महालक्ष्म्यष्टकस्तोत्रम् 
अथ महालक्ष्म्यष्टकस्तोत्रम् 
नमस्तेऽस्तु महामाये श्रीपीठे सुरपूजिते | 
शंखचक्रगदाहस्ते महालक्ष्मीनमोऽस्तु ते || १|| 
नमस्ते गरुडारूढे कोलासुरभयंकरि | 
सर्वपापहरे देवि महालक्ष्मीनमोऽस्तु ते || २|| 
सर्वज्ञे सर्ववरदे सर्वदुष्टभयंकरि | 
सर्वदुःखहरे देवि महालक्ष्मीनमोऽस्तु ते || ३|| 
सिद्धिबुद्धिप्रदे देवि भुक्तिमुक्तिप्रदायिनि | 
मंत्रमूर्ते महादेवि महालक्ष्मीनमोऽस्तु ते || ४|| 
आद्यंतरहिते देवि आद्यशक्ति महेश्वरि | 
योगजे योगसंभूते महालक्ष्मीनमोऽस्तु ते || ५|| 
स्थूलसूक्ष्ममहारौद्रे महाशक्ति महोदरे | 
महापापहरे देवि महालक्ष्मीनमोऽस्तु ते || ६|| 
पद्मासनस्थिते देवि परब्रह्मस्वरूपिणि | 
परमेशि जगन्मातर्महालक्ष्मीनमोऽस्तु ते || ७|| 
श्वेतांबरधरे देवि नानालंकारभूषिते | 
जगत्स्थिते जगन्मातर्महालक्ष्मीनमोऽस्तु ते || ८|| 
महालक्ष्म्यष्टकस्तोत्रं यः पठेद्भक्तिमान् नरः | 
सर्वसिद्धिमवाप्नोति राज्यं प्राप्नोति सर्वदा || ९|| 
एककाले पठेन्नित्यं महापापविनाशनम् | 
द्विकाले यः पठेन्नित्यं धनधान्यसमन्वितः || १०|| 
त्रिकाले यः पठेन्नित्यं महाशत्रुविनाशनम् | 
महालक्ष्मीर्भवेन्नित्यं प्रसन्नावरदा शुभा || ११|| 
||  इति इंद्रकृतं श्रीमहालक्ष्म्यष्टकस्तोत्रम् ||