अथ श्रीमध्वाष्टकम्
अज्ञाननाशाय सतां जनानां
कृतावताराय वसुन्धरायाम् |

मध्वाभिधानाय महामहिम्ने
हतारिसंघाय नमोऽनिलाय || १||

येन स्वसिद्धान्तसरोजमद्धा
विकासितं गोभिरलं विशुद्धैः |

दुस्तर्कनीहारकुलं च भिन्नं
तस्मै नमो मध्वदिवाकराय ||२||

प्रपन्नतापप्रशमैकहेतुं
दुर्वादिवादीन्धनधूमकेतुम् |

निरन्तरं निर्जितमीनकेतुं
नमाम्यहं मध्वमुनिप्रकाण्डम् ||३||

शान्तं महान्तं नतपातकान्तं
कान्तं नितान्तं कलितागमान्तम् |

स्वान्तं नयन्तं त्रिपुरारिकान्तं
कान्तं श्रियो मध्वगुरुं नमामि ||४||

पुन्नामनाम्ने मुरवैरिधाम्ने
सम्पूर्णनाम्ने समधीतनाम्ने |

संकीर्ताधोक्षजपुण्यनाम्ने
नमोऽस्तु मध्वाय विमुक्तिनाम्ने ||५||

सन्मानसंसज्जनताशरण्यं
सन्मानसन्तोषितरामचन्द्रम् |

सन्मानसव्यक्तपदं प्रशान्तं
नमाम्यहं मध्वमुनिप्रकाशम् ||६||

संस्तूयमानाय सतां समूहै-
श्चन्द्रायमानाय चिदम्बुराशेः |

दीपायमानाय हरिं दिदृक्षो-
रलं नमो मध्वमुनीश्वराय ||७||

गुणैकसिन्धुं गुरुपुंगवं तं
सदैकबन्धुं सकलाकलापम् |

मनोजबन्धोः श्रितपादपद्मं
नमाम्यहं मध्वमुनिं वरेण्यम् ||८||

मध्वाष्टकं पुण्यमिदं त्रिसन्ध्यं
पठन्त्यलं भक्तियुता जना ये |

तेषामभीष्टं वितनोति वायुः
श्रीमध्वनामा गुरुपुंगवोऽयम् ||९||

परमपुरुषश्रीचरणसरोरुहमधुकररूपकमानसमुदितम् |

गुरुकुलतिलकश्रीमदानन्दतीर्थयोगिवरं सततं वन्दे ||१०||

श्रीमल्लिकुचवंशेन मध्वाष्टकमुदीरितम् |

श्रीमत्त्रिविक्रमाख्येन गुर्वनुग्रहकारकम् ||११||

|| इति कविकुलतिलक श्रीमत्त्रिविक्रमपण्डिताचार्यविरचितं श्रीमध्वाष्टकम् ||