ಅಥ ಕರಾವಲಂಬನಸ್ತೋತ್ರಂ
ತ್ರಯ್ಯಾ ವಿಕಾಸಕಮಜಂ ಮುಹುರಂತರೇವ
ಸಂಚಿಂತ್ಯ ಮಧ್ವಗುರುಪಾದಯುಗಂ ಗುರೂಂಶ್ಚ |
ವೇದೇಶಪಾದಜಲಜಂ ಹೃದಿ ಸಾಧು ಕೃತ್ವಾ
ಸಂಪ್ರಾರ್ಥಯೇ ಶ್ರುತಿವಿಕಾಸಕಹಸ್ತದಾನಂ ||1||

ಪದ್ಮಾಸನಾದಿಸುರಸತ್ತಮಭೂಸುರಾದಿ-
ಸಲ್ಲೋಕಬೋಧದಜನೇ ಬದರೀನಿವಾಸಿನ್ |
ಸಚ್ಛಾಸ್ತ್ರ ಶಸ್ತ್ರಹೃತಸತ್ಕುಮತೇ ಸದಿಷ್ಟ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||2||

ಆಮ್ನಾಯವಿಸ್ತರವಿಶಾರದ ಶಾರದೇಶ
ಭೂತಾಧಿಪಾದಿಸುರಸಂಸ್ತುತ ಪಾದಪದ್ಮ |
ಯೋಗೀಶ ಯೋಗಿಹೃದಯಾಮಲಕಂಜವಾಸ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||3||

ಸದ್ಬ್ರಹ್ಮಸೂತ್ರವರಭಾರತತಂತ್ರಪೂರ್ವ-
ನಿರ್ಮಾಣ ನಿರ್ಮಲಮತೇಽಖಿಲದೋಷದೂರ |
ಆನಂದಪೂರ್ಣಕರುಣಾಕರ ದೇವದೇವ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||4||

ಅರ್ಕಾತ್ಮಜಾಜಲತರಂಗವಿಚಾರಿಚಾರು-
ವಾಯೂಪನೀತಶುಭಗಂಧತರೂಪವಾಸಿನ್ |
ಅರ್ಕಪ್ರಭೈಣವರಚರ್ಮಧರೋರುಧಾಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||5||

ತರ್ಕಾಭಯೇತಕರ ತಾತ ಶುಕಸ್ಯ ಕೀಟ-
ರಾಜ್ಯಪ್ರದಾಘಟಿತಸಂಘಟಕಾತ್ಮಶಕ್ತೇ |
ಭೃತ್ಯಾರ್ತಿಹನ್ ಪ್ರಣತಪೂರುಸುವಂಶಕಾರಿನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||6||

ಕಾಲೇ ಜಲೇ ಜಲದನೀಲ ಕೃತೋರುನ(ವ)ರ್ಮನ್-
ಆಮ್ನಾಯಹಾರಿಸುರವೈರಿಹರಾವತಾರ |
ಮತ್ಸ್ಯಸ್ವರೂಪ ಕೃತಕಂಜಜವೇದದಾಯಿನ್(ದಾನ)
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||7||

ಗೀರ್ವಾಣದೈತ್ಯಬಲಲೋಲಿತಸಿಂಧುಮಗ್ನ-
ಮಂಥಾಚಲೋದ್ಧರಣ ದೇವ ಸುಧಾಪ್ತಿಹೇತೋಃ |
ಕೂರ್ಮಸ್ವರೂಪಧರ ಭೂಧರ ನೀರಚಾರಿನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||8||

ಕ್ಷೋಣೀಹರೋರುಬಲದೈತ್ಯಹಿರಣ್ಯನೇತ್ರ-
ಪ್ರಧ್ವಂಸದಂಷ್ಟ್ರಯುಗಲಾಗ್ರಸುರಪ್ರಮೋದ |
ಪೃಥ್ವೀಧರಾಧ್ವರವರಾಂಗ ವರಾಹರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||9||

