|| atha jitaMte stotre chaturtho.adhyAyaH ||

jitaM te puMDarIkAkSha pUrNaShADguNyavigraha |
namaste.astu hRRiShIkesha mahApuruShapUrvaja ||1||

devAnAM dAnavAnAM cha sAmAnyamadhidaivatam |
sarvadA charaNadvaMdvaM vrajAmi sharaNaM tava ||2||

ekastvamasya lokasya sraShTA saMhArakastathA |
adhyakShashchAnumaMtA cha guNamAyAsamAvRRitaH ||3||

saMsArasAgaraM ghoramanaMtakleshabhAjanam |
tvAmeva sharaNaM prApya nistaraMti manIShiNaH ||4||

na te rUpaM na chAkAro nAyudhAni na chAspadam |
tathA.api puruShAkAro bhaktAnAM tvaM prakAshase ||5||

naiva kiMchitparokShaM te pratyakSho.asi na kasyachit |
naiva kiMchidasiddhaM te na cha siddho.asi karhichit ||6||

kAryANAM kAraNaM pUrvaM vachasAM vAchyamuttamam |
yogAnAM paramAM siddhiM paramaM te padaM viduH ||7||

ahaM bhIto.asmi devesha saMsAre.asmin bhayAvahe |
pAhi mAM puMDarIkAkSha na jAne sharaNaM param ||8||

kAleShvapi cha sarveShu dikShu sarvAsu chAchyuta |
sharIre cha gatau chAsya vartate me mahadbhayam ||9||

tvatpAdakamalAdanyanna me janmAMtareShvapi |
nimittaM kushalasyAsti yena gachChAmi sadgatim ||10||

vij~nAnaM yadidaM prAptaM yadidaM j~nAnamUrjitam |
janmAMtare.api devesha mA bhUdasya parikShayaH ||11||

durgatAvapi jAtAyAM tvadgato me manorathaH |
yadi nAshaM na viMdeta tAvatA.asmi kRRitI sadA ||12||

na kAmakaluShaM chittaM mama te pAdayoH sthitam |
kAmaye vaiShNavatvaM cha sarvajanmasu kevalam ||13||

aj~nAnAdyadi vA j~nAnAdashubhaM yatkRRitaM mayA |
kShaMtumarhasi devesha dAsyena cha gRRihANa mAm ||14||

sarveShu deshakAleShu sarvAvasthAsu chAchyuta |
kiMkaro.asmi hRRiShIkesha bhUyo bhUyo.asmi kiMkaraH ||15||

ityevamanayA stutyA stutvA devaM dine dine |
kiMkaro.asmIti chAtmAnaM devAya vinivedayet ||16||

mAdRRisho na paraH pApI tvAdRRisho na dayAparaH |
iti matvA jagannAtha rakSha mAM garuDadhvaja ||17||

yachchAparAdhaM kRRitavAnaj~nAnAt puruShottama |
aj~nasya mama devesha tatsarvaM kShaMtumarhasi ||18||

ahaMkArArthakAmeShu prItiradyaiva nashyatu |
tvAM prapannasya me saiva vardhatAM shrIpate tvayi ||19||

kvAhamatyaMtadurbuddhiH kva nu chAtmahitekShaNam |
yaddhitaM mama devesha tadAj~nApaya mAdhava ||20||

so.ahaM te deva devesha nArchanAdau stutau na cha |
sAmarthyavAn kRRipAmAtramanovRRittiH prasIda me ||21||

upachArApadeshena kriyaMte.aharnishaM mayA |
apachArAnimAn sarvAn kShamasva puruShottama ||22||

na jAne karma yatkiMchinnApi laukikavaidike |
na niShedhavidhI viShNo tava dAso.asmi kevalam ||23||

sa tvaM prasIda bhagavan kuru mayyanAthe
viShNo kRRipAM paramakAruNikaH kila tvam |
saMsArasAgaranimagnamanaMtadInam
uddhartumarhasi hare puruShottamo.asi ||24||

karacharaNakRRitaM vA kAyajaM karmajaM vA
shravaNamananajaM vA mAnasaM vA.aparAdham |
vihitamavihitaM vA sarvametat kShamasva
jaya jaya karuNAbdhe shrIpate shrImukuMda ||25||

karmaNA manasA vAchA yA cheShTA mama nityashaH |
keshavArAdhane sA syAjjanmajanmAMtareShvapi ||26||

|| iti jitaMtestotre chaturtho.adhyAyaH ||