atha śrīkṛṣṇāṣṭakam
vrajamanaḥ śaraṇaṁ yadunaṁdanaṁ
rajatapīṭhapurasthitamādarāt |

bhajakalokatatiṁ sa dayānidhiḥ
nijapadaṁ nayatīti sadāgamāḥ ||1||

ajamukhāmarabṛṁdasuvaṁditaṁ
bhujagaśīrṣavihāripadāṁbujam |

yaja yathārthamanīṣihṛdālayaṁ
tyaja vinaśvaradurviṣayānalam ||2||

vijayamitramamaṁdadhiyā'rcitaṁ
vrajapatiṁ bhujadaṁḍadhṛtācalam |

sujanatāladānavicakṣaṇaṁ
dvijavarānanamāśraya yādavam ||3||

sṛjati pāti haratyatha viṣṭapaṁ
ṣvajata yo hyurasā kamalālayam |

rujamapāsya sukhaṁ svamasau diśet
vijanadeśa upāsva madhudviṣam ||4||

gajaradāhatamallamamartyado-
vyajanavījitamakṣijitāṁbujam |

ajasi ceccharaṇaṁ muravairiṇaṁ
na janināśapurogamadūṣaṇam ||5||

ajaranāthamahāmadavāraṇaṁ
bhujaniveśananāśitakeśinam |

svajanurīśavarāsurasaṁharaṁ
vraja rajastamādinivṛttaye ||6||

dvijasutapradamaṁga payaścara-
dhvajajaniṁ samarāhataśātravam |

ajanageśaturaṁgamamānata-
vrajasamīhitadaṁ bhaja yādavam ||7||

rajakasāmajakaṁsamukhāsanaṁ
svajananījanakāmitasaukhyadam |

rajanināthakulābharaṇaṁ dhṛta-
srajamanaṁtaguṇaṁ bhaja he manaḥ ||8||

ṛtamanīṣahṛdabjasurālayaḥ
śritasamīhitado madhuśātravaḥ |

kṛtamidaṁ yatinā paṭhate'ṣṭakaṁ
sutamukheṣṭatatiṁ dadate hariḥ ||9||

|| iti śrīsatyasaṁdhayati kṛtaṁ śrīkṛṣṇāṣṭakam ||