ಪ್ರಹ್ಲಾದಶೋಕವಿನಿಮೋಚನ ದೇವಜಾತ-
ಸಂತೋಷದೋರುಬಲದೈತ್ಯಹಿರಣ್ಯದಾರಿನ್ |
ಸಿಂಹಾಸ್ಯಮಾನುಷಶರೀರಯುತಾವತಾರ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||10||

ದೇವೇಂದ್ರರಾಜ್ಯಹರದಾನವರಾಜಯಜ್ಞ-
ಶಾಲಾರ್ಥಿರೂಪಧರ ವಜ್ರಧರಾರ್ತಿಹಾರಿನ್ |
ಯಾಂಚಾಮಿಷಾದಸುರವಂಚಕ ವಾಮನೇಶ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||11||

ತಾತಾಪಕಾರಿನೃಪವಂಶವನಪ್ರದಾಹ-
ವಹ್ನೇ ಭೃಗುಪ್ರವರ ರಾಮ ರಮಾನಿವಾಸ |
ಸೂರ್ಯಾಂಶುಶುಭ್ರಪರಶುಪ್ರವರಾಯುಧಾಢ್ಯ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||12||

ರಕ್ಷೋಧಿರಾಜದಶಕಂಧರಕುಂಭಕರ್ಣ-
ಪೂರ್ವಾರಿಕಾಲನ ಮರುದ್ವರಸೂನುಮಿತ್ರ |
ಸೀತಾಮನೋಹರ ವರಾಂಗ ರಘೂತ್ಥರಾಮ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||13||

ಕೃಷ್ಣಾಪ್ರಿಯಾಪ್ರಿಯಕರಾವನಿಭಾರಭೂತ-
ರಾಜನ್ಯಸೂದನ ಸುರದ್ವಿಜಮೋದದಾಯಿನ್ |
ಭೈಷ್ಮೀಪುರಃಸರವಧೂವರಕೇಲಿಕೃಷ್ಣ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||14||

ಸದ್ಧರ್ಮಚಾರಿಜಿನಮುಖ್ಯಸುರಾರಿವೃಂದ-
ಸಮ್ಮೋಹನ ತ್ರಿದಶಬೋಧನ ಬುದ್ಧರೂಪ |
ಉಗ್ರಾದಿಹೇತಿನಿಚಯಗ್ರಸನಾಮಿತಾತ್ಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||15||

ಜ್ಞಾನಾದಿಸದ್ಗುಣವಿಹೀನಜನಪ್ರಕೀರ್ಣ-
ಕಾಲೇ ಕಲೇಸ್ತುರಗವಾಹನ ದುಷ್ಟಹಾರಿನ್ |
ಕಲ್ಕಿಸ್ವರೂಪ ಕೃತಪೂರ್ವಯುಗಪ್ರವೃತ್ತೇ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||16||

ಯಜ್ಞೈತರೇಯಕಪಿಲರ್ಷಭದತ್ತಧನ್ವಂ-
ತರ್ಯಶ್ವಸನ್ಮುಖಕುಮಾರಸುಯೋಷಿದಾತ್ಮನ್ |
ಸದ್ಧರ್ಮಸೂನುವರ ತಾಪಸ ಹಂಸರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||17||

ಸತ್ಕೇಶವಾದಿದ್ವಿಷಡಾತ್ಮಕ ವಾಸುದೇವಾ-
ದ್ಯಾತ್ಮಾದಿನಾ ಸುಚತುರೂಪ ಸುಶಿಂಶುಮಾರ |
ಕೃದ್ಧೋಲ್ಕಪೂರ್ವಕಸುಪಂಚಕರೂಪ ದೇವ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||18||

ನಾರಾಯಣಾದಿಶತರೂಪ ಸಹಸ್ರರೂಪ |
ವಿಶ್ವಾದಿನಾ ಸುಬಹುರೂಪ ಪರಾದಿನಾ ಚ |
ದಿವ್ಯಾಜಿತಾದ್ಯಮಿತರೂಪ ಸುವಿಶ್ವರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||19||

