॥ అథ కృష్ణాష్టకమ్ ॥

పాలయాచ్యుత పాలయాజిత పాలయ కమలాలయ ।
లీలయా ధృతభూధరాంబురుహోదర స్వజనోదర ॥

మధ్వమానసపద్మభానుసమం స్మరప్రతిమం స్మర ।
స్నిగ్ధనిర్మలశీతకాంతిలసన్ముఖం కరుణోన్ముఖమ్ ।
హృద్యకంబుసమానకంధరమక్షయం దురితక్షయం
స్నిగ్ధసంస్తుతరూప్యపీఠకృతాలయం హరిమాలయమ్ ॥౧॥

అంగదాదిసుశోభిపాణియుగేన సంక్షుభితైనసం
తుంగమాల్యమణీంద్రహారసరోరసం ఖలనీరసమ్ ।
మంగలప్రదమంథదామవిరాజితం భజతాజితం
తం గృణే వరరూప్యపీఠకృతాలయం హరిమాలయమ్ ॥౨॥

పీనరమ్యతనూదరం భజ హే మన: శుభ హే మన:
స్వానుభావనిదర్శనాయ దిశంతమర్థిసుశంతమమ్ ।
ఆనతోఽస్మి నిజార్జునప్రియసాధకం ఖలబాధకం
హీనతోజ్ఝితరూప్యపీఠకృతాలయం హరిమాలయమ్ ॥౩॥

హైమకింకిణిమాలికారశనాంచితం తమవంచితం
కమ్రకాంచనవస్త్రచిత్రకటిం ఘనప్రభయా ఘనమ్ ।
నమ్రనాగకరోపమోరుమనామయం శుభధీమయం
నౌమ్యహం వరరూప్యపీఠకృతాలయం హరిమాలయమ్ ॥౪॥

వృత్తజానుమనోజ్ఞజంఘమమోహదం పరమోహదం
రత్నకల్పనఖత్విషా హృతహృత్తమస్తతిముత్తమమ్ ।
ప్రత్యహం రచితార్చనం రమయా స్వయాఽఽగతయా స్వయం
చిత్త చింతయ రూప్యపీఠకృతాలయం హరిమాలయమ్ ॥౫॥

చారుపాదసరోజయుగ్మరుచాఽమరోచ్చయచామరో-
దారమూర్ధజభానుమండలరంజకం కలిభంజకమ్ ।
వీరతోచితభూషణం వరనూపురం స్వతనూపురం
ధారయాత్మని రూప్యపీఠకృతాలయం హరిమాలయమ్ ॥౬॥

శుష్కవాదిమనోఽతిదూరతరాగమోత్సవదాగమం
సత్కవీంద్రవచోవిలాసమహోదయం మహితోదయమ్ ।
లక్షయామి యతీశ్వరై: కృతపూజనం గుణభాజనం
ధిక్కృతోపమరూప్యపీఠకృతాలయం హరిమాలయమ్ ॥౭॥

నారదప్రియమావిశాంబురుహేక్షణం నిజరక్షణం
తారకోపమచారుదీపచయాంతరే గతచింత రే ।
ధీర మానస పూర్ణచంద్రసమానమచ్యుతమానమ
ద్వారకోపమరూప్యపీఠకృతాలయం హరిమాలయమ్ ॥౮॥

రూప్యపీఠకృతాలయస్య హరే: ప్రియం దురితాప్రియం
తత్పదార్చకవాదిరాజయతీరితం గుణపూరితమ్ ।
గోప్యమష్టకమేతదుచ్చముదే మమాస్త్విహ నిర్మమ
ప్రాప్య శుద్ధఫలాయ తత్ర సుకోమలం హృతధీమలమ్ ॥౯॥

పాలయాచ్యుత పాలయాజిత పాలయ కమలాలయ ।
లీలయా ధృతభూధరాంబురుహోదర స్వజనోదర ॥

॥ ఇతి శ్రీవాదిరాజతీర్థవిరచితం కృష్ణాష్టకమ్ ॥