అథ కరావలంబనస్తోత్రం
త్రయ్యా వికాసకమజం ముహురంతరేవ
సంచింత్య మధ్వగురుపాదయుగం గురూంశ్చ |
వేదేశపాదజలజం హృది సాధు కృత్వా
సంప్రార్థయే శ్రుతివికాసకహస్తదానం ||1||

పద్మాసనాదిసురసత్తమభూసురాది-
సల్లోకబోధదజనే బదరీనివాసిన్ |
సచ్ఛాస్త్ర శస్త్రహృతసత్కుమతే సదిష్ట
వాసిష్ఠకృష్ణ మమ దేహి కరావలంబం ||2||

ఆమ్నాయవిస్తరవిశారద శారదేశ
భూతాధిపాదిసురసంస్తుత పాదపద్మ |
యోగీశ యోగిహృదయామలకంజవాస
వాసిష్ఠకృష్ణ మమ దేహి కరావలంబం ||3||

సద్బ్రహ్మసూత్రవరభారతతంత్రపూర్వ-
నిర్మాణ నిర్మలమతేఽఖిలదోషదూర |
ఆనందపూర్ణకరుణాకర దేవదేవ
వాసిష్ఠకృష్ణ మమ దేహి కరావలంబం ||4||

అర్కాత్మజాజలతరంగవిచారిచారు-
వాయూపనీతశుభగంధతరూపవాసిన్ |
అర్కప్రభైణవరచర్మధరోరుధామన్
వాసిష్ఠకృష్ణ మమ దేహి కరావలంబం ||5||

తర్కాభయేతకర తాత శుకస్య కీట-
రాజ్యప్రదాఘటితసంఘటకాత్మశక్తే |
భృత్యార్తిహన్ ప్రణతపూరుసువంశకారిన్
వాసిష్ఠకృష్ణ మమ దేహి కరావలంబం ||6||

కాలే జలే జలదనీల కృతోరున(వ)ర్మన్-
ఆమ్నాయహారిసురవైరిహరావతార |
మత్స్యస్వరూప కృతకంజజవేదదాయిన్(దాన)
వాసిష్ఠకృష్ణ మమ దేహి కరావలంబం ||7||

గీర్వాణదైత్యబలలోలితసింధుమగ్న-
మంథాచలోద్ధరణ దేవ సుధాప్తిహేతోః |
కూర్మస్వరూపధర భూధర నీరచారిన్
వాసిష్ఠకృష్ణ మమ దేహి కరావలంబం ||8||

క్షోణీహరోరుబలదైత్యహిరణ్యనేత్ర-
ప్రధ్వంసదంష్ట్రయుగలాగ్రసురప్రమోద |
పృథ్వీధరాధ్వరవరాంగ వరాహరూప
వాసిష్ఠకృష్ణ మమ దేహి కరావలంబం ||9||

ప్రహ్లాదశోకవినిమోచన దేవజాత-
సంతోషదోరుబలదైత్యహిరణ్యదారిన్ |
సింహాస్యమానుషశరీరయుతావతార
వాసిష్ఠకృష్ణ మమ దేహి కరావలంబం ||10||

దేవేంద్రరాజ్యహరదానవరాజయజ్ఞ-
శాలార్థిరూపధర వజ్రధరార్తిహారిన్ |
యాంచామిషాదసురవంచక వామనేశ
వాసిష్ఠకృష్ణ మమ దేహి కరావలంబం ||11||

తాతాపకారినృపవంశవనప్రదాహ-
వహ్నే భృగుప్రవర రామ రమానివాస |
సూర్యాంశుశుభ్రపరశుప్రవరాయుధాఢ్య
వాసిష్ఠకృష్ణ మమ దేహి కరావలంబం ||12||

రక్షోధిరాజదశకంధరకుంభకర్ణ-
పూర్వారికాలన మరుద్వరసూనుమిత్ర |
సీతామనోహర వరాంగ రఘూత్థరామ
వాసిష్ఠకృష్ణ మమ దేహి కరావలంబం ||13||

కృష్ణాప్రియాప్రియకరావనిభారభూత-
రాజన్యసూదన సురద్విజమోదదాయిన్ |
భైష్మీపురఃసరవధూవరకేలికృష్ణ
వాసిష్ఠకృష్ణ మమ దేహి కరావలంబం ||14||

సద్ధర్మచారిజినముఖ్యసురారివృంద-
సమ్మోహన త్రిదశబోధన బుద్ధరూప |
ఉగ్రాదిహేతినిచయగ్రసనామితాత్మన్
వాసిష్ఠకృష్ణ మమ దేహి కరావలంబం ||15||

