|| atha jitaMte stotre tRRitIyo.adhyAyaH ||

jitaM te puMDarIkAkSha namaste vishvabhAvana |
namaste.astu hRRiShIkesha mahApuruShapUrvaja ||1||

namaste vAsudevAya shAMtAnaMdachidAtmane |
adhyakShAya svataMtrAya nirapekShAya shAshvate ||2||

achyutAyAvikArAya tejasAM nidhaye namaH |
kleshakarmAdyasaMspRRiShTapUrNaShADguNyamUrtaye ||3||

tribhirj~nAnabalaishvaryavIryashaktyojasAM yugaiH |
triguNAya namaste.astu namaste chaturAtmane ||4||

pradhAnapuruSheshAya namaste puruShottama |
chatuHpaMchanavavyUhadashadvAdashamUrtaye ||5||

anekamUrtaye tubhyamamUrtAyaikamUrtaye |
nArAyaNa namaste.astu puMDarIkAyatekShaNa ||6||

subhrUlalATa sumukha susmitAdharavidruma |
pInavRRittAyatabhuja shrIvatsakRRitabhUShaNa ||7||

tanumadhyamahAvakShaH padmanAbha namo.astu te |
vilAsavikramAkrAMtatrailokyacharaNAMbuja ||8||

namaste pItavasana sphuranmakarakuMDala |
sphuratkirITakeyUra nUpurAMgadabhUShaNa ||9||

paMchAyudha namaste.astu namaste pAMchakAlika |
paMchakAlaratAnAM tvaM yogakShemaM vaha prabho ||10||

nityaj~nAnabalaishvaryabhogopakaraNAchyuta |
namaste brahmarudrAdilokayAtrApravartaka ||11||

janmaprabhRRiti dAso.asmi shiShyo.asmi tanayo.asmi te |
tvaM cha svAmI gururmAtA pitA cha mama bAMdhavaH ||12||

ayi tvAM bhagavan brahmashivashakramaharShayaH |
draShTuM yaShTumabhiShTotumadyApIsha nahIshate ||13||

tApatrayamahAgrAhabhIShaNe bhavasAgare |
majjatAM nAtha naureShA praNatistu tvadarpitA ||14||

anAthAya jagannAtha sharaNya sharaNArthine |
prasIda sIdate mahyaM muhyate bhaktavatsala ||15||

maMtrahInaM kriyAhinaM bhaktihInaM yadarchanam |
tat kShaMtavyaM prapannAnAmaparAdhasaho hyasi ||16||

sarveShu deshakAleShu sarvAvasthAsu chAchyuta |
kiMkaro.asmi hRRiShIkesha bhUyo bhUyo.asmi kiMkaraH ||17||

ekatrichaturatyaMtacheShTAyeShTakRRite sadA |
vyaktaShAguNyatattvAya chaturAtmAtmane namaH ||18||

karmaNA manasA vAchA yA cheShTA mama nityashaH |
keshavArAdhane sA syAjjanmajanmAMtareShvapi ||19||

|| iti jitaMtestotre tRRitIyo.adhyAyaH ||