಂ ಗಣಾ: ।
ಕಾವ್ಯಾಲಂಕೃತಿನೀತಿನಾಟಕಯುತಾ: ಶಬ್ದಾಶ್ಚ ನಾನಾವಿಧಾ:
ಶ್ರೀವಿಷ್ಣೋರ್ಗುಣರಾಶಿಕೀರ್ತನಪರಾ: ಕುರ್ವಂತು ನೋ ಮಂಗಲಮ್  ।।೭।।
ಆದಿತ್ಯಾದಿನವಗ್ರಹಾ: ಶುಭಕರಾ ಮೇಷಾದಯೋ ರಾಶಯೋ
ನಕ್ಷತ್ರಾಣಿ ಸಯೋಗಕಾಶ್ಚ ತಿಥಯಸ್ತದ್ದೇವತಾಸ್ತದ್ಗಣಾ: ।
ಮಾಸಾಬ್ದಾ ಋತವಸ್ತಥೈವ ದಿವಸಾ: ಸಂಧ್ಯಾಸ್ತಥಾ ರಾತ್ರಯ:
ಸರ್ವೇ ಸ್ಥಾವರಜಂಗಮಾ: ಪ್ರತಿದಿನಂ ಕುರ್ವಂತು ನೋ ಮಂಗಲಮ್	।।೮।।
ಇತ್ಯೇತದ್ವರಮಂಗಲಾಷ್ಟಕಮಿದಂ ಶ್ರೀರಾಜರಾಜೇಶ್‍ವರೈ:
ಆಖ್ಯಾತಂ ಜಗತಾಮಭೀಷ್ಟಫಲದಂ ಸರ್ವಾಶುಭಧ್ವಂಸನಮ್ ।
ಮಾಂಗಲ್ಯಾದಿಶುಭಕ್ರಿಯಾಸು ಸತತಂ ಸಂಧ್ಯಾಸು ವಾ ಯ: ಪಠೇತ್
ಧರ್ಮಾರ್ಥಾದಿಸಮಸ್ತವಾಂಛಿತಫಲಂ ಪ್ರಾಪ್ನೋತ್ಯಸೌ ಮಾನವ: 	।।೯।।
।। ಇತಿ ಶ್ರೀರಾಜರಾಜೇಶ್ವರತೀರ್ಥವಿರಚಿತಂ ಮಂಗಲಾಷ್ಟಕಮ್ ।।