జ్ఞానాదిసద్గుణవిహీనజనప్రకీర్ణ-
కాలే కలేస్తురగవాహన దుష్టహారిన్ |
కల్కిస్వరూప కృతపూర్వయుగప్రవృత్తే
వాసిష్ఠకృష్ణ మమ దేహి కరావలంబం ||16||

యజ్ఞైతరేయకపిలర్షభదత్తధన్వం-
తర్యశ్వసన్ముఖకుమారసుయోషిదాత్మన్ |
సద్ధర్మసూనువర తాపస హంసరూప
వాసిష్ఠకృష్ణ మమ దేహి కరావలంబం ||17||

సత్కేశవాదిద్విషడాత్మక వాసుదేవా-
ద్యాత్మాదినా సుచతురూప సుశింశుమార |
కృద్ధోల్కపూర్వకసుపంచకరూప దేవ
వాసిష్ఠకృష్ణ మమ దేహి కరావలంబం ||18||

నారాయణాదిశతరూప సహస్రరూప |
విశ్వాదినా సుబహురూప పరాదినా చ |
దివ్యాజితాద్యమితరూప సువిశ్వరూప
వాసిష్ఠకృష్ణ మమ దేహి కరావలంబం ||19||

శ్రీవిష్ణునామగష్ణువర్ణగసంధిగాత్మన్ |
మండూకసత్తనుజహ్రస్వసునామకేన |
ధ్యాతర్షిణా సుసుఖతీర్థకరాబ్జసేవ్య
వాసిష్ఠకృష్ణ మమ దేహి కరావలంబం ||20||

వైకుంఠపూర్వకత్రిధామగతత్రిరూప |
స్వక్ష్యాదిధామగతవిశ్వపురఃసరాత్మన్ |
సత్కేశవాదిచతురుత్తరవింశరూప
వాసిష్ఠకృష్ణ మమ దేహి కరావలంబం ||21||

సత్పంచరాత్రప్రతిపాద్యరమాదిరూప-
వ్యూహాత్ పురా సుపరిపూజ్యనవస్వరూప |
విమలాదిశక్తినవకాత్మకదివ్యరూప
వాసిష్ఠకృష్ణ మమ దేహి కరావలంబం ||22||

స్వాయంభువాదిమనుసంస్థిత దివ్యరాజ-
రాజేశ్వరాత్మక తథా సదుపేంద్రనామన్ |
సర్వేషు రాజసు నివిష్టవిభూతిరూప
వాసిష్ఠకృష్ణ మమ దేహి కరావలంబం ||23||

ప్రద్యుమ్నపార్థనరవైన్యబలానిరుద్ధ-
పూర్వేషు సంస్థితవిశేషవిభూతిరూప |
బ్రహ్మాదిజీవనివహాఖ్యవిభిన్నకాంశ
వాసిష్ఠకృష్ణ మమ దేహి కరావలంబం ||24||

(సత్పృశ్నిగర్భపితృహృద్యగయాప్రయాగ-
వారాణసీస్థితగదాధరమాధవాత్మన్ |
సత్ శ్రీకరాఖ్యహరినామకవ్యూహరూప
వాసిష్ఠకృష్ణ మమ దేహి కరావలంబం ||25||)

శ్రీవేంకటేశ సువిమానగరంగనాథ
నాథావిముక్తిగప్రయాగగమాధవాత్మన్ |
కాంచీస్థసద్వరదరాజత్రివిక్రమాత్మన్
వాసిష్ఠకృష్ణ మమ దేహి కరావలంబం ||26||

సద్ద్వారకారజతపీఠసుపర్ణపూర్వ-
బ్రహ్మణ్యమధ్యమఠసంస్థితదివ్యమూర్తే |
సత్పాజకస్థితగయాస్థగదాధరాత్మన్
వాసిష్ఠకృష్ణ మమ దేహి కరావలంబం ||27||

వేదేశమద్గురుకరార్చితపాదపద్మ-
శ్రీకేశవధ్రువవినిర్మితదివ్యమూర్తే |
శ్రీభీమరథ్యమలతీరమణూరవాసిన్
వాసిష్ఠకృష్ణ మమ దేహి కరావలంబం ||28||

శ్రీపాండురంగసుస్యమంతకగండికాశ్రీ-
ముష్ణాదిక్షేత్రవరసంస్థితనైకమూర్తే |
రూపైర్గుణైరవయవైస్తతితః స్వనంత
వాసిష్ఠకృష్ణ మమ దేహి కరావలంబం ||29||

అఆదిక్షాంతతతవర్ణసువాచ్యభూతై-
ర్నిర్భేదమూర్తికమహాసదజాదిరూపైః |
శక్త్యాదిభిర్విగతభేదదశైకరూప
వాసిష్ఠకృష్ణ మమ దేహి కరావలంబం ||30||

