atha śrīkṛṣṇāṣṭakam
śrī vāsudeva madhūsudana kaiṭabhāre
lakṣmīśa pakṣivaravāhana vāmaneti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||1||

goviṁda gokulapate navanītacora
śrīnaṁdanaṁdana mukuṁda dayāpareti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||2||

nārāyaṇākhilaguṇārṇava sarvaveda
pārāyaṇapriya gajādipamocaketi |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||3||

ānaṁdasaccidakhilātmaka bhaktavarga
svānaṁdadāna caturāgama sannuteti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||4||

śrīprāṇato'dhikasukhātmakarūpadeva
prodyaddivākaranibhācyuta sadguṇeti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||5||

viśvāṁdhakārimukhadaivatavaṁdya śaśvat
viśvodbhavasthitimṛtiprabhṛtipradeti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||6||

nityaikarūpa daśarūpa sahasralakṣā-
naṁtorurūpa śatarūpa virūpaketi |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||7||

sarveśa sarvagata sarvaśubhānurūpa
sarvāṁtarātmaka sadodita satpriyeti |

śrīkṛṣṇa manmaraṇakāla upāgate tu
tvannāma madvacanagocaratāmupaitu ||8||

|| iti śrīviṣṇutīrthaviracitaṁ śrīkṛṣṇāṣṭakam ||