ಶ್ರೀವಿಷ್ಣುನಾಮಗಷ್ಣುವರ್ಣಗಸಂಧಿಗಾತ್ಮನ್ |
ಮಂಡೂಕಸತ್ತನುಜಹ್ರಸ್ವಸುನಾಮಕೇನ |
ಧ್ಯಾತರ್ಷಿಣಾ ಸುಸುಖತೀರ್ಥಕರಾಬ್ಜಸೇವ್ಯ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||20||

ವೈಕುಂಠಪೂರ್ವಕತ್ರಿಧಾಮಗತತ್ರಿರೂಪ |
ಸ್ವಕ್ಷ್ಯಾದಿಧಾಮಗತವಿಶ್ವಪುರಃಸರಾತ್ಮನ್ |
ಸತ್ಕೇಶವಾದಿಚತುರುತ್ತರವಿಂಶರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||21||

ಸತ್ಪಂಚರಾತ್ರಪ್ರತಿಪಾದ್ಯರಮಾದಿರೂಪ-
ವ್ಯೂಹಾತ್ ಪುರಾ ಸುಪರಿಪೂಜ್ಯನವಸ್ವರೂಪ |
ವಿಮಲಾದಿಶಕ್ತಿನವಕಾತ್ಮಕದಿವ್ಯರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||22||

ಸ್ವಾಯಂಭುವಾದಿಮನುಸಂಸ್ಥಿತ ದಿವ್ಯರಾಜ-
ರಾಜೇಶ್ವರಾತ್ಮಕ ತಥಾ ಸದುಪೇಂದ್ರನಾಮನ್ |
ಸರ್ವೇಷು ರಾಜಸು ನಿವಿಷ್ಟವಿಭೂತಿರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||23||

ಪ್ರದ್ಯುಮ್ನಪಾರ್ಥನರವೈನ್ಯಬಲಾನಿರುದ್ಧ-
ಪೂರ್ವೇಷು ಸಂಸ್ಥಿತವಿಶೇಷವಿಭೂತಿರೂಪ |
ಬ್ರಹ್ಮಾದಿಜೀವನಿವಹಾಖ್ಯವಿಭಿನ್ನಕಾಂಶ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||24||

(ಸತ್ಪೃಶ್ನಿಗರ್ಭಪಿತೃಹೃದ್ಯಗಯಾಪ್ರಯಾಗ-
ವಾರಾಣಸೀಸ್ಥಿತಗದಾಧರಮಾಧವಾತ್ಮನ್ |
ಸತ್ ಶ್ರೀಕರಾಖ್ಯಹರಿನಾಮಕವ್ಯೂಹರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||25||)

ಶ್ರೀವೇಂಕಟೇಶ ಸುವಿಮಾನಗರಂಗನಾಥ
ನಾಥಾವಿಮುಕ್ತಿಗಪ್ರಯಾಗಗಮಾಧವಾತ್ಮನ್ |
ಕಾಂಚೀಸ್ಥಸದ್ವರದರಾಜತ್ರಿವಿಕ್ರಮಾತ್ಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||26||

ಸದ್ದ್ವಾರಕಾರಜತಪೀಠಸುಪರ್ಣಪೂರ್ವ-
ಬ್ರಹ್ಮಣ್ಯಮಧ್ಯಮಠಸಂಸ್ಥಿತದಿವ್ಯಮೂರ್ತೇ |
ಸತ್ಪಾಜಕಸ್ಥಿತಗಯಾಸ್ಥಗದಾಧರಾತ್ಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||27||

ವೇದೇಶಮದ್ಗುರುಕರಾರ್ಚಿತಪಾದಪದ್ಮ-
ಶ್ರೀಕೇಶವಧ್ರುವವಿನಿರ್ಮಿತದಿವ್ಯಮೂರ್ತೇ |
ಶ್ರೀಭೀಮರಥ್ಯಮಲತೀರಮಣೂರವಾಸಿನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||28||

