అథ శ్రీకృష్ణాష్టకం
వ్రజమనః శరణం యదునందనం
రజతపీఠపురస్థితమాదరాత్ |

భజకలోకతతిం స దయానిధిః
నిజపదం నయతీతి సదాగమాః || 1||

అజముఖామరబృందసువందితం
భుజగశీర్షవిహారిపదాంబుజం |

యజ యథార్థమనీషిహృదాలయం
త్యజ వినశ్వరదుర్విషయానలం || 2||

విజయమిత్రమమందధియాఽర్చితం
వ్రజపతిం భుజదండధృతాచలం |

సుజనతాలదానవిచక్షణం
ద్విజవరాననమాశ్రయ యాదవం || 3||

సృజతి పాతి హరత్యథ విష్టపం
ష్వజత యో హ్యురసా కమలాలయం |

రుజమపాస్య సుఖం స్వమసౌ దిశేత్
విజనదేశ ఉపాస్వ మధుద్విషం || 4||

గజరదాహతమల్లమమర్త్యదో-
వ్యజనవీజితమక్షిజితాంబుజం |

అజసి చేచ్ఛరణం మురవైరిణం
న జనినాశపురోగమదూషణం || 5||

అజరనాథమహామదవారణం
భుజనివేశననాశితకేశినం |

స్వజనురీశవరాసురసంహరం
వ్రజ రజస్తమాదినివృత్తయే || 6||

ద్విజసుతప్రదమంగ పయశ్చర-
ధ్వజజనిం సమరాహతశాత్రవం |

అజనగేశతురంగమమానత-
వ్రజసమీహితదం భజ యాదవం || 7||

రజకసామజకంసముఖాసనం
స్వజననీజనకామితసౌఖ్యదం |

రజనినాథకులాభరణం ధృత-
స్రజమనంతగుణం భజ హే మనః || 8||

ఋతమనీషహృదబ్జసురాలయః
శ్రితసమీహితదో మధుశాత్రవః |

కృతమిదం యతినా పఠతేఽష్టకం
సుతముఖేష్టతతిం దదతే హరిః || 9||

|| ఇతి శ్రీసత్యసంధయతి కృతం శ్రీకృష్ణాష్టకం ||