జితంతే స్తోత్రే పంచమోఽధ్యాయః
।। అథ జితంతే స్తోత్రే పంచమోఽధ్యాయః ।।
జితం తే పుండరీకాక్ష నమస్తే విశ్వభావన ।
నమస్తేఽస్తు హృషీకేశ మహాపురుషపూర్వజ	॥౧॥
నమస్తే వాసుదేవాయ శాంతానందచిదాత్మనే ।
అజితాయ నమస్తుభ్యం షాగుణ్యనిధయే నమః	॥౨॥
అధ్యక్షాయ స్వతంత్రాయ నిరపేక్షాయ శాశ్వతే ।
మహావిభూతిసంస్థాయ నమస్తే పురుషోత్తమ	॥౩॥
సహస్రశిరసే తుభ్యం సహస్రచరణాయ తే ।
సహస్రబాహవే తుభ్యం సహస్రనయనాయ తే	॥౪॥
ప్రధానపురుషేశాయ నమస్తే పురుషోత్తమ ।
అమూర్తయే నమస్తుభ్యమేకమూర్తాయ తే నమః	॥౫॥
అనేకమూర్తయే తుభ్యమక్షరాయ చ తే నమః ।
వ్యాపినే వేదవేద్యాయ నమస్తే పరమాత్మనే	॥౬॥
చిన్మాత్రరూపిణే తుభ్యం నమస్తుర్యాదిమూర్తయే ।
అణిష్ఠాయ స్థవిష్ఠాయ మహిష్ఠాయ చ తే నమః	॥౭॥
వరిష్ఠాయ వసిష్ఠాయ కనిష్ఠాయ నమో నమః ।
నేదిష్ఠాయ యవిష్ఠాయ క్షేపిష్ఠాయ చ తే నమః	॥౮॥
పంచాత్మనే నమస్తుభ్యం సర్వాంతర్యామిణే నమః ।
కలాషోడశరూపాయ సృష్టిస్థిత్యంతహేతవే	॥౯॥
నమస్తే గుణరూపాయ గుణరూపానువర్తినే ।
వ్యస్తాయ చ సమస్తాయ సమస్తవ్యస్తరూపిణే	॥౧౦॥
లోకయాత్రాప్రసిద్ధ్యర్థం సృష్టబ్రహ్మాదిరూపిణే ।
నమస్తుభ్యం నృసింహాదిమూర్తిభేదాయ విష్ణవే	॥౧౧॥
ఆదిమధ్యాంతశూన్యాయ తత్త్వజ్ఞాయ నమో నమః ।
ప్రణవప్రతిపాద్యాయ నమః ప్రణవరూపిణే	॥౧౨॥
విపాకైః కర్మభిః క్లేశైరస్పృష్టవపుషే నమః ।
నమో బ్రహ్మణ్యదేవాయ తేజసాం నిధయే నమః	॥౧౩॥
నిత్యాసాధారణానేకలోకరక్షాపరిచ్ఛదే ।
సచ్చిదానందరూపాయ వరేణ్యాయ నమో నమః	॥౧౪॥
యజమానాయ యజ్ఞాయ యష్టవ్యాయ నమో నమః ।
ఇజ్యాఫలాత్మనే తుభ్యం నమః స్వాధ్యాయశాలినే	॥౧౫॥
నమః పరమహంసాయ నమః సత్త్వగుణాయ తే ।
స్థితాయ పరమే వ్యోమ్ని భూయో భూయో నమో నమః	॥౧౬॥
హరిర్దేహభృతామాత్మా పరప్రకృతిరీశ్వరః ।
త్వత్పాదమూలం శరణం యతః క్షేమో నృణామిహ	॥౧౭॥
సంసారసాగరే ఘోరే విషయావర్తసంకులే ।
అపారే దుస్తరేఽగాధే పతితం కర్మభిః స్వకైః	॥౧౮॥
అనాథమగతిం భీరుం దయయా పరయా హరే ।
మాముద్ధర దయాసింధో సింధోరస్మాత్ సుదుస్తరాత్	॥౧౯॥
మంత్రహీనం క్రియాహీనం భక్తిహీనం యదర్చితమ్ ।
తత్ క్షంతవ్యం ప్రపన్నానామపరాధసహో హ్యసి	॥౨౦॥
అపరాధసహస్రభాజనం పతితం భీమభవార్ణవోదరే ।
అగతిం శరణాగతం హరే కృపయా కేవలమాత్మసాత్ కురు	॥౨౧॥
జన్మప్రభృతి దాసోఽస్మి శిష్యోఽస్మి తనయోఽస్మి తే ।
త్వం చ స్వామీ గురుర్మాతా పితా చ మమ బాంధవః	॥౨౨॥
నాహం హి త్వా ప్రజానామి త్వాం భజామ్యేవ కేవలమ్ ।
బుద్ధ్వైవం మమ గోవింద ముక్త్యుపాయేన మాం హరే	॥౨౩॥
త్వమేవ యచ్ఛ మే శ్రేయో నియమేఽపి దమేఽపి చ ।
బుద్ధియోగం చ మే దేహి యేన త్వాముపయామ్యహమ్	॥౨౪॥
ప్రియో మే త్వాం వినా నాన్యో నేదం నేదమితీతి చ ।
బుద్ధిం నీతిం చ మే దేహి యేన త్వాముపయామ్యహమ్	॥౨౫॥
ఇతి విజ్ఞాప్య దేవేశం వైశ్వదేవం స్వధామని ।
కుర్యాత్ పంచమహాయజ్ఞానపి గృహ్యోక్తవర్త్మనా	॥౨౬॥
ఇత్యాదిసమయే తస్య ప్రోవాచ కమలాసనః ।
వేదానాం సారముద్ధృత్య సర్వాగమసమృద్ధయే	॥౨౭॥
॥ ఇతి జితంతేస్తోత్రే పంచమోఽధ్యాయః ॥
॥ ఇతి శ్రీపంచరాత్రాగమే మహోపనిషది బ్రహ్మతంత్రే శ్రీమదష్టాక్షరకల్పే హంస-బ్రహ్మసంవాదే జితంతేస్తోత్రమ్ ॥