ಶ್ರೀಪಾಂಡುರಂಗಸುಸ್ಯಮಂತಕಗಂಡಿಕಾಶ್ರೀ-
ಮುಷ್ಣಾದಿಕ್ಷೇತ್ರವರಸಂಸ್ಥಿತನೈಕಮೂರ್ತೇ |
ರೂಪೈರ್ಗುಣೈರವಯವೈಸ್ತತಿತಃ ಸ್ವನಂತ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||29||

ಅಆದಿಕ್ಷಾಂತತತವರ್ಣಸುವಾಚ್ಯಭೂತೈ-
ರ್ನಿರ್ಭೇದಮೂರ್ತಿಕಮಹಾಸದಜಾದಿರೂಪೈಃ |
ಶಕ್ತ್ಯಾದಿಭಿರ್ವಿಗತಭೇದದಶೈಕರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||30||

ಸೂರ್ಯಾನಲಪ್ರಭೃತಿಹೃದ್ದುರಿತೌಘತೂಲ-
ರಾಶಿಪ್ರದಾಹಕಸುದರ್ಶನನಾಮಧೇಯ |
ನಾರಾಯಣಪ್ರಭೃತಿರೂಪಸುಪಂಚಕಾತ್ಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||31||

ಇಚ್ಛಾದಿಶಕ್ತಿತ್ರಿತಯೇನ ತಥಾಽಣಿಮಾದಿ-
ಶಕ್ತ್ಯಷ್ಟಕೇನ ವಿಗತಾಖಿಲಭೇದಮೂರ್ತೇ |
ಸನ್ಮೋಚಿಕಾದಿನವಶಕ್ತ್ಯವಿಭಿನ್ನಕಾಂಶ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||32||

ಜೀವಸ್ವರೂಪವಿನಿಯಾಮಕಬಿಂಬರೂಪ |
ಮೂಲೇಶನಾಮಕ ಸುಸಾರಭುಗಿಂಧರೂಪ |
ಪ್ರಾದೇಶರೂಪಕ ವಿರಾಡಥ ಪದ್ಮನಾಭ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||33||

ಕ್ಷಾರಾಬ್ಧಿಸಂಗತಮಹಾಜಲಪಾತೃವಾಡ-
ವಾಗ್ನಿಸ್ವರೂಪ ಪರಮಾಣುಗತಾಣುರೂಪ |
ಅವ್ಯಾಕೃತಾಂಬರಗತಾಪರಿಮೇಯರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||34||

ಬ್ರಹ್ಮಾದಿಸರ್ವಜಗತಃ ಸುವಿಶೇಷತೋ ವಿ
ಸರ್ವತ್ರ ಸಂಸ್ಥಿತಿನಿಮಿತ್ತತ ಏವ ಚಾಸಃ |
ವ್ಯಾಸಃ ಸ ವೀತಿ ಹಿ ಶ್ರುತೇರಿತಿ ವ್ಯಾಸನಾಮನ್
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||35||

ನಿರ್ದೋಷಪೂರ್ಣಗುಣಚಿಜ್ಜಡಭಿನ್ನರೂಪ
ಶ್ರುತ್ಯಾ ಯತಸ್ತ್ವ್ವಧಿಗತೋಽಸಿ ತತಸ್ತ್ವನಾಮನ್ |
ಸಚ್ಛ್ರೀಕರಾಖ್ಯಹರಿನಾಮಕವ್ಯೂಹರೂಪ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||36||

ಪೈಲೌಡುಲೋಮಿವರಜೈಮಿನಿಕಾಶಕೃತ್ಸ್ನ-
ಕಾರ್ಷ್ಣಾಜಿನಿಪ್ರಭೃತಿಶಿಷ್ಯಸುಸೇವಿತಾಂಘ್ರೇ |
ಕಾನೀನ ಮದ್ಗುರುಸುಸೇವ್ಯಪದಾಬ್ಜಯುಗ್ಮ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||37||

ನಾನಾವಿಕರ್ಮಜನಿತಾಶುಭಸಾಗರಾಂತಃ
ಸಂಭ್ರಾಮ್ಯತಃ ಪರಿಹತಸ್ಯ ಷಡೂರ್ಮಿಜಾಲೈಃ |
ಪುತ್ರಾದಿನಕ್ರನಿಗೃಹೀತಶರೀರಕಸ್ಯ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||38||

