atha karAvalaMbanastotraM
trayyA vikAsakamajaM muhuraMtareva
saMchiMtya madhvagurupAdayugaM gurUMshcha |
vedeshapAdajalajaM hR^idi sAdhu kR^itvA
saMprArthaye shrutivikAsakahastadAnaM ||1||

padmAsanAdisurasattamabhUsurAdi-
sallokabodhadajane badarInivAsin |
sachChAstra shastrahR^itasatkumate sadiShTa
vAsiShThakR^iShNa mama dehi karAvalaMbaM ||2||

AmnAyavistaravishArada shAradesha
bhUtAdhipAdisurasaMstuta pAdapadma |
yogIsha yogihR^idayAmalakaMjavAsa
vAsiShThakR^iShNa mama dehi karAvalaMbaM ||3||

sadbrahmasUtravarabhAratataMtrapUrva-
nirmANa nirmalamate.akhiladoShadUra |
AnaMdapUrNakaruNAkara devadeva
vAsiShThakR^iShNa mama dehi karAvalaMbaM ||4||

arkAtmajAjalataraMgavichArichAru-
vAyUpanItashubhagaMdhatarUpavAsin |
arkaprabhaiNavaracharmadharorudhAman
vAsiShThakR^iShNa mama dehi karAvalaMbaM ||5||

tarkAbhayetakara tAta shukasya kITa-
rAjyapradAghaTitasaMghaTakAtmashakte |
bhR^ityArtihan praNatapUrusuvaMshakArin
vAsiShThakR^iShNa mama dehi karAvalaMbaM ||6||

kAle jale jaladanIla kR^itoruna(va)rman-
AmnAyahArisuravairiharAvatAra |
matsyasvarUpa kR^itakaMjajavedadAyin(dAna)
vAsiShThakR^iShNa mama dehi karAvalaMbaM ||7||

gIrvANadaityabalalolitasiMdhumagna-
maMthAchaloddharaNa deva sudhAptihetoH |
kUrmasvarUpadhara bhUdhara nIrachArin
vAsiShThakR^iShNa mama dehi karAvalaMbaM ||8||

kShoNIharorubaladaityahiraNyanetra-
pradhvaMsadaMShTrayugalAgrasurapramoda |
pR^ithvIdharAdhvaravarAMga varAharUpa
vAsiShThakR^iShNa mama dehi karAvalaMbaM ||9||

prahlAdashokavinimochana devajAta-
saMtoShadorubaladaityahiraNyadArin |
siMhAsyamAnuShasharIrayutAvatAra
vAsiShThakR^iShNa mama dehi karAvalaMbaM ||10||

deveMdrarAjyaharadAnavarAjayaj~na-
shAlArthirUpadhara vajradharArtihArin |
yAMchAmiShAdasuravaMchaka vAmanesha
vAsiShThakR^iShNa mama dehi karAvalaMbaM ||11||

tAtApakArinR^ipavaMshavanapradAha-
vahne bhR^igupravara rAma ramAnivAsa |
sUryAMshushubhraparashupravarAyudhADhya
vAsiShThakR^iShNa mama dehi karAvalaMbaM ||12||

rakShodhirAjadashakaMdharakuMbhakarNa-
pUrvArikAlana marudvarasUnumitra |
sItAmanohara varAMga raghUttharAma
vAsiShThakR^iShNa mama dehi karAvalaMbaM ||13||

kR^iShNApriyApriyakarAvanibhArabhUta-
rAjanyasUdana suradvijamodadAyin |
bhaiShmIpuraHsaravadhUvarakelikR^iShNa
vAsiShThakR^iShNa mama dehi karAvalaMbaM ||14||

saddharmachArijinamukhyasurArivR^iMda-
sammohana tridashabodhana buddharUpa |
ugrAdihetinichayagrasanAmitAtman
vAsiShThakR^iShNa mama dehi karAvalaMbaM ||15||

