అథ శ్రీమధ్వాష్టకం
అజ్ఞాననాశాయ సతాం జనానాం
కృతావతారాయ వసుంధరాయాం |

మధ్వాభిధానాయ మహామహిమ్నే
హతారిసంఘాయ నమోఽనిలాయ || 1||

యేన స్వసిద్ధాంతసరోజమద్ధా
వికాసితం గోభిరలం విశుద్ధైః |

దుస్తర్కనీహారకులం చ భిన్నం
తస్మై నమో మధ్వదివాకరాయ || 2||

ప్రపన్నతాపప్రశమైకహేతుం
దుర్వాదివాదీంధనధూమకేతుం |

నిరంతరం నిర్జితమీనకేతుం
నమామ్యహం మధ్వమునిప్రకాండం || 3||

శాంతం మహాంతం నతపాతకాంతం
కాంతం నితాంతం కలితాగమాంతం |

స్వాంతం నయంతం త్రిపురారికాంతం
కాంతం శ్రియో మధ్వగురుం నమామి || 4||

పున్నామనామ్నే మురవైరిధామ్నే
సంపూర్ణనామ్నే సమధీతనామ్నే |

సంకీర్తాధోక్షజపుణ్యనామ్నే
నమోఽస్తు మధ్వాయ విముక్తినామ్నే || 5||

సన్మానసంసజ్జనతాశరణ్యం
సన్మానసంతోషితరామచంద్రం |

సన్మానసవ్యక్తపదం ప్రశాంతం
నమామ్యహం మధ్వమునిప్రకాశం || 6||

సంస్తూయమానాయ సతాం సమూహై-
శ్చంద్రాయమానాయ చిదంబురాశేః |

దీపాయమానాయ హరిం దిదృక్షో-
రలం నమో మధ్వమునీశ్వరాయ || 7||

గుణైకసింధుం గురుపుంగవం తం
సదైకబంధుం సకలాకలాపం |

మనోజబంధోః శ్రితపాదపద్మం
నమామ్యహం మధ్వమునిం వరేణ్యం || 8||

మధ్వాష్టకం పుణ్యమిదం త్రిసంధ్యం
పఠంత్యలం భక్తియుతా జనా యే |

తేషామభీష్టం వితనోతి వాయుః
శ్రీమధ్వనామా గురుపుంగవోఽయం || 9||

పరమపురుషశ్రీచరణసరోరుహమధుకరరూపకమానసముదితం |

గురుకులతిలకశ్రీమదానందతీర్థయోగివరం సతతం వందే || 10||

శ్రీమల్లికుచవంశేన మధ్వాష్టకముదీరితం |

శ్రీమత్త్రివిక్రమాఖ్యేన గుర్వనుగ్రహకారకం || 11||

|| ఇతి కవికులతిలక శ్రీమత్త్రివిక్రమపండితాచార్యవిరచితం శ్రీమధ్వాష్టకం ||