ಆಶಾಮದಪ್ರಭೃತಿಸಿಂಹವೃಕಾದಿಸತ್ವಾ-
ಕೀರ್ಣೇಽಟತೋ ಭವಭಯಂಕರಕಾನನೇಽಸ್ಮಿನ್ |
ಪಂಚೇಷುಚೋರಹೃತಬೋಧಸುವಿತ್ತಕಸ್ಯ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||39||

ಲಕ್ಷ್ಮೀನಿವಾಸ ಭವನೀರವಿಹೀನಕೂಪ-
ಮಧ್ಯಸ್ಥಿತಸ್ಯ ಮದಭಾರವಿಭಿನ್ನಬುದ್ಧೇಃ |
ತೃಷ್ಣಾಖ್ಯವಾರಣಭಯೇನ ದಿಗಂತಭಾಜೋ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||40||

ಅಜ್ಞಾನಮೋಹಪಟಲಾದ್ಗತಚಕ್ಷುಷೋಽಲಂ
ಮಾರ್ಗಾನ್ನಿಜಾತ್ ಸ್ಖಲತ ಈಶದಯಾಂಬುರಾಶೇ |
ಕಿಂ ಗಮ್ಯಮಿತ್ಯವಿರತಂ ರಟತೋ ರಮೇಶ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||41||

ಆಜನ್ಮಚೀರ್ಣಬಹುದೋಷಿಣ ಈಶ ಜಾತು
ತ್ವತ್ಪಾದನೀರಜಯುಗಂ ಹೃದಿ ಕುರ್ವತೋಽಲಂ |
ದೇವಾಪರಾಧಮನವೇಕ್ಷ್ಯ ಚ ವೀಕ್ಷ್ಯ ಭಕ್ತಿಂ
ವಾಸಿಷ್ಠಕೃಷ್ಣ ಮಮ ದೇಹಿ ಕರಾವಲಂಬಂ ||42||

ಆಮ್ನಾಯಭಾರತಪುರಾಣಸರಃಪ್ರಭೂತ-
ವಾಸಿಷ್ಠಕೃಷ್ಣನುತಿಪಂಕಜಮಾಲಿಕೇಯಂ |
ದೇವ ತ್ವದರ್ಥಮಮಲಾಂ ರಚಿತೋಚಿತಾಂ ತಾಂ
ಕೃತ್ವಾ ಧ್ರಿಯಸ್ವ ಹೃದಯೇ ಭವ ಭೂತಿದೋ ಮೇ ||43||

ವಾಸಿಷ್ಠಕೃಷ್ಣಪದಪದ್ಮಮಧುವ್ರತೇನ
ವೇದೇಶತೀರ್ಥಗುರುಸೇವಕಯಾದವೇನ |
ಹಸ್ತಾವಲಂಬನಮಿದಂ ರಚಿತಂ ಪಠೇದ್ಯಃ |
ತಸ್ಯ ಪ್ರದಾಸ್ಯತಿ ಕರಂ ಬದರೀನಿವಾಸೀ ||44||

ವೇದೇಶತೀರ್ಥಗುರುಮಾನಸನೀರಜಸ್ಥ-
ಶ್ರೀಮಧ್ವಹೃತ್ಕಮಲವಾಸಿರಮಾನಿವಾಸಃ |
ಪ್ರೀತೋಽಸ್ತ್ವನೇನ ಶುಭದೋ ಮಮ ದೇವಪೂಜಾ- |
ವ್ಯಾಖ್ಯಾದಿಸತ್ಕೃತಿಕೃತೋ ಬದರೀನಿವಾಸೀ ||45||

|| ಇತಿ ಶ್ರೀಯದುಪತ್ಯಾಚಾರ್ಯವಿರಚಿತಂ ಶ್ರೀವೇದವ್ಯಾಸಕರಾವಲಂಬನಸ್ತೋತ್ರಂ ||