mahālakṣmyaṣṭakastotram 
atha mahālakṣmyaṣṭakastotram 
namaste'stu mahāmāye śrīpīṭhe surapūjite |
śaṁkhacakragadāhaste mahālakṣmīnamo'stu te ||1||
namaste garuḍārūḍhe kolāsurabhayaṁkari |
sarvapāpahare devi mahālakṣmīnamo'stu te ||2||
sarvajñe sarvavarade sarvaduṣṭabhayaṁkari |
sarvaduḥkhahare devi mahālakṣmīnamo'stu te ||3||
siddhibuddhiprade devi bhuktimuktipradāyini |
maṁtramūrte mahādevi mahālakṣmīnamo'stu te ||4||
ādyaṁtarahite devi ādyaśakti maheśvari |
yogaje yogasaṁbhūte mahālakṣmīnamo'stu te ||5||
sthūlasūkṣmamahāraudre mahāśakti mahodare |
mahāpāpahare devi mahālakṣmīnamo'stu te ||6||
padmāsanasthite devi parabrahmasvarūpiṇi |
parameśi jaganmātarmahālakṣmīnamo'stu te ||7||
śvetāṁbaradhare devi nānālaṁkārabhūṣite |
jagatsthite jaganmātarmahālakṣmīnamo'stu te ||8||
mahālakṣmyaṣṭakastotraṁ yaḥ paṭhedbhaktimān naraḥ |
sarvasiddhimavāpnoti rājyaṁ prāpnoti sarvadā ||9||
ekakāle paṭhennityaṁ mahāpāpavināśanam |
dvikāle yaḥ paṭhennityaṁ dhanadhānyasamanvitaḥ ||10||
trikāle yaḥ paṭhennityaṁ mahāśatruvināśanam |
mahālakṣmīrbhavennityaṁ prasannāvaradā śubhā ||11||
|| iti iṁdrakṛtaṁ śrīmahālakṣmyaṣṭakastotram ||