|| atha kRRiShNAShTakam ||

pAlayAchyuta pAlayAjita pAlaya kamalAlaya |
lIlayA dhRRitabhUdharAMburuhodara svajanodara ||

madhvamAnasapadmabhAnusamaM smarapratimaM smara |
snigdhanirmalashItakAMtilasanmukhaM karuNonmukham |
hRRidyakaMbusamAnakaMdharamakShayaM duritakShayaM
snigdhasaMstutarUpyapIThakRRitAlayaM harimAlayam ||1||

aMgadAdisushobhipANiyugena saMkShubhitainasaM
tuMgamAlyamaNIMdrahArasarorasaM khalanIrasam |
maMgalapradamaMthadAmavirAjitaM bhajatAjitaM
taM gRRiNe vararUpyapIThakRRitAlayaM harimAlayam ||2||

pInaramyatanUdaraM bhaja he mana: shubha he mana:
svAnubhAvanidarshanAya dishaMtamarthisushaMtamam |
Anato.asmi nijArjunapriyasAdhakaM khalabAdhakaM
hInatojjhitarUpyapIThakRRitAlayaM harimAlayam ||3||

haimakiMkiNimAlikArashanAMchitaM tamavaMchitaM
kamrakAMchanavastrachitrakaTiM ghanaprabhayA ghanam |
namranAgakaropamorumanAmayaM shubhadhImayaM
naumyahaM vararUpyapIThakRRitAlayaM harimAlayam ||4||

vRRittajAnumanoj~najaMghamamohadaM paramohadaM
ratnakalpanakhatviShA hRRitahRRittamastatimuttamam |
pratyahaM rachitArchanaM ramayA svayA.a.agatayA svayaM
chitta chiMtaya rUpyapIThakRRitAlayaM harimAlayam ||5||

chArupAdasarojayugmaruchA.amarochchayachAmaro-
dAramUrdhajabhAnumaMDalaraMjakaM kalibhaMjakam |
vIratochitabhUShaNaM varanUpuraM svatanUpuraM
dhArayAtmani rUpyapIThakRRitAlayaM harimAlayam ||6||

shuShkavAdimano.atidUratarAgamotsavadAgamaM
satkavIMdravachovilAsamahodayaM mahitodayam |
lakShayAmi yatIshvarai: kRRitapUjanaM guNabhAjanaM
dhikkRRitopamarUpyapIThakRRitAlayaM harimAlayam ||7||

nAradapriyamAvishAMburuhekShaNaM nijarakShaNaM
tArakopamachArudIpachayAMtare gatachiMta re |
dhIra mAnasa pUrNachaMdrasamAnamachyutamAnama
dvArakopamarUpyapIThakRRitAlayaM harimAlayam ||8||

rUpyapIThakRRitAlayasya hare: priyaM duritApriyaM
tatpadArchakavAdirAjayatIritaM guNapUritam |
gopyamaShTakametaduchchamude mamAstviha nirmama
prApya shuddhaphalAya tatra sukomalaM hRRitadhImalam ||9||

pAlayAchyuta pAlayAjita pAlaya kamalAlaya |
lIlayA dhRRitabhUdharAMburuhodara svajanodara ||

|| iti shrIvAdirAjatIrthavirachitaM kRRiShNAShTakam ||