j~nAnAdisadguNavihInajanaprakIrNa-
kAle kalesturagavAhana duShTahArin |
kalkisvarUpa kR^itapUrvayugapravR^itte
vAsiShThakR^iShNa mama dehi karAvalaMbaM ||16||

yaj~naitareyakapilarShabhadattadhanvaM-
taryashvasanmukhakumArasuyoShidAtman |
saddharmasUnuvara tApasa haMsarUpa
vAsiShThakR^iShNa mama dehi karAvalaMbaM ||17||

satkeshavAdidviShaDAtmaka vAsudevA-
dyAtmAdinA suchaturUpa sushiMshumAra |
kR^iddholkapUrvakasupaMchakarUpa deva
vAsiShThakR^iShNa mama dehi karAvalaMbaM ||18||

nArAyaNAdishatarUpa sahasrarUpa |
vishvAdinA subahurUpa parAdinA cha |
divyAjitAdyamitarUpa suvishvarUpa
vAsiShThakR^iShNa mama dehi karAvalaMbaM ||19||

shrIviShNunAmagaShNuvarNagasaMdhigAtman |
maMDUkasattanujahrasvasunAmakena |
dhyAtarShiNA susukhatIrthakarAbjasevya
vAsiShThakR^iShNa mama dehi karAvalaMbaM ||20||

vaikuMThapUrvakatridhAmagatatrirUpa |
svakShyAdidhAmagatavishvapuraHsarAtman |
satkeshavAdichaturuttaraviMsharUpa
vAsiShThakR^iShNa mama dehi karAvalaMbaM ||21||

satpaMcharAtrapratipAdyaramAdirUpa-
vyUhAt purA suparipUjyanavasvarUpa |
vimalAdishaktinavakAtmakadivyarUpa
vAsiShThakR^iShNa mama dehi karAvalaMbaM ||22||

svAyaMbhuvAdimanusaMsthita divyarAja-
rAjeshvarAtmaka tathA sadupeMdranAman |
sarveShu rAjasu niviShTavibhUtirUpa
vAsiShThakR^iShNa mama dehi karAvalaMbaM ||23||

pradyumnapArthanaravainyabalAniruddha-
pUrveShu saMsthitavisheShavibhUtirUpa |
brahmAdijIvanivahAkhyavibhinnakAMsha
vAsiShThakR^iShNa mama dehi karAvalaMbaM ||24||

(satpR^ishnigarbhapitR^ihR^idyagayAprayAga-
vArANasIsthitagadAdharamAdhavAtman |
sat shrIkarAkhyaharinAmakavyUharUpa
vAsiShThakR^iShNa mama dehi karAvalaMbaM ||25||)

shrIveMkaTesha suvimAnagaraMganAtha
nAthAvimuktigaprayAgagamAdhavAtman |
kAMchIsthasadvaradarAjatrivikramAtman
vAsiShThakR^iShNa mama dehi karAvalaMbaM ||26||

saddvArakArajatapIThasuparNapUrva-
brahmaNyamadhyamaThasaMsthitadivyamUrte |
satpAjakasthitagayAsthagadAdharAtman
vAsiShThakR^iShNa mama dehi karAvalaMbaM ||27||

vedeshamadgurukarArchitapAdapadma-
shrIkeshavadhruvavinirmitadivyamUrte |
shrIbhImarathyamalatIramaNUravAsin
vAsiShThakR^iShNa mama dehi karAvalaMbaM ||28||

shrIpAMDuraMgasusyamaMtakagaMDikAshrI-
muShNAdikShetravarasaMsthitanaikamUrte |
rUpairguNairavayavaistatitaH svanaMta
vAsiShThakR^iShNa mama dehi karAvalaMbaM ||29||

aAdikShAMtatatavarNasuvAchyabhUtai-
rnirbhedamUrtikamahAsadajAdirUpaiH |
shaktyAdibhirvigatabhedadashaikarUpa
vAsiShThakR^iShNa mama dehi karAvalaMbaM ||30||

