jitaMte stotre paMchamo.adhyAyaH
|| atha jitaMte stotre paMchamo.adhyAyaH ||
jitaM te puMDarIkAkSha namaste vishvabhAvana |
namaste.astu hRRiShIkesha mahApuruShapUrvaja	||1||
namaste vAsudevAya shAMtAnaMdachidAtmane |
ajitAya namastubhyaM ShAguNyanidhaye namaH	||2||
adhyakShAya svataMtrAya nirapekShAya shAshvate |
mahAvibhUtisaMsthAya namaste puruShottama	||3||
sahasrashirase tubhyaM sahasracharaNAya te |
sahasrabAhave tubhyaM sahasranayanAya te	||4||
pradhAnapuruSheshAya namaste puruShottama |
amUrtaye namastubhyamekamUrtAya te namaH	||5||
anekamUrtaye tubhyamakSharAya cha te namaH |
vyApine vedavedyAya namaste paramAtmane	||6||
chinmAtrarUpiNe tubhyaM namasturyAdimUrtaye |
aNiShThAya sthaviShThAya mahiShThAya cha te namaH	||7||
variShThAya vasiShThAya kaniShThAya namo namaH |
nediShThAya yaviShThAya kShepiShThAya cha te namaH	||8||
paMchAtmane namastubhyaM sarvAMtaryAmiNe namaH |
kalAShoDasharUpAya sRRiShTisthityaMtahetave	||9||
namaste guNarUpAya guNarUpAnuvartine |
vyastAya cha samastAya samastavyastarUpiNe	||10||
lokayAtrAprasiddhyarthaM sRRiShTabrahmAdirUpiNe |
namastubhyaM nRRisiMhAdimUrtibhedAya viShNave	||11||
AdimadhyAMtashUnyAya tattvaj~nAya namo namaH |
praNavapratipAdyAya namaH praNavarUpiNe	||12||
vipAkaiH karmabhiH kleshairaspRRiShTavapuShe namaH |
namo brahmaNyadevAya tejasAM nidhaye namaH	||13||
nityAsAdhAraNAnekalokarakShAparichChade |
sachchidAnaMdarUpAya vareNyAya namo namaH	||14||
yajamAnAya yaj~nAya yaShTavyAya namo namaH |
ijyAphalAtmane tubhyaM namaH svAdhyAyashAline	||15||
namaH paramahaMsAya namaH sattvaguNAya te |
sthitAya parame vyomni bhUyo bhUyo namo namaH	||16||
harirdehabhRRitAmAtmA paraprakRRitirIshvaraH |
tvatpAdamUlaM sharaNaM yataH kShemo nRRiNAmiha	||17||
saMsArasAgare ghore viShayAvartasaMkule |
apAre dustare.agAdhe patitaM karmabhiH svakaiH	||18||
anAthamagatiM bhIruM dayayA parayA hare |
mAmuddhara dayAsiMdho siMdhorasmAt sudustarAt	||19||
maMtrahInaM kriyAhInaM bhaktihInaM yadarchitam |
tat kShaMtavyaM prapannAnAmaparAdhasaho hyasi	||20||
aparAdhasahasrabhAjanaM patitaM bhImabhavArNavodare |
agatiM sharaNAgataM hare kRRipayA kevalamAtmasAt kuru	||21||
janmaprabhRRiti dAso.asmi shiShyo.asmi tanayo.asmi te |
tvaM cha svAmI gururmAtA pitA cha mama bAMdhavaH	||22||
nAhaM hi tvA prajAnAmi tvAM bhajAmyeva kevalam |
buddhvaivaM mama goviMda muktyupAyena mAM hare	||23||
tvameva yachCha me shreyo niyame.api dame.api cha |
buddhiyogaM cha me dehi yena tvAmupayAmyaham	||24||
priyo me tvAM vinA nAnyo nedaM nedamitIti cha |
buddhiM nItiM cha me dehi yena tvAmupayAmyaham	||25||
iti vij~nApya deveshaM vaishvadevaM svadhAmani |
kuryAt paMchamahAyaj~nAnapi gRRihyoktavartmanA	||26||
ityAdisamaye tasya provAcha kamalAsanaH |
vedAnAM sAramuddhRRitya sarvAgamasamRRiddhaye	||27||
|| iti jitaMtestotre paMchamo.adhyAyaH ||
|| iti shrIpaMcharAtrAgame mahopaniShadi brahmataMtre shrImadaShTAkSharakalpe haMsa-brahmasaMvAde jitaMtestotram ||