సూర్యానలప్రభృతిహృద్దురితౌఘతూల-
రాశిప్రదాహకసుదర్శననామధేయ |
నారాయణప్రభృతిరూపసుపంచకాత్మన్
వాసిష్ఠకృష్ణ మమ దేహి కరావలంబం ||31||

ఇచ్ఛాదిశక్తిత్రితయేన తథాఽణిమాది-
శక్త్యష్టకేన విగతాఖిలభేదమూర్తే |
సన్మోచికాదినవశక్త్యవిభిన్నకాంశ
వాసిష్ఠకృష్ణ మమ దేహి కరావలంబం ||32||

జీవస్వరూపవినియామకబింబరూప |
మూలేశనామక సుసారభుగింధరూప |
ప్రాదేశరూపక విరాడథ పద్మనాభ
వాసిష్ఠకృష్ణ మమ దేహి కరావలంబం ||33||

క్షారాబ్ధిసంగతమహాజలపాతృవాడ-
వాగ్నిస్వరూప పరమాణుగతాణురూప |
అవ్యాకృతాంబరగతాపరిమేయరూప
వాసిష్ఠకృష్ణ మమ దేహి కరావలంబం ||34||

బ్రహ్మాదిసర్వజగతః సువిశేషతో వి
సర్వత్ర సంస్థితినిమిత్తత ఏవ చాసః |
వ్యాసః స వీతి హి శ్రుతేరితి వ్యాసనామన్
వాసిష్ఠకృష్ణ మమ దేహి కరావలంబం ||35||

నిర్దోషపూర్ణగుణచిజ్జడభిన్నరూప
శ్రుత్యా యతస్త్వ్వధిగతోఽసి తతస్త్వనామన్ |
సచ్ఛ్రీకరాఖ్యహరినామకవ్యూహరూప
వాసిష్ఠకృష్ణ మమ దేహి కరావలంబం ||36||

పైలౌడులోమివరజైమినికాశకృత్స్న-
కార్ష్ణాజినిప్రభృతిశిష్యసుసేవితాంఘ్రే |
కానీన మద్గురుసుసేవ్యపదాబ్జయుగ్మ
వాసిష్ఠకృష్ణ మమ దేహి కరావలంబం ||37||

నానావికర్మజనితాశుభసాగరాంతః
సంభ్రామ్యతః పరిహతస్య షడూర్మిజాలైః |
పుత్రాదినక్రనిగృహీతశరీరకస్య
వాసిష్ఠకృష్ణ మమ దేహి కరావలంబం ||38||

ఆశామదప్రభృతిసింహవృకాదిసత్వా-
కీర్ణేఽటతో భవభయంకరకాననేఽస్మిన్ |
పంచేషుచోరహృతబోధసువిత్తకస్య
వాసిష్ఠకృష్ణ మమ దేహి కరావలంబం ||39||

లక్ష్మీనివాస భవనీరవిహీనకూప-
మధ్యస్థితస్య మదభారవిభిన్నబుద్ధేః |
తృష్ణాఖ్యవారణభయేన దిగంతభాజో
వాసిష్ఠకృష్ణ మమ దేహి కరావలంబం ||40||

అజ్ఞానమోహపటలాద్గతచక్షుషోఽలం
మార్గాన్నిజాత్ స్ఖలత ఈశదయాంబురాశే |
కిం గమ్యమిత్యవిరతం రటతో రమేశ
వాసిష్ఠకృష్ణ మమ దేహి కరావలంబం ||41||

ఆజన్మచీర్ణబహుదోషిణ ఈశ జాతు
త్వత్పాదనీరజయుగం హృది కుర్వతోఽలం |
దేవాపరాధమనవేక్ష్య చ వీక్ష్య భక్తిం
వాసిష్ఠకృష్ణ మమ దేహి కరావలంబం ||42||

ఆమ్నాయభారతపురాణసరఃప్రభూత-
వాసిష్ఠకృష్ణనుతిపంకజమాలికేయం |
దేవ త్వదర్థమమలాం రచితోచితాం తాం
కృత్వా ధ్రియస్వ హృదయే భవ భూతిదో మే ||43||

వాసిష్ఠకృష్ణపదపద్మమధువ్రతేన
వేదేశతీర్థగురుసేవకయాదవేన |
హస్తావలంబనమిదం రచితం పఠేద్యః |
తస్య ప్రదాస్యతి కరం బదరీనివాసీ ||44||

వేదేశతీర్థగురుమానసనీరజస్థ-
శ్రీమధ్వహృత్కమలవాసిరమానివాసః |
ప్రీతోఽస్త్వనేన శుభదో మమ దేవపూజా- |
వ్యాఖ్యాదిసత్కృతికృతో బదరీనివాసీ ||45||

|| ఇతి శ్రీయదుపత్యాచార్యవిరచితం శ్రీవేదవ్యాసకరావలంబనస్తోత్రం ||