sUryAnalaprabhR^itihR^idduritaughatUla-
rAshipradAhakasudarshananAmadheya |
nArAyaNaprabhR^itirUpasupaMchakAtman
vAsiShThakR^iShNa mama dehi karAvalaMbaM ||31||

ichChAdishaktitritayena tathA.aNimAdi-
shaktyaShTakena vigatAkhilabhedamUrte |
sanmochikAdinavashaktyavibhinnakAMsha
vAsiShThakR^iShNa mama dehi karAvalaMbaM ||32||

jIvasvarUpaviniyAmakabiMbarUpa |
mUleshanAmaka susArabhugiMdharUpa |
prAdesharUpaka virADatha padmanAbha
vAsiShThakR^iShNa mama dehi karAvalaMbaM ||33||

kShArAbdhisaMgatamahAjalapAtR^ivADa-
vAgnisvarUpa paramANugatANurUpa |
avyAkR^itAMbaragatAparimeyarUpa
vAsiShThakR^iShNa mama dehi karAvalaMbaM ||34||

brahmAdisarvajagataH suvisheShato vi
sarvatra saMsthitinimittata eva chAsaH |
vyAsaH sa vIti hi shruteriti vyAsanAman
vAsiShThakR^iShNa mama dehi karAvalaMbaM ||35||

nirdoShapUrNaguNachijjaDabhinnarUpa
shrutyA yatastvvadhigato.asi tatastvanAman |
sachChrIkarAkhyaharinAmakavyUharUpa
vAsiShThakR^iShNa mama dehi karAvalaMbaM ||36||

pailauDulomivarajaiminikAshakR^itsna-
kArShNAjiniprabhR^itishiShyasusevitAMghre |
kAnIna madgurususevyapadAbjayugma
vAsiShThakR^iShNa mama dehi karAvalaMbaM ||37||

nAnAvikarmajanitAshubhasAgarAMtaH
saMbhrAmyataH parihatasya ShaDUrmijAlaiH |
putrAdinakranigR^ihItasharIrakasya
vAsiShThakR^iShNa mama dehi karAvalaMbaM ||38||

AshAmadaprabhR^itisiMhavR^ikAdisatvA-
kIrNe.aTato bhavabhayaMkarakAnane.asmin |
paMcheShuchorahR^itabodhasuvittakasya
vAsiShThakR^iShNa mama dehi karAvalaMbaM ||39||

lakShmInivAsa bhavanIravihInakUpa-
madhyasthitasya madabhAravibhinnabuddheH |
tR^iShNAkhyavAraNabhayena digaMtabhAjo
vAsiShThakR^iShNa mama dehi karAvalaMbaM ||40||

aj~nAnamohapaTalAdgatachakShuSho.alaM
mArgAnnijAt skhalata IshadayAMburAshe |
kiM gamyamityavirataM raTato ramesha
vAsiShThakR^iShNa mama dehi karAvalaMbaM ||41||

AjanmachIrNabahudoShiNa Isha jAtu
tvatpAdanIrajayugaM hR^idi kurvato.alaM |
devAparAdhamanavekShya cha vIkShya bhaktiM
vAsiShThakR^iShNa mama dehi karAvalaMbaM ||42||

AmnAyabhAratapurANasaraHprabhUta-
vAsiShThakR^iShNanutipaMkajamAlikeyaM |
deva tvadarthamamalAM rachitochitAM tAM
kR^itvA dhriyasva hR^idaye bhava bhUtido me ||43||

vAsiShThakR^iShNapadapadmamadhuvratena
vedeshatIrthagurusevakayAdavena |
hastAvalaMbanamidaM rachitaM paThedyaH |
tasya pradAsyati karaM badarInivAsI ||44||

vedeshatIrthagurumAnasanIrajastha-
shrImadhvahR^itkamalavAsiramAnivAsaH |
prIto.astvanena shubhado mama devapUjA- |
vyAkhyAdisatkR^itikR^ito badarInivAsI ||45||

|| iti shrIyadupatyAchAryavirachitaM shrIvedavyAsakarAvalaMbanastotraM ||