śrīmadhvāṣṭakam
atha śrīmadhvāṣṭakam
ajñānanāśāya satāṁ janānāṁ 
kṛtāvatārāya vasundharāyām |
madhvābhidhānāya mahāmahimne 
hatārisaṁghāya namo'nilāya ||1||
yena svasiddhāntasarojamaddhā 
vikāsitaṁ gobhiralaṁ viśuddhaiḥ |
dustarkanīhārakulaṁ ca bhinnaṁ 
tasmai namo madhvadivākarāya ||2||
prapannatāpapraśamaikahetuṁ 
durvādivādīndhanadhūmaketum |
nirantaraṁ nirjitamīnaketuṁ 
namāmyahaṁ madhvamuniprakāṇḍam ||3||
śāntaṁ mahāntaṁ natapātakāntaṁ 
kāntaṁ nitāntaṁ kalitāgamāntam |
svāntaṁ nayantaṁ tripurārikāntaṁ 
kāntaṁ śriyo madhvaguruṁ namāmi ||4||
punnāmanāmne muravairidhāmne 
sampūrṇanāmne samadhītanāmne |
saṁkīrtādhokṣajapuṇyanāmne 
namo'stu madhvāya vimuktināmne ||5||
sanmānasaṁsajjanatāśaraṇyaṁ 
sanmānasantoṣitarāmacandram |
sanmānasavyaktapadaṁ praśāntaṁ 
namāmyahaṁ madhvamuniprakāśam ||6||
saṁstūyamānāya satāṁ samūhai-
ścandrāyamānāya cidamburāśeḥ |
dīpāyamānāya hariṁ didṛkṣo-
ralaṁ namo madhvamunīśvarāya ||7||
guṇaikasindhuṁ gurupuṁgavaṁ taṁ 
sadaikabandhuṁ sakalākalāpam |
manojabandhoḥ śritapādapadmaṁ 
namāmyahaṁ madhvamuniṁ vareṇyam ||8||
madhvāṣṭakaṁ puṇyamidaṁ trisandhyaṁ 
paṭhantyalaṁ bhaktiyutā janā ye |
teṣāmabhīṣṭaṁ vitanoti vāyuḥ 
śrīmadhvanāmā gurupuṁgavo'yam ||9||
paramapuruṣaśrīcaraṇasaroruhamadhukararūpakamānasamuditam |
gurukulatilakaśrīmadānandatīrthayogivaraṁ satataṁ vande ||10||
śrīmallikucavaṁśena madhvāṣṭakamudīritam |
śrīmattrivikramākhyena gurvanugrahakārakam ||11||
|| iti kavikulatilaka śrīmattrivikramapaṇḍitācāryaviracitaṁ śrīmadhvāṣṭakam ||