జితంతే స్తోత్రే తృతీయోఽధ్యాయః
।। అథ జితంతే స్తోత్రే తృతీయోఽధ్యాయః ।।
జితం తే పుండరీకాక్ష నమస్తే విశ్వభావన ।
నమస్తేఽస్తు హృషీకేశ మహాపురుషపూర్వజ	॥౧॥
నమస్తే వాసుదేవాయ శాంతానందచిదాత్మనే ।
అధ్యక్షాయ స్వతంత్రాయ నిరపేక్షాయ శాశ్వతే	॥౨॥
అచ్యుతాయావికారాయ తేజసాం నిధయే నమః ।
క్లేశకర్మాద్యసంస్పృష్టపూర్ణషాడ్గుణ్యమూర్తయే	॥౩॥
త్రిభిర్జ్ఞానబలైశ్వర్యవీర్యశక్త్యోజసాం యుగైః ।
త్రిగుణాయ నమస్తేఽస్తు నమస్తే చతురాత్మనే	॥౪॥
ప్రధానపురుషేశాయ నమస్తే పురుషోత్తమ ।
చతుఃపంచనవవ్యూహదశద్వాదశమూర్తయే	॥౫॥
అనేకమూర్తయే తుభ్యమమూర్తాయైకమూర్తయే ।
నారాయణ నమస్తేఽస్తు పుండరీకాయతేక్షణ	॥౬॥
సుభ్రూలలాట సుముఖ సుస్మితాధరవిద్రుమ ।
పీనవృత్తాయతభుజ శ్రీవత్సకృతభూషణ	॥౭॥
తనుమధ్యమహావక్షః పద్మనాభ నమోఽస్తు తే ।
విలాసవిక్రమాక్రాంతత్రైలోక్యచరణాంబుజ	॥౮॥
నమస్తే పీతవసన స్ఫురన్మకరకుండల ।
స్ఫురత్కిరీటకేయూర నూపురాంగదభూషణ	॥౯॥
పంచాయుధ నమస్తేఽస్తు నమస్తే పాంచకాలిక ।
పంచకాలరతానాం త్వం యోగక్షేమం వహ ప్రభో	॥౧౦॥
నిత్యజ్ఞానబలైశ్వర్యభోగోపకరణాచ్యుత ।
నమస్తే బ్రహ్మరుద్రాదిలోకయాత్రాప్రవర్తక	॥౧౧॥
జన్మప్రభృతి దాసోఽస్మి శిష్యోఽస్మి తనయోఽస్మి తే ।
త్వం చ స్వామీ గురుర్మాతా పితా చ మమ బాంధవః	॥౧౨॥
అయి త్వాం భగవన్ బ్రహ్మశివశక్రమహర్షయః ।
ద్రష్టుం యష్టుమభిష్టోతుమద్యాపీశ నహీశతే	॥౧౩॥
తాపత్రయమహాగ్రాహభీషణే భవసాగరే ।
మజ్జతాం నాథ నౌరేషా ప్రణతిస్తు త్వదర్పితా	॥౧౪॥
అనాథాయ జగన్నాథ శరణ్య శరణార్థినే ।
ప్రసీద సీదతే మహ్యం ముహ్యతే భక్తవత్సల	॥౧౫॥
మంత్రహీనం క్రియాహినం భక్తిహీనం యదర్చనమ్ ।
తత్ క్షంతవ్యం ప్రపన్నానామపరాధసహో హ్యసి	॥౧౬॥
సర్వేషు దేశకాలేషు సర్వావస్థాసు చాచ్యుత ।
కింకరోఽస్మి హృషీకేశ భూయో భూయోఽస్మి కింకరః	॥౧౭॥
ఏకత్రిచతురత్యంతచేష్టాయేష్టకృతే సదా ।
వ్యక్తషాగుణ్యతత్త్వాయ చతురాత్మాత్మనే నమః	॥౧౮॥
కర్మణా మనసా వాచా యా చేష్టా మమ నిత్యశః ।
కేశవారాధనే సా స్యాజ్జన్మజన్మాంతరేష్వపి	॥౧౯॥
॥ ఇతి జితంతేస్తోత్రే తృతీయోఽధ